އައްޑޫގައި ޤާއިމުކުރާ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމެންޓް، ފުލުހުންގެ 89 ވަނަ އަހަރީ ދުވަހާއި ދިމާކޮށް އިފްތިތާޙުކުރުމަށް މަސައްކަތްކުރަމުންދާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މުހައްމަދު ހަމީދު މިހެން ވިދާޅުވީ މިދިޔަ ހަފްތާ ބަނދުގައި އައްޑޫއައް ކުރެއްވި ޒިޔާރަތުގައި އައްޑޫ ޕޮލިސް އެކެޑަމީ ބައްލަވާލެއްވުމަށްފަހު، މީޑިއާތަކަށް މަޢުލޫމާތު ދެއްވަމުންނެވެ. އެގޮތުން ކަމިޝަނަރ ހަމީދު ވިދާޅުވީ، މިހާތަނަށް މަސައްކަތް ކުރިއަށް ގޮސްފައިވާ ގޮތަށް ބަލައި، ކޮންޓްރެކްޓަރ މިމަސައްކަތް މިއަންނަ އަހަރު ކުރީކޮޅަށް ނިންމާލެވޭނެކަމަށް މަޢުލޫމާތުދޭ ކަމަށެވެ.
"މިއަދު އަޅުގަނޑަށް ފެނިގެން މިދިޔައީ، މިކޮންސްޓްރަކްޝަން މަސައްކަތުގެ ވަރަށް ބޮޑު ޕަސެންޓޭޖެއް ނިމިފައި އޮތްތަން. ކޮންޓްރެކްޓަރ އުއްމީދު ކުރާ ގޮތުގައި ކުރިއަށް އޮތް މަހެއް ދެމަހެއްހާ ދުވަހުގެ ތެރޭގެ ނިންމާލެވޭނެ. ނަމަވެސް އަޅުގަނޑަށް ފެނުނީ މިތަނުން ފެނުނު ކަންކަމަށް ބަލާއިރު އެއަށް ވުރެ އިތުރު ވަގުތު ހޭދަ ކުރަން ޖެހިދާނެ ކަމަށް ނިންމަން. އެހެންނަމަވެސް އަޅުގަނޑުމެންގެ އުއްމީދަކީ މިއަންނަ އަހަރުގެ މާރިޗު 29 ވަނަ ދުވަހު. އެއީ ފުލުހުންގެ ޙިދުމަތުގެ އަހަރީ ދުވަހުގެ މުނާސަބަތާއި ގުޅުވައިގެން މިތަން އިނޮގްރޭޓް ކުރެވޭ ތޯ ބެލުން" ހަމީދު ވިދާޅުވިއެވެ.
މީގެ ކުރިންވެސް މިތަން ހުޅުވުމަށް ގިނަ ތާރީޙުތަކެއް ކަނޑައެޅިއެވެ. ނަމަވެސް ކޯވިޑާއެކު ޕްރޮޖެކްޓުގެ މަސައްކަތަށް ވަރަށް ބޮޑެތި ލަސްވުންތަކެއް އައިކަން ފުލުހުން ވަނީ ފާހަގަކޮށްފައެވެ. އެގޮތުން މަސައްކަތް ނިންމުމަށް ބޭނުންވާ މަސައްކަތު މީހުން ނުގެނެވި ގިނަ ދުވަސްތަކެއް ވެގެން ދިޔައިރު، މަސައްކަތް ކުރުމަށް ގެނައި މީހުންގެ ތެރޭގައިވެސް ކޯވިޑް ކޭސްތަކެއް ފެނުމުން މަސައްކަތް ކުރިއަށް ގެންދިއުން ހުއްޓިގެން ދިޔަކަން ފުލުހުން ފާހަގަކުރައްވައެވެ.
ރާއްޖޭގެ ތަންފީޒީ އިދާރާތަކަށް ހާއްސަ ކުރެވިގެން ހަދާ މިތަނުގައި، 340 މީހުންނަށް އެއްފަހަރާ މިތަނުގައި ތިބެގެން ތަމްރީނު ފުރިހަމަކުރެވޭނެ އިންތިޒާމު ވަނީ ހަމަޖެހިފައެވެ، މީގެ އިތުރުން މިތަނުގައި ސިއްޙީ ފަރުވާދޭނެ ތަންތަނާއި ކުޅިވަރާއި ތަމްރީނުތަކަށް، 800 މީހުންގެ ޖާގައިގެ ޖިމްނޭޒިއަމްއަކާއި، ބާސްކެޓު، ޓެނިސް އަދި ފުޓްބޯޅަ ގްރައުންޑަކާއިިއެކު، 400 މީޓަރުގެ ދުވާ ޓްރެކެއް ހިމެނެއެވެ. އަދި ހެލިކޮޕްޓަރު ޖެއްސުމަށް ހެލިޕޭޑެއްވެސް އޮންނާނެއެވެ. މީގެ އިތުރުން ކިޔަވައި ދިނުމަށް 340 މީހުންގެ އޮޑިޓޯރިއަމަކާއި 40 މީހުންގެ ޖާގަ ހިމެނޭ ގޮތަށް 320 މީހުންނަށް ކިޔަވައިދެވޭ ކުލާސް ރޫމްތައް ހުންނާނެއެވެ.
އައްޑޫ ސިޓީގައި ޤާއިމްކުރާ ޕޮލިސް އެކެޑަމީގެ އަމަލީ މަސައްކަތް ފަށާފައިވަނީ 2016 ވަނަ އަހަރުއެވެ. މަޝްރޫއުގެ ނިމޭއިރު މަޝްރޫއަށް 40 އާއި 42 މިލިއަން ޑޮލަރާ ދެމެދު ޙަރަދުވާނެއެވެ.
ފުލުހުން ވިދާޅުވި ގޮތުގައި، މިތަން ނިމުމަށްފަހު މިތަނުގެ ހުރިހާކަމެއް ފުލުހުންގެ ބެލުމުގެ ދަށުން ކުރިއަށް ގެންދަން ހަމަޖެހިފައިވާއިރު، މިތަނުގެ ފައިދާ މުޅި އައްޑޫ ސިޓީ އަދި ރާއްޖޭގެ ތަންފީޒީ ހުރިހާ އިދާރާއަކަށް ލިބިގެން ދާނެއެވެ. މިއީ ރާއްޖޭގައިވެސް ޤާއިމު ކުރެވޭ މިފަދަ އެންމެ ބޮޑު ތަމްރީނު މަރުކަޒެވެ.