އައްޑޫސިޓީ ހިތަދޫގައި ރޭ ދަންވަރު ހިނގި ނުރައްކާތެރި އެކްސިޑެންޓެއްގައި 24 އަހަރުގެ ޒުވާނަކު މަރުވެއްޖެއެވެ.
ރޭ ދަންވަރު 12:45 އެހަކައްހާއިރު ހިނގި މިއެކްސިޑެންޓުގައި މަރުވެފައިވަނީ، ސި ހިތަދޫ ރަހަދޫގެ އުމުރުން 24 އަހަރުގެ މުހައްމަދު އަލްތާފްއެވެ. އެނާ ހޮސްޕިޓަލަށް ގެންދިޔައިރުވެސް މަރުވެފައިވާކަމަށް އައްޑޫ އެކުއެޓޯރިއަލް ހޮސްޕިޓަލާއި ހަވާލާދީ ފުލުހުން ވިދާޅުވެއެވެ.
މި އެކްސިޑެންޓު ހިނގާފައިވަނީ ހިތަދޫ ފްލެޓުތަކުގެ އުތުރުން އޮންނަ ސަރަހައްދުގައެވެ. އެކްސިޑެންޓްވީ މި ޒުވާނާ ދުއްވާދިޔަ ސައިކަލް ކޮންޓްރޯލްނުވެ ގެއެއްގެ ފާރުގައި ޖެހިގެންކަމަށް ފުލުހުން ވިދާޅުވެއެވެ. އެނގިފައިވާ ގޮތުގައި މި އެކްސިޑެންޓް ހިނގާފައިވަނީ މި ޒުވާނާ ދިރިއުޅޭ ގެ އާއި ދާދި ކައިރީގައެވެ.
އައްޑޫ އެކުއެޓޯރިއަލް ހޮސްޕިޓަލުން ވިދާޅުވީ މި ޒުވާނާ ރޭ ދަންވަރު 12:57 ގައި ހޮސްޕިޓަލަށް ގެނައި އިރުވެސް ނިޔާވެފައިވާ ކަމަށެވެ. އަދި އޭނާ މަރުވެފައިވަނީ ބޮލަށް ލިބިފައި ހުރި އަނިޔާ ތަކުގެ ސަބަބުން ކަމަށް ހޮސްޕިޓަލުން ވިދާޅުވެއެވެ.
މިއެކްސިޑެންޓް ހިތަދޫ ޕޮލިސް ސްޓޭޝަނުން ދަނީ މިހާރު ތަހުގީގު ކުރަމުންނެވެ.