އައްޑޫސިޓީ ހިތަދޫ ފުއްޓަރަށް މިއަދު ހެނދުނުގެ ވަގުތެއްގައި ބޮޑު މަހެއް ލައްގައިފިއެވެ.
ހިތަދޫ ސްކޫލާއި ދިމާލަށް ފުއްޓަރަށް ލައްގާފައިވާ މި ބޮޑު މަސް ފެނިގެން ރިޕޯޓުކޮށްފައިވަނީ މިއަދު ހެނދުނު ކަމަށް އައްޑޫސިޓީ ކައުންސިލުން ވިދާޅުވެއެވެ. މި ބޮޑު މަހުގެ ބޮޑު މިނުގައި 39 ފޫޓު ހުންނާނެ ކަމަށް ސިޓީ ކައުންސިލުން ހާމަކުރެއެވެ. އަދި ބޮޑު މަސް ފަރުމައްޗަށް ލައްގާފައި އޮތް އިރު ވަރަށް ބޮޑަށް ކުނިވެ މުޅި ސަރަހައްދަށް ވަސް ފެތުރިފައިވާ ކަމަށް ސިޓީ ކައުންސިލުން ވިދާޅުވެއެވެ.
ހިތަދޫ މޫލެކެޑެ ދާއިރާގެ ކައުންސިލަރ އަހުމަދު ސައީދު ޕީއެސްއެމް އަށް މައުލޫމާތު ދެއްވަމުން ވިދާޅުވީ ހެނދުނުގެ ވަގުތެއްގައި ބޮޑު މަސް ފެނިގެން ރިޕޯޓުކޮށްފައިވާއިރު ކައުންސިލުން މިހާރު އެ މަސް ނަގާ ވަޅުލުމުގެ މަސައްކަތް ކުރަމުންދާ ކަމަށެވެ. އަދި މިކަން ކުރުމަށް އެމްއެންޑީއެފް އާއި އެކު މަޝްވަރާ ކުރެވި ގުޅިގެން މިއަދުގެ ވަގުތެއްގައި އެ މަސައްކަތް ފެށޭނެ ކަމަށް އޭނާ ވިދާޅުވިއެވެ.
މީގެ ކުރީން 2015 ވަނަ އަހަރުވެސް އައްޑޫސިޓީ މީދޫއަށް ބޮޑު މަހެއް ވަނީ ލައްގާފައެވެ.