މިދިޔަ އަހަރުގެ ޖެނުއަރީގެ ފަހުން ރާއްޖެ އެތެރެކުރެވުނު މުދަލުގެ އަގު ފުރަތަމަ ފަހަރަށް 3.8 ބިލިއަން ރުފިޔާއަށް އަރާފައިވާ ކަމަށް ކަސްޓަމްސްގެ ތަފާސް ހިސާބުތަކުން ދައްކައިފިއެވެ.
ކަސްޓަމްސްގެ ތަފާސް ހިސާބުތައް ދައްކާގޮތުން ފާއިތުވި އޮކްޓޯބަރު މަހު ރާއްޖެއަށް އެތެރެ ކުރެވުނު މުދަލުގެ ސީއައިއެފް އަގު 3.8 ބިލިއަން ރުފިޔާއަށް އަރައެވެ. މިއީ މިއަހަރު މުދަލުގެ ސީއައިއެފް އަގު އެންމެ މަތިވެގެން ދިޔަ މަސް ކަމަށް ކަސްޓަމްސްގެ ތަފާސް ހިސާބުތަކުން ދައްކައެވެ. ކަސްޓަމްސް އިން ހާމަ ކުރި ގޮތުގައި މިއީ މިދިޔަ އަހަރުގެ ޖެނުއަރީ މަހު 3.7 ބިލިއަން ރުފިޔާގެ މުދާ ރާއްޖެއަށް އެތެރެ ކުރިފަހުން މިއަދަދާ ހަމަ ކުރި ފުރަތަމަ ފަހަރެވެ. މިދިޔަ އަހަރު އޮކްޓޯބަރު މަހު ރާއްޖެއަށް އެތެރެ ކުރީ އެންމެ 2 ބިލިއަން ރުފިޔާގެ މުދާކަމަށް ކަސްޓަމްސްއިން ބުނެއެވެ.
މީގެ އިތުރުން މިއަހަރު އޮކްޓޯބަރު މަހު އިމްޕޯޓާއި އެކްސްޕޯޓުގެ ސަބަބުން ދައުލަތަށް ލިބުނު އާމްދަނީ މިދިޔަ އަހަރުގެ އޮކްޓޯބަރު މަހާއި އަޅާބަލާއިރު ވަނީ ދަށްވެފައެވެ. އެގޮތުން، މިއަހަރުގެ އޮކްޓޯބަރު މަހު ދައުލަތަށް 294 މިލިއަން ރުފިޔާ ލިބިފައިވާއިރު މިދިޔަ އަހަރު ލިބިފައިވަނީ 424 މިލިއަން ރުފިޔާއެވެ. މިއީ 31 އިންސައްތަ ދަށްވުމެކެވެ.
މިދިޔަ މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ އޮމާން، އިންޑިއާ، ޔޫއޭއީ އަދި ޗައިނާއިންނެވެ. އެގޮތުން އޮމާންއިން 512 މިލިއަން ރުފިޔާގެ މުދާ އެތެރެކޮށްފައިވާއިރު އިންޑިއާއިން އެތެރެކޮށްފައިވަނީ 490 މިލިއަން ރުފިޔާގެ މުދަލެވެ. ޔޫއޭއީން 438 މިލިއަން ރުފިޔާގެ މުދާ އެތެރެކޮށްފައިވާއިރު، ޗައިނާއިން 437 މިލިއަން ރުފިޔާގެ މުދާ އެތެރެކުރިކަމަށް ކަސްޓަމްސް އިން ބުނެއެވެ.
މިދިޔަ މަހު އެންމެ ގިނާ މުދާ ބޭރުކޮށްފައިވަނީ ތައިލޭންޑަށާއި ޖަރުމަންވިލާތަށެވެ. އެގޮތުން ތައިލޭންޑަށް 55 އިންސައްތަ މުދާ ބޭރު ކުރިއިރު، ޖަރުމަން ވިލާތަށް ބޭރުކޮށްފައިވަނީ 16 އިންސައްތަ މުދަލެވެ.
މިދިޔަ އޮކްޓޯބަރު މަހު ރޯޔަލްޓީގެ ގޮތުގައި ލިބިފައިވަނީ 2.7 މިލިއަން ރުފިޔާ ކަމަށް ކަސްޓަމްސް އިން ބުނެއެވެ. އަދި މިމަހު 18403 އުޅަނދަކަށް ޑިކްލަރޭޝަން ދީފައިވެއެވެ. މިމަހު ރާއްޖެއިން ބޭރުވުމަށް 118 އުޅަނދަކަށް ހުއްދަ ދިންއިރު އެތެރެވުމުގެ ހުއްދަ 127 އުޅަނދަކަށް ދީފައިވެއެވެ.