އެމެރިކާގައި ވަޒީފާ ނެތް މީހުންނަށްދޭ އެލަވަންސަށް އެދޭ މީހުންގެ ޢަދަދު ކޯވިޑުގެ ކުރިން ހުރި މިންވަރަށް ދަށްވެއްޖެއެވެ.
އެމެރިކާގެ ލޭބަރ ޑިޕާޓުމަންޓުން ޢާއްމުކޮށްފައިވާ ތަފާސްހިސާބުތަށް ދައްކާގޮތުން ހުސްވި ހަފްތާތެރޭގައި ވަޒީފާ ނެތް މީހުންނަށް ދޭ އެލަވަންސަށް އެދިފައިވަނީ 199000 މީހުންނެވެ. ކޯވިޑުގެ ބަލިމަޑުކަމާއި އެކު އެމެރިކާގެ އިޤްތިސާދަށް ކުރި އަސަރުތަކުގެ ސަބަބުން އެޤައުމުގައި ވަޒީފާ ނެތް މީހުންގެ ޢަދަދު އިންތިހާއަށް އިތުރުވެގެން ދިޔައެވެ.
އެގޮތުން މިދިޔަ އަހަރުގެ މާރޗުމަހުން ފެށިގެން އެލަވަންސަށް އެދޭ މީހުންގެ ޢަދަދުތަށް ހުރީ މިލިއަނަކަށްވުރެ މަތީގައެވެ. އެހެން ނަމަވެސް ފާއިތުވީ 20 މަސް ދުވަހު އެލަވަންސަށް އެދޭ މީހުންގެ ޢަދަދު ދިޔައީ މަހަކަށްވުރެ މަހެއް ދަށަށެވެ.
ކޯވިޑަށް ފަހު އެމެރިކާގެ އިޤްތިސާދު އާރާސްތުވަމުންދާ އިރު، ވަޒީފާގެ ފުރުސަތުތަށް އިތުރުވެ، ކުންފުނިތަކަށްވަނީ މުވައްޒަފުން ހޯދުމުގައި ދަތިތަކާއި ކުރިމަތިވެފައެވެ. އަދި ވަޒީފާގެ ގިނަ ފުރުސަތުތަކެއް ހުޅުވިފައިވުމުން އަމިއްލައަށް ވަޒީފާ ދޫކޮށްލާ މީހުންގެ އަދަދުވަނީ ވަނީ ރެކޯޑު ޢަދަދަކަށް އިތުރުވެފައެވެ. އެގޮތުން މިދިޔަ ސެޕްޓެމްބަރުމަހު މި އަދަދު ހުރީ 4.4 މިލިއަންގައެވެ.