މިސަރުކާރުން މިހާތަނަށް ފަތުރުވެރިކަމުގެ ސިނާއަތައް އިތުރު 14000 އެނދު ނެރެދީފައިވާ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރައީސް އިބްރާހިމް މުހައްމަދު ސާލިހްގެ ވެރިކަމުގެ 2 އަހަރު ދިޔައީ މުޅި ދުނިޔެއަށްވެސް ބޮޑު ސިއްހީ ބަލިމަޑުކަމެއް ދިމާވި ދުވަސްވަރަކާއެވެ. ދުނިޔޭގެ ފަތުރުވެރިކަމުގައި މަޝްހޫރު ބައެއް އެހެން ޤައުމުތައްވެސް ކޯވިޑްގެ ތެރޭގައި އޮތީ އެއްކޮށް ބަންދުކޮށް ފަތުރުވެރިކަން ހުއްޓިފައެވެ. ނަމަވެސް މި ސަރުކާރުގެ ދުރުވިސްނޭ ސިޔާސަތުގެ ދަށުން އެޅުއްވި ހަރުދަނާ ފިޔަވަޅުތަކުގެ ސަބަބުން ރާއްޖޭގެ ފަތުރުވެރިކަން މި ހާލަތުގައިވެސް ވަނީ ފަށައިގަނެ އަލުން ކޮޅަށް ނަގާފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، ރައީސް ސާލިހްގެ ވެރިކަމުގެ 2 އަހަރު ދިޔައީ ކޯވިޑާއިއެކު ފަތުރުވެރިކަމުގެ ސިނާއަތް އެއްކޮށް ބަންދުކުރަންޖެހިފައިވާ ހާލަތުގައިކަމަށެވެ. ނަމަވެސް މި ސަރުކާރުން ފަތުރުވެރިކަމަށް މުޅިން އަލަށް 14000 އެނދު ނެރެފައިވާކަމަށާއި މިއީ ބޮޑު ކާމިޔާބީއެއްގެ ގޮތުގައި މިނިސްޓަރ ވަނީ ސިފަކުރައްވާފައެވެ.
"ރައީސް ސާލިހްގެ ސަރުކާރުގައި މިހާތަނަށް އައިއިރު 2 އަހަރު ދިޔައީ ޕެންޑަމިކްގެ ތެރޭގައި އެހެންނަމަވެސް އިންޑަސްޓްރީއަށް 14000 އެނދު ނިކުމެއްޖެ. އެއީ ހަމަ 2 އަހަރު މުޅި ދުނިޔެ ހުއްޓިފައި އޮއްވާ. އެހެންވީމަ އިންވެސްޓަރުންގެ ޝައުގުވެރިކަންވެސް އެބަހުރި. އެހެންނަމަވެސް ބައެއްފަހަރަށް އަދިވެސް އަޅުގަނޑުމެންގެ ބަޖެޓް މިއޮތީ ޑެފިސިޓްގަ ދެއްތޯ. އެހެންވީމަ އިންވެސްޓަރުންގެ ޝައުގު ނުގެއްލޭ ވަރަށް، ދުނިޔޭގެ ވާދަވެރިކަމާއި ގުޅޭ މިންވަރަށް ބައެއްކަހަލަ ކަންތައް އަޅުގަނޑުމެން އެޑްޖަސްޓް ކޮށްލަން ޖެހޭ ވަގުތު އައިސްދާނެ." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އިންވެސްޓަރުންގެ ޝައުގުވެރިކަން ރާއްޖެއަށް އެބައޮތް ކަމަށެވެ. އެހެންނަމަވެސް ބައެއް ފަރާތްތަކުން ސިޔާސީ ބޭނުމެއްގައި އިންވެސްޓަރުންގެ އިތުބާރު ގެއްލޭ ފަދަ ކަންކަން ކުރަމުންދާތީ މިނިސްޓަރ ވަނީ އެކަމުގެ ކަންބޮޑުވުން ފާޅުކުރައްވާފައެވެ.
މިނިސްޓަރ މައުސޫމް ވިދާޅުވީ، މިއަހަރުގެ މިހާތަނަށް އަލަށް 2 ރިސޯޓް ހުޅުވާފައިވާކަމަށެވެ. އަދި އަހަރުގެ ކުރިއަށްއޮތް ތަނުގައި އިތުރު 2 ރިސޯޓް ހުޅުވިގެންދާނެކަމަށެވެ. މިއީ އިތުރު 3500 އެނދުކަމަށް މިނިސްޓަރ ވިދާޅުވިއެވެ. ސަރުކާރުން މިހާރު އަމާޒުހިފާފައިވަނީ ކޮންމެ އަހަރަކު ރާއްޖޭގެ ފަތުރުވެރިކަމަށް 8000 އެނދު ނެރެވޭނެކަމަށެވެ. އެއީ ރިސޯޓްތަކާއި، ގެސްޓްހައުސްތަކާއި އަދި ހޮޓެލް ސަފާރީ ހިމެނޭގޮތަށެވެ.