އިންޑިއާގެ މަޝްހޫރު މީޑިއާތަކުގެ ޓީމެއް އެމްއެމްޕީއާރުސީގެ ދައުވަތަކަށް ފެމިލިއަރައިޒޭޝަން ދަތުރެއްގައި ރާއްޖެ އަތުވެއްޖެއެވެ. މި ދަތުރު ކުރިއަށް ދަނީ މިމަހުގެ 13އިން 19ވަނަ ދުވަހަށެވެ.
މި ޓީމުގައި ހިމެނޭ މީޑިއާތަކުގެ ތެރޭގައި ޓައިމްސް އޮފް އިންޑިއާ، ފައިނޭންޝަލް އެކްސްޕްރެސް، ބީޑަބްލިއު ބިޒްނަސް ވޯލްޑް، އެންޑީޓީވީ ފުޑް، އަދި ޓްރެވަލް ޑައިންގެ މެންބަރުން ހިމެނެއެވެ. މި ދަތުރުގެ ތެރެއިންނާއި ދަތުރަށްފަހު ދަތުރުގެ ބައިވެރިން ރާއްޖެއާބެހޭ ފޮޓޯ ސޯޝަލް މީޑިއާ އަދި ޕަބްލިކޭޝަންތަކުގައި ޝާއިޢުކުރާނެއެވެ.
މި ދަތުރާ ގުޅިގެން ޝާއިޢުކުރާ ލިޔުންތައް އިންޑިއާ މާކެޓުގެ ގިނަ ބަޔަކަށް ފޯރާނެކަމަށް އެމްއެމްޕީއާރުސީން ވިދާޅުވެއެވެ. މީގެ އިތުރުން، ރާއްޖޭގެ އެންމެފަހުގެ ޓްރެވަލް ގައިޑްލައިންތަކާއި، ރާއްޖެއިން ކުރެވެންހުރި ތަފާތު ތަޖުރިބާތަކުގެ މައުލޫމާތު ޒިޔާރަތްކުރި ޓީމުގެ މެމްބަރުންނާ ޑެސްޓިނޭޝަން ޕްރެޒެންޓޭޝަނަކުން ވަނީ ހިއްސާކޮށްފައެވެ.
މި ދަތުރުގެ ބޭނުމަކީ އިންޑިއާއިން ރާއްޖެއަށް ދަތުރުކުރަން ބޭނުންވާ ފަރާތްތަކުގެ މެދުގައި ރާއްޖެ އިތުރަށް ޕްރޮމޯޓް ކުރުމެވެ. ހާއްސަކޮށް ރާއްޖެއިން ފަތުރުވެރިންނަށް ލިބޭ ރައްކާތެރިކަމުގެ މައްޗަށް އަލިއަޅުވާލުމާއި މަންޒިލްގެ އެކި ފަތުރުވެރިކަމުގެ ސެގްމަންޓްތައް ޕްރޮމޯޓުކުރުން ހިމެނެއެވެ. މި ދަތުރަކީ އިންޑިއާގެ މާކެޓަށް އެމްއެމްޕީއާރުސީން އެކުލަވާލާފައިވާ މާކެޓިން ސްޓްރެޓެޖީގެ ދަށުން، މަންޒިލްގެ އެންމެ ފަހުގެ މައުލޫމާތާއި ގައިޑްލައިންތައް އިންޑިއާ މާކެޓުގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި، ފަތުރުވެރިންނަށް ހިއްސާކުރުމަށް ރާވާފައިވާ ދަތުރެކެވެ.
މި ދަތުރުގެ ސަބަބުން އިންޑިއާއިން ރާއްޖެއަށް އަންނަ މީހުންގެ އަދަދު އިތުރުވެ، ބުކިންތައް އިތުރުވާނެ ކަމަށް އެމްއެމްޕީއާރުސީން ލަފާކުރެއެވެ. މި އަހަރުގެ ކުރިއަށްއޮތް ތަނުގައިވެސް އިންޑިއާ މާކެޓަށް އަމާޒުކޮށް ރާއްޖެ އިސްތިހާރުކުރުމުގެ އިތުރު ބައެއް ހަރަކާތްތައް ކުރިއަށް ގެންދިއުމަށް އެމްއެމްޕީއާރުސީން ވަނީ ރާވާފައެވެ.
މި މަހުގެ 8ވަނަ ދުވަހާއި ހަމައަށް ބަލާއިރު، އިންޑިއާއަކީ ރާއްޖެއަށް އެންމެ ގިނައިން ފަތުރުވެރިން ދަތުރުކުރި މާކެޓެވެ. މިގޮތުން މި މުއްދަތުގައި އިންޑިއާއިން ރާއްޖެއަށް 104،800 ފަތުރުވެރިން ޒިޔާރަތްކޮށްފައިވެއެވެ. މިއީ މި މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ %14.3 އެވެ. އިންޑިއާ އަކީ މިދިޔަ އަހަރުވެސް ރާއްޖެއަށް އެންމެ ގިނައިން ފަތުރުވެރިން އައި ޤައުމެވެ. މިދިޔަ އަހަރު އެ ޤައުމުން ރާއްޖެއަށް 278،740 ފަތުރުވެރިން ވަނީ އައިސްފައެވެ.