މިއަހަރުގެ މިހާތަނަށް ރާއްޖެއަށް 838225 ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން ކޮންމެ ހަފްތާއަކު 1 ފަހަރު އާންމުކުރާ "މޯލްޑިވްސް ޓޫރިޒަމް އަޕްޑޭޓްސް" ރިޕޯޓުން ދައްކާގޮތުން މިދިޔަ އަހަރުގެ މިމުއްދަތާއި އަޅާބަލާއިރު ރާއްޖޭގެ ފަތުރުވެރިކަމަށް ވަނީ %59.3ގެ ކުރިއެރުމެއް ލިބިފައެވެ. މިއަހަރުގެ ޖުލައި 6 ވަނަ ދުވަހާއި ހަމައަށް ރާއްޖެ އައިސްފައިވަނީ 838،225 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތުގައި ރާއްޖެ އައިސްފައިވާ 526،080 ފަތުރުވެރިންނާއި އަޅާބަލާއިރު އިތުރު އަދަދެކެވެ.
މިއަހަރުގެ ކޮންމެ މަހެއްގައިވެސް ރާއްޖެއަށް 1 ލައްކައަށްވުރެ ގިނަ ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. އެގޮތުން އެންމެ ގިނަ ފަތުރުވެރިން ރާއްޖެ އައިސްފައިވަނީ މާރޗް މަހުގައެވެ. އެމަހު އެކަނިވެސް ރާއްޖެއަށް 150،748 ފަތުރުވެރިން ވަނީ އައިސްފައެވެ. މިމަހުގެ ފުރަތަމަ 6 ދުވަހުވެސް ރާއްޖެއަށް ވަނީ 25014 ފަތުރުވެރިން ޒިޔާރަތްކޮށްފައެވެ.
އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. އެގައުމުން ރާއްޖެއަށް 123،687 ފަތުރުވެރިން އައިސްފައިވެއެވެ. އެއީ ރާއްޖެއައި ފަތުރުވެރިންގެ %14.8 އެވެ. 2 ވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިނގިރޭސިވިލާތުންނެވެ. އެއީ 98،621 ފަތުރުވެރިންނެވެ. 3 ވަނައިގައި އުޅެނީ ރަޝިއާއެވެ. އެއީ 84،570 ފަތުރުވެރިންނެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ފަތުރުވެރިންނަށް ހިދުމަތްދޭ 1156 ތަނެއް ދަނީ ރާއްޖޭގައި ހިންގަމުންނެވެ. މިއީ 57487 އެނދެވެ. މީގެތެރޭގައި ރިސޯޓް، ހޮޓެލް، ގެސްޓްހައުސް އަދި ސަފާރީތައް ހިމެނެއެވެ.