މޯލްޑިވްސް ބޯޑަރ މައިލްސް ޕްރޮގްރާމްގައި މިހާތަނަށް 30 އަށްވުރެ ގިނަ ޕާޓްނަރުން ބައިވެރިވެއްޖެއެވެ. މޯލްޑިވްސް ބޯޑަރ މައިލްސް ޕްރޮގްރާމް ފަށާފައިވަނީ މިދިޔަ އަހަރުގެ ޖަނަވަރީ މަހުގެ ތެރޭގައެވެ.
މޯލްޑިވްސް ބޯޑަރ މައިލްސް ޕްރޮގްރާމަކީ ކޯވިޑް-19ގެ ބަލިމަޑުކަމާއެކު ދިވެހިރާއްޖޭގެ ބޯޑަރު ބަންދުކުރުމާގުޅިގެން، ފަތުރުވެރިން ރާއްޖެއައުން ހުއްޓި، ޤައުމުގެ އިޤްތިޞާދަށްއައި ހީނަރުކަމުން އަރައިގަނެ، ރާއްޖޭގެ ފަތުރުވެރިކަން އައު ހަރުފަތަކަށް ގެންގޮސް، އިތުރަށް ކުރިއެރުވުމަށްޓަކައި މޯލްޑިވްސް އިމިގްރޭޝަނުން އިސްނަގައިގެން ތަޢާރަފުކުރި ޕްރޮގްރާމެކެވެ. މިއީ ދުނިޔޭގައިވެސް މިފަދަ ޕްރޮގްރާމެއް ފެށި ފުރަތަމަ ފަހަރެވެ.
ބޯޑަރ މައިލްސް ޕްރިގްރާމްގައި މިހާތަނަށް 30 އަށްވުރެ ގިނަ ފަރާތުން ޕާޓްނަރުންގެ ގޮތުގައި ވަނީ ބައިވެރިވެފައެވެ. އޭގެތެރޭގައި ރިސޯޓްތަކާއި، ގެސްޓް ހައުސްތަކާއި، ހޮޓެލްތަކާއި، އެކްސްކާޝަންގެ ޙިދުމަތް ފޯރުކޮށްދޭ ފަރާތްތަކާއި، ރެސްޓޯރަންޓްތައްވެސް ހިމެނެއެވެ. ބޯޑަރ މައިލްސްގައި ބައިވެރިވާ ފަރާތްތަކަށް މި ޕްރޮގްރާމްގެ ޕާޓްނަރުންގެ ގޮތުގައި ބައިވެރިވެފައިވާ ތަންތަނުން ޙާއްސަ އޮފަރތައް ލިބިގެންދާނެއެވެ.
ބޯޑަރ މައިލްސް ޕްރޮގްރާމުގައި މިހާތަނަށް ބައި މިލިއަން ފަތުރުވެރިން ވަނީ ބައިވެރިވެފައެވެ. މިއީ މި ޕްރޮގްރާމަށް ލިބުނު ވަރަށް ބޮޑު ކުރިއެރުމެއްކަމަށް މޯލްޑިވްސް ބޯޑަރ މައިލްސްއިން ވަނީ ފާހަގަކޮށްފައެވެ.
މި ޕްރޮގްރާމުގެ ބައިވެރިންނަށް ލިބޭ ޚާއްސަ ފައިދާތައް ބެހިގެންވަނީ 3 ދަރަޖައަކަށެވެ. އެއީ ބްރޮންޒް، ސިލްވަރ އަދި ގޯލްޑްއެވެ. ބޯޑަރ މައިލްސްއަށް ފަތުރުވެރިން ޝައުޤުވެރިކުރުވުމަށްޓަކައި މޯލްޑިވްސް އިމިގްރޭޝަނުން އަންނަނީ ޚާއްސަ އޮފަރތައް ތަޢާރަފްކުރަމުންނެވެ. އެގޮތުން ބޯޑަރ މައިލްސްގެ އެންމެ މަތީ ދަރަޖައަށް ވާސިލްވުމުން، މާމަހި އެގްޒެކެޓިވް ލައުންޖުން ވީއައިޕީގެ ޚިދުމަތް ހިލޭ ލިބޭނެ އިންތިޒާމް ވަނީ ހަމަޖައްސާފައެވެ.
ދުނިޔޭގެ އެންމެބޮޑު ޓްރެވެލް ޕްލެޓްފޯމް ކަމަށްވާ އަގޯޑާއާއެކު އެސޯސިއޭޓް ޕާޓްނާޝިޕެއްގައި ބޯޑަރ މައިލްސްއިން ވަނީ ސޮއިކޮށްފައެވެ. މި އެއްބަސްވުމުގެ ދަށުން މި ޕްރޮގްރާމް ތަރައްޤީކުރުމަށް ފަންނީ އެހީތެރިކަން އެކުންފުނިން ފޯރުކޮށްދޭނެއެވެ. އަދި އަގޯޑާ މެދުވެރިކޮށް ބުކިން ހަދާ ފަރާތްތަކަށް ބޯޑަރ މައިލްސް ޕްރޮގްރާމުގައި ޕޮއިންޓް ހޯދުމުގެ ފުރުޞަތުވެސް އޮންނާނެއެވެ.