މިއަހަރުގެ މިހާތަނަށް ރާއްޖެއަށް 9 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. ޓޫރިޒަމް މިނިސްޓްރީގެ އެންމެފަހުގެ ތަފާސްހިސާބުތައް ދައްކާގޮތުން، ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރަނީ އަވައްޓެރި އިންޑިއާއިންނެވެ.
މިއަހަރުގެ ޖެނުއަރީމަހުން ފެށިގެން މިމަހުގެ 20 ވަނަ ދުވަހުގެ ނިޔަލަށް ރާއްޖެއަށް ޖުމްލަ 900808 (ނުވަ ލައްކަ އަށްސަތޭކަ އަށް) ފަތުރުވެރިން ވަނީ ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %57.5 ކުރިއެރުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ 572123 (ފަސް ލައްކަ ހަތްދިހަ ދެ ހާސް އެއް ސަތޭކަ ތޭވީސް) ފަތުރުވެރިންނެވެ. މިއަހަރުގެ މި މުއްދަތުގެ ތެރޭގައި އެވެރެޖްކޮށް ދުވާލަކު 4482 ފަތުރުވެރިން ރާއްޖެ އައިސްފައިވެއެވެ. އަދި ފަތުރުވެރިން ރާއްޖޭގައި އެވަރެޖްކޮށް 8 ދުވަސް ހޭދަކޮށްފައިވެއެވެ.
މިއަހަރުގެ ފުރަތަމަ 6 މަސް ތެރޭގައި އެންމެ ގިނައިން ފަތުރުވެރިން އައިސްފައިވަނީ މާރިޗުމަހުގެ ތެރޭގައެވެ. އެމަހު އެކަނިވެސް ރާއްޖެއަށް 150748 (އެއް ލައްކަ ފަންސާސް ހާސް ހަތް ސަތޭކަ ސާޅިސް އަށް) ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މާރިޗުމަހާ އަޅާބަލާއިރު %37.6 އިތުރުވުމެކެވެ.
ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކަށްބަލާއިރު، އެންމެ ކުރީގައި އުޅެނީ އަވަށްޓެރި އިންޑިއާއެވެ. ދެވަނައިގައި އިނގިރޭސިވިލާތް އޮތްއިރު، 3 ވަނަ މާކެޓެއްގެ ގޮތުގައި އޮތީ ރަޝިއާއެވެ. ޓޫރިޒަމް މިނިސްޓްރީން އާއްމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް އިންޑިއާއިން އެކަނިވެސް 132151 (އެއް ލައްކަ ތިރީސް ދެ ހާސް އެއް ސަތޭކަ ފަންސާސް އެއް) ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އެއީ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ %14.7 އެވެ.
މުޅި ދުނިޔެއަށް ކުރިމަތިވި ކޯވިޑް-19ގެ ކުރިން ރާއްޖެއަށް އެންމެ ގިނައިން ފަތުރުވެރިން އަންނަ ޤައުމަކީ ޗައިނާއެވެ. ނަމަވެސް ކޯވިޑަށްފަހު ޗައިނާ މާކެޓް އެއްކޮށްހެން އޮތީ ހުއްޓިފައެވެ. އިނގިރޭސިވިލާތުން މިހާތަނަށް 104667 (އެއް ލައްކަ ހަތަރު ހާސް ހަ ސަތޭކަ ފަސްދޮޅަސް ހަތް) ފަތުރުވެރިން އައިސްފައިވާއިރު، 3 ވަނައިގައި އޮތް ރަޝިއާއިން ރާއްޖެ އައިސްފައިވަނީ 94151 (ނުވަދިހަ ހަތަރު ހާސް އެއް ސަތޭކަ ފަންސާސް އެއް) ފަތުރުވެރިންނެވެ.
ކޯވިޑުގެ ޙާލަތަށްފަހު ރާއްޖޭގެ ބޯޑަރުތައް އަލުން ހުޅުވާލިފަހުން، ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 މާކެޓުގެ ގޮތުގައި ބައެއް އައު މާކެޓްތައްވެސް ވަނީ ހިމެނިފައެވެ. އޭގެ ތެރޭގައި އެމެރިކާ، ސުވިޓްޒަލޭންޑް، ސަޢުދީ ޢަރަބިއްޔާ އަދި ސްޕެއިން ހިމެނެއެވެ.
މިއަހަރުގެ މިހާތަނަށް ފަތުރުވެރިކަމުގެ ޚިދުމަތް ދޭ ޖުމްލަ 1167 ތަނެއް އޮޕަރޭޓްކުރަމުންދާކަމަށް ޓޫރިޒަމް މިނިސްޓްރީން ވަނީ ހާމަކުރައްވާފައެވެ. އޭގެ ތެރޭގައި 163 ރިސޯޓާއި، ހޮޓާ ގެސްޓްހައުސްގެގޮތުގައި ހިމެނޭ 849 ތަނެއްގެ އިތުރުން 155 ސަފާރީ އުޅަނދު ހިމެނެއެވެ. އަދި 25 އެއަރލައިނަކުން ރާއްޖެއަށް އަންނަނީ ދަތުރުތައް ބާއްވަމުންނެވެ.