ވަޒީރު ރާފިއު، އައިސީވައިއެފްގެ ރައީސްއާ ބައްދަލުކުރައްވައިފި

އިސްލާމިކް ކޯޕަރޭޝަން ޔޫތު ފޯރަމްގެ ރައީސް ތަހާ އައިހާންއާ ޒުވާނުން ބާރުވެރިކުރުމާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ބައްދަލުކުރައްވައިފިއެވެ.

ޒުވާނުން ބާރުވެރިކަމާ ބެހޭ ވުޒާރާއިން ވިދާޅުވީ، ވަޒީރުގެ ބައްދަލުވުމުގައި، ރާއްޖޭގައި ޒުވާނުންގެ ފޯރަމުތަކާއި، ރާއްޖޭގައި ބޭއްވެން ހުރި ޒުވާނުންނާ ގުޅޭ ޕްރޮގްރާމްތަކާއި ގުޅޭ ގޮތުން އަލި އަޅުވައިލެއްވި ކަމަށެވެ.

މީގެ އިތުރުން އައިސީވައިއެފްއާ ގުޅިގެން ރާއްޖޭގެ ޒުވާނުންނަށް ހުރި ފުރުސަތުތަކާއި ގުޅޭ ގޮތުން ވެސް މަޝްވަރާ ކުރެވުނު ކަމަށް ޒުވާނުންނާ ބެހޭ ވުޒާރާއިން މައުލޫމާތު ދީފައިވެއެވެ.

މި ބައްދަލުވުމުގައި އައިސީވައިއެފް އިން ވަނީ ރާއްޖޭގައި އެ ޖަމިއްޔާއާ ގުޅިގެން ބޭއްވެންހުރި ޒުވާނުންނާ ގުޅޭ ފޯރަމުތަކަށް އެއްބާރުލުން ދެއްވާނެ ކަމަށް ވިދާޅުވެފައެވެ.

މީގެ އިތުރުން އައިސީވައިއެފްގެ ރައީސް ތާހާ ވަނީ އެ ޖަމިއްޔާގެ މައިގަނޑު އަމާޒަކީ ޒުވާނުން ބާރުވެރިކޮށް ޒުވާނުންނަށް އިތުރު ފުރުސަތުތައް ފަހި ކޮށްދިނުން ކަމަށް ވިދާޅުވެފައެވެ.