ޔޫއޭއީގެ ބަޖެޓް އެއަރލައިން "ވިޒް އެއަރ"ގެ ދަތުރުތައް އަންނަ ނޮވެމްބަރ މަހު ރާއްޖެއަށް ފެށުމަށް ހަމަޖެހިއްޖެއެވެ. މިއީ ދާދިފަހުން ޚިދުމަތްދޭން ފަށާފައިވާ އެއަރލައިންއެކެވެ.
ވިޒް އެއަރއިން މިއަހަރުގެ ފިނި މޫސުމާއި ދިމާކޮށް 2 މަންޒިލަކަށް މުޅިން އަލަށް ދަތުރު ފެށުމަށް ވަނީ ނިންމާފައެވެ. އެއީ ކުވައިތާއި ރާއްޖެއެވެ. ކުވައިތަށް ދަތުރުތައް ފަށާނީ އޮކްޓޯބަރ 30 ގައެވެ. އަދި ރާއްޖެއަށް ދަތުރު ފެށުމަށް ހަމަޖެހިފައިވަނީ އޮކްޓޯބަރ 4 ގައެވެ.
ވިޒް އެއަރގެ ދަތުރުތައް ރާއްޖެއަށް ފެށުމުން ރާއްޖެ ވެގެންދާނީ އެ އެއަރލައިނުން ސައުތު އޭޝިއާގައި ދަތުރު ފަށާ 2 ވަނަ މަންޒިލަށެވެ. މީގެކުރިން އެ އެއަރލައިނުން ވަނީ ސްރީލަންކާގެ މައްތަލައަށް ދަތުރުފަށާފައެވެ. ނަމަވެސް ލަންކައަށް ކުރަމުންދިޔަ ދަތުރުތައް އެ ޤައުމަށް ދިމާވެފައިވާ ތެލުގެ ދަތިކަމާއި ގުޅިގެން މާ ކާމިޔާބު ވާގޮތްވަނީ ނުވެފައެވެ.
ވިޒް އެއަރއިން އޮކްޓޯބަރ މަހު ރާއްޖެއަށް ދަތުރު ފަށާއިރު ހަފްތާއަކު 4 ދަތުރު ކުރާނެއެވެ. އެއީ އަންގާރަ، ބުރާސްފަތި، ހޮނިހިރު އަދި އާދިއްތަ ދުވަހެވެ.
ރާއްޖެ އަދި ކުވައިތަށް ވިޒް އެއަރލައިންގެ ދަތުރުތައް ފެށުމުން އެ އެއަރލައިނުން ދަތުރުކުރަމުން އަންނަ މަންޒިލްތަކުގެ އަދަދު 34އަށް އިތުރުވެގެންދާނެއެވެ. ރާއްޖެ އައި ކުވައިތަށް ދަތުރުކުރާނީ އެ އެއަރލައިނުން އެންމެ ފަހުން ގަނެފައިވާ އެއަރބަސް އޭ321 ނިއޯ އެއަރކްރާފްޓެވެ. ވިޒް އެއަރލައިންގެ ދަތުރުތައް ފަށާފައިވަނީ 2021ވަނަ އަހަރުގެ ޖަނަވަރީ މަހުގައެވެ.