މިއަހަރުގެ ދެ ވަނަ ކުއާޓަރުގައި އެމްޓީސީސީއަށް 593 މިލިއަން ރުފިޔާގެ އާމްދަނީއެއް ލިބިއްޖެއެވެ.
މިއީ މި އަހަރުގެ ފުރަތަމަ ކުއާޓަރުގައި އެމްޓީސީސީއަށް އާމްދަނީގެ ގޮތުގައި ލިބުނު 550 މިލިއަން ރުފިޔާއާއި އަޅާބަލާއިރު، 7.7 އިންސައްތަ އިތުރު އަދަދެކެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީން އާއްމުކޮށްފައިވާ އެކުންފުނީގެ މިއަހަރުގެ ދެވަނަ ކުއާޓަރުގެ މާލީ ހިސާބުތައް ދައްކާގޮތުން އެ ކުއާޓަރުގައި ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި، 77.78 މިލިއަން ރުފިޔާ ލިބިފައިވެއެވެ. މިއީ މިއަހަރުގެ ފުރަތަމަ ކުއާޓަރާއި އަޅާ ބަލާއިރު 3.28 އިންސައްތަ އިތުރު އަދަދެކެވެ. މިއަހަރުގެ ފުރަތަމަ ކުއާޓަރުގައި އެމްޓީސީސީއަށް ފައިދާގެ ގޮތުގައި ލިބިފައިވަނީ 75.31 މިލިއަން ރުފިޔާއެވެ.
އެމްޓީސީސީއިން މަޝްެރޫޢުތައް ހިންގުމަށް ބޭނުންވާ ތަކެތި ގަތުމަށް ކުރަންޖެހޭ ހޭދަވަނީ ބޮޑުވެފައެވެ. ސަބަބަކީ ދުނިޔޭގެ ބާޒާރުގައި ތެލުގެ އަގާއި، ތަކެތީގެ އަގުތައް އުފުލިފައިވުން ކަމަށް އެކުންފުނިން ހާމަކުރެއެވެ.
އެމްޓީސީސީގެ ވަކި ވަކި ސެގްމަންޓުތަކުގެ އާމްދަނީއަށް ބަލާއިރު، އަހަރުގެ ދެވަނަ ކުއާޓަރުގައި އެންމެ ބޮޑު އާމްދަނީއެއް ލިބިފައިވަނީ ބިންހިއްކުމުގެ މަސައްކަތުންނެވެެ. އަދި ދެވަނަ އަށް އެންމެ ބޮޑު އާމްދަނީއެއް އެމްޓީސީސީއަށް ލިބިފައިވަނީ ޓްރޭޑިން ސެގްމަންޓުންނެވެ.
މި އަހަރުގެ ދެވަނަ ކުއާޓާރުގައި ޢުމްރާނީ ތަރައްޤީގެ ގިނަ މަޝްރޫއުތަކެއް ކާމިޔާބުކަމާއެކު އެމްޓީސީސީން ވަނީ ހިންގާފައެވެ. އެގޮތުން 115 މަޝްރޫއެއްގައި މަސައްކަތްކުރެވި، 10 މަޝްރޫއެއްގެ މަސައްކަތް ވަނީ ކަމިޔާބުކަމާއެކު ނިންމާލެވިފައެވެ. އަދި 12 ޕްރޮޖެކްޓެއްގެ މަސައްކަތް އެ ކުއަރޓާގައި ފަށާފައިވާކަމަށް އެމްޓީސީސީން ބުނެއެވެ.
ދެވަނަ ކުއާޓަރގެ މާލީ ހިސާބުތަކާއި އެކު، އަހަރުގެ ފުރަތަމަ 6 މަސްދުވަހުގެ ހިސާބުތައް ހާމަވެގެންގޮސްފައިވާއިރު، ފުރަތަމަ 6 މަސްދުވަސްތެރޭ އާމްދަނީގެ ގޮތުގައި އެމްޓީސީސީއަށް 1.4 ބިލިއަން ރުފިޔާވަނީ ލިބިފައެވެ.
އަދި ޓެކުހަށް ކެނޑުމުގެ ކުރިން ސާފް ފައިދާގެ ގޮތުގައި 153 މިލިއަން ރުފިޔާ ވަނީ ލިބިފައެވެ. މި ހިސާބުތަކާއި އެކު އަހަރަށް ކުރިއަށް ރާވާފައި މަޝްރޫޢުތަކާއި އެކު، މި އަހަރު ނިމޭއިރު، އެކުންފުންޏަށް އާމްދަނީގެ ގޮތުގައި 2.2 ބިލިއަން ރުފިޔާ ލިބޭނެ ކަމަށްވަނީ ލަފާކޮށްފައެވެ. އަދި ޓެކުހަށް ކެނޑުމުގެ ކުރިން ސާފް ފައިދާގެ ގޮތުގައި 300 މިލިއަން ރުފިޔާ ލިބޭނެ ކަމަށްވެސް ވަނީ ލަފާކޮށްފައެވެ.
އެމްޓީސީސީން ވަނީ މިދިޔަ އަހަރުތެރޭ ރެކޯޑު އަދަދެއްގެ ފައިދާއެއް ހޯދާފައެވެ. އެގޮތުން މިދިޔަ އަހަރު ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 271.82 މިލިއަން ރުފިޔާ ވަނީ އެމްޓީސީސީއަށް ލިބިފައެވެ. މިއީ 2020ވަނަ އަހަރު ލިބުނު ފައިދާއަށްވުރެ %21 އިތުރު އަދަދެއްކަމަށް އެ ކުންފުނީގެ ތަފާސް ހިސާބުތަކުން ދައްކައެވެ.