ފަހަތުން އަރާ ލިވަޕޫލްއިން ވިޔަރެއާލް ބަލިކޮށްފި

ޔޫއެފާ ޗެމްޕިއަންސް ލީގުގައި ރޭ ވިޔަރެއާލް އާއި ދެކޮޅަށް ލިވަޕޫލް ކުޅުނު މެޗު ފަހަތުން އަރާ 4-3 ގެ ނަތީޖާއަކުން ލިވަޕޫލް މޮޅުވެއްޖެއެވެ.

މި މެޗުން ލިވަޕޫލް މޮޅުވުމާއިއެކު އެ ޓީމަށް ވަނީ މި ސީޒަނުގައި ޗެމްޕިއަންސް ލީގުގައި ކުޅުނު 3 މެޗުންވެސް މޮޅުވެ 9 ޕޮއިންޓް ލިބިފައެވެ. ތާވަލުގެ އެއްވަނައިގައި އޮތް ޕީއެސްޖީއަށްވެސް 9 ޕޮއިންޓް ލިބިފައިވާއިރު ލިވަޕޫލްއަށް ދެވަނަ ލިބިފައިވަނި ފައިދާ ގޯލުގެ ތަފާތުންނެވެ.

ލިވަޕޫލްގެ އެންފީލްޑްގައި 59 ހާހަށްވުރެ ގިނަމީހުންގެ ކުރިމަތީގައި ކުޅުނު މި މެޗުގެ 4 ވަނަ މިނިޓުގައި ވިޔަރެއާލް އިން ވަނީ ލަނޑެއް ޖަހާ ކުރި ހޯދާފައެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ލިވަޕޫލްގެ ކެޕްޓަން ވެންޑައިކަށް ހެދުނު ގޯހެއްގެ ފައިދާ ނަގާ ޖިއޯޖެސް މިކައުޓަޑްޒޭ އެވެ.

އަދި މެޗުގެ 29 ވަނަ މިނިޓުގައި ވިޔަރެއާލްގެ ސާޖީ ކާޑޯނާ ވަނީ އިތުރު ލަނޑެއް ޖަހާ ދެ ޓީމުގެ ދެމެޗުގައިވާ ފަރަގު ބޮޑުކޮށްފައެވެ. މި ލަނޑާއެކު މި މެޗު ބަލަން ދިޔަ ވިޔަރެއާލްގެ 700 އެއްހާ ސަޕޯޓަރުންގެ އަޑުވަނީ ވަރަށް ބޮޑަށް ގަދަވެފައެވެ.

ނަމަވެސް އެންޑޮނީ އިރައޯލާގެ އިރުޝާދުގެ ދަށުން ކުޅެމުންދިޔަ ލިވަޕޫލްއިން ލަނޑެއް ޖެހުމަށް ކުރަމުންދިޔަ މަސައްކަތަށް ނިމުމެއް އައިސްފައިވަނީ މެޗުގެ 36 ވަނަ މިނިޓުގައެވެ. ކޮސްޓަސް ސިމިކަސް ނަގައިދިން ކޯނަރަކުން ބޮލުންޖަހާ މި ލަނޑު ލިވަޕޫލަށް ކާމިޔާބުކޮށްދީފައިވަނީ އެލެކްސިސް މެކަލިސްޓާ އެވެ.

ލިވަޕޫލް އިން މެޗުގެ ނަތީޖާ އެއްވަރުކޮށްފައިވަނީ މެޗުގެ ފުރަތަމަ ހާފުގެ އިންޖަރީ ވަގުތުގައި ރޮނަލްޑް އަރައުހޯ ކާމިޔާބުކޮށްދިން ލަނޑުންނެވެ.

މި މެޗުގައި ލިވަޕޫލް އިން ފުރަތަމަ ފަހަރަށް ކުރި ހޯދާފައިވަނީ މެޗުގެ 65 ވަނަ މިނިޓުގައި މެކަލިސްޓާ ކާމިޔާބުކޮށްދިން ލަނޑުންނެވެ. އަދި އޭގެ ތިން މިނިޓު ފަހުން ފްލޯރިއަން ވާޓްޒް ވަނީ އިތުރު ލަނޑެއް ޖަހާ މެޗުގެ ނަތީޖާ 4-2 އަށް ބަދަލުކޮށްފައެވެ.

ވިޔަރެއާލް އިން މި މެޗުގައި ޖެހި ތިންވަނަ ލަނޑަކީ މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައިވަނިކޮށް ޓެނީ އޮލުވަސޭޔީ ކާމިޔާބުކޮށްދީފައިވާ ލަނޑެކެވެ.