އޮތެންޓިކް މޯލްޑިވްސްގެ ފިހާރަތަކުގައި ތަކެތި ސަޕްލައިކުރާ ފަރާތްތަކަށް މިހާތަނަށް 30 މިލިއަން ރުފިޔާ ދޫކޮށްފައިވާކަމަށް އިކޮނިމިކް މިނިސްޓްރީން ވިދާޅުވެއްޖެއެވެ.
ބިޒްނަސް ސެންޓަރ ކޯޕަރޭޝަންގެ ދަށުން ހިންގާ އޮތެންޓިކް މޯލްޑިވްސް ފިހާރައަކީ ދިވެހި އުފެއްދުންތަކަށް މާކެޓް ހޯދައިދިނުމަށް އެ ކުންފުނިން ހިންގާ ފިހާރައެކެވެ. އޮތެންޓިކް މޯލްޑިވްސްއިން މިހާރު އަންނަނީ 4 ފިރާހައެއް ހިންގަމުންނެވެ. އެއީ ވެލާނާ އިންޓަނޭޝަނަލް އެއަރޕޯޓްގެ ޑިއުޓީ ފްރީގައި ހުންނަ ފިހާރައާއި، ހުޅުމާލޭ ސެންޓްރޯ މޯލްއާއި މާލެއާއި ކުޑަވިނލިގިލީގެ އިތުރުން ދާދި ފަހުން އެ ކުންފުނިން ކްރޮސްރޯޑްގައި ހުޅުވި ފިހާރައެވެ.
އޮތެންޓިކް މޯލްޑިވްސްގެ ފިހާރަތަކުގައި މިހާރު 180 އަށްވުރެ ގިނަ ސަޕްލަޔަރުން ތަކެތި ވިއްކަމުންނެވެ. އިކޮނޮމިކް މިނިސްޓްރީން ވިދާޅުވީ، މި ސަޕްލަޔަރުންނަށް މިހާތަނަށް 30 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށެވެ.
ބީ.ސީ.ސީއަކީ ރާއްޖޭގައި ހިންގާ ކުދި އަދި މެދުފަންތީގެ ވިޔަފާރިތައް ކުރިއަރުވައި ވިޔަފާރިތަކަށް ބޭނުންވާ އެހީތެރިކަން ފޯރުކޮށްދިނުމަށް ސަރުކާރުން އުފައްދާފައިވާ ކުންފުންޏެކެވެ. އެ ކުންފުނިން ދަނީ ވިޔަފާރި ފަށަން ބޭނުންވާ ފަރާތްތަކަށް ކޮންސަލްޓެންސީ ދިނުމާއި އެހީތެރިވެ ދިނުމުގެ މަސައްކަތް ހިލޭ ފޯރުކޮށްދެމުންނެވެ.
ބީސީސީއިން އަންނަނީ އަތޮޅުތަކުގެ އެކި ސަރަހައްދުތަކުގައި ބީސީސީގެ ގޮފިތައް ހިންގައި މި ގޮފިތައް މެދުވެރިކޮށް ވިޔަފާރިތަކަށް އެހީތެރިކަން ފޯރުކޮށްދެމުންނެވެ. އެގޮތުން އަތޮޅުތަކުގެ 6 ސަރަހައްދެއްގައި އަންނަނީ ބީސީސީގެ ގޮފިތައް ހިންގަމުންނެވެ. އެއީ ސ.ހިތަދޫ، ޏ.ފުވައްމުލައް، ގދ.ތިނަދޫ، ގއ.ވިލިނގިލި، ލ.ގަން އަދި ދ.ކުޑަހުވަދޫއެވެ.