ދިވެހިރާއްޖޭގެ ކަނޑުގެ ސަރަހައްދުގައި މަސްވެރިކަން ކުރި ބޭރުގެ 2 މަސްވެރި އުޅަނދެއްގެ މައްސަލަ ފިޝަރީޒް މިނިސްޓްރީގެ ފަރާތުން ބެލުމަށްފަހު އުޅަނދު ޖޫރިމަނާކޮށްފިއެވެ.
މަސްވެރިކަމުގެ ޤާނޫނުގެ ދަށުން އުޅަނދުތަކުގެ ވެރިފަރާތަށް އިދާރީ ފިޔަވަޅުގެ ގޮތުގައި ކަނޑައެޅި ޖޫރިމަނާ ފައިސާ ދެއްކުމުން އެ އުޅަނދުތައް ފުރައިގެން ދިއުމުގެ ހުއްދަ މިހާރު ދީފައިވާކަމަށް ފިޝަރީޒް މިނިސްޓްރީން ވިދާޅުވެއެވެ.
އެމްއެންޑީއެފް ކޯސްޓްގާޑުން މި 2 އުޅަނދު އަތުލައިގަތީ 13 އޯގަސްޓް 2022 ވަނަ ދުވަހުއެވެ. މި 2 އުޅަންދުވެސް ނިސްބަތްވަނީ ސްރީލަންކާއަށެވެ.
ފިޝަރީޒް މިނިސްޓްރީން ބުނީ މިތަނުން 1 އުޅަނދު ޖޫރިމަނާކޮށްފައިވަނީ 6 ލައްކަ ރުފިޔާއިންނެވެ. އެއީ ދިވެހިރާއްޖޭގެ ކަނޑުގެ ސަރަހައްދުން މަސްވެރިކަން ކޮށްފައިވާތީ ފަސްލައްކަ ރުފިޔާއާއި، ދިވެހިރާއްޖޭގެ ކަނޑުގެ ސަރަހައްދަށް މިނިސްޓްރީގެ ހުއްދަ ހޯދުމަކާއި ނުލައި ވަނުމުގެ ސަބަބުން އެއްލައްކަ ރުފިޔާއެވެ. މި އުޅަނދުގައި 3 ޓަނުގެ ކަނޑުމަހުގެ ބާވަތްތައް ހުރިކަމަށް މިނިސްޓްރީން ބުނެއެވެ.
2 ވަނަ އުޅަނދު ޖޫރިމަނާކޮށްފައިވަނީ އެއްލައްކަ ރުފިޔާއިންނެވެ. އެއީ ދިވެހިރާއްޖޭގެ ކަނޑުގެ ސަރަހައްދަށް މިނިސްޓްރީގެ ހުއްދަ ހޯދުމަކާއި ނުލައި ވަނުމުގެ ސަބަބުންނެވެ. މި އުޅަނދު އަތުލައިގަތް އިރު މި އުޅަނދުގައި މަހެއް ނެތްކަމަށް މިނިސްޓްރީން ބުނެއެވެ.
މަސްވެރިކަމުގެ ޤާނޫނުގެ ދަށުން އިދާރީ ފިޔަވަޅު އެޅުމުގެ ކުރިން އުޅަނދުގެ މާސްޓަރު އަދި ވެރިފަރާތަށް ޖަވާބުދާރީވުމުގެ ފުރުސަތު ދެވިފައިވާކަމަށް މިނިސްޓްރީން ވިދާޅުވެއެވެ. ވެރިފަރާތަށް ޖަވާބުދާރީވުމުގެ ފުރުސަތު ދިނުމަށް ވީޑިއޯ ކޮންފަރެންސް މެދުވެރިކޮށް އަޑުއެހުމެއް ބާއްވައިގެންނެވެ.
މަސްވެރިކަމުގެ ޤާނޫނުގެ 80 ވަނަ މާއްދާގައި ބަޔާންކޮށްފައިވާ ގޮތުގެ މަތިން އެ ޤާނޫނުގެ ދަށުން އަދަބު ކަނޑައެޅުމުގެ ކުރިން ތުހުމަތުކުރެވޭ ފަރާތަށް ޖަވާބު ދާރީވުމަށް އަޑުއެހުމެއް ބާއްވަން ޖެހެއެވެ.
މީގެކުރިންވެސް މަސްވެރިކަމުގެ ޤާނޫނާއި ޚިލާފުވެގެން ބޭރުގެ އުޅަނދުތަކަށް މިނިސްޓްރީން ވަނީ ޖޫރިމަނާކޮށްފައެވެ. އެގޮތުން ޖޫރިމަނާ ދެއްކި އުޅަނދުތައް ފުރައިގެން ދިއުމުގެ ހުއްދަ ދީފައިވާއިރު، ޖޫރިމަނާ ނުދައްކާ 4 އުޅަނދެއް ދައުލަތަށް ނެގުމުގެ މަސައްކަތް މިހާރުވެސް ކުރިއަށް އެބަދެއެވެ.