އަހަރުގެ މިހާތަނަށް އައު 3 ރިސޯޓު ހުޅުވައި މިރިސޯޓުތަކުން ފަތުރުވެރިކަމަށް އިތުރު 1166 އެނދު ނެރެފައިވާ ކަމަށް ޓޫރިޒަމް މިނިސްޓްރީން ހާމަކުރައްވައިފިއެވެ.
ޓޫރިޒަމް މިނިސްޓްރީން ލަފާކުރައްވާގޮތުގައި މިއަހަރު އައު 10 ރިސޯޓު ފަތުރުވެރިކަމަށް ނެރެވޭނެއެވެ.
ފަތުރުވެރިކަމަށް ދޫކޮށްފައިވާ ރަށްތަކުގެ މަސައްކަތްތައް ބާރުދުވެއްޔެއްގައި ކުރިއަށް ގެންގޮސް އަވަހަށް ހުޅުވުމަށް ސަރުކާރުން ދަނީ އިންވެސްޓަރުންނަށް ބޭނުންވާ އެހީތެރިކަން ފޯރުކޮށްދެއްވަމުންނެވެ.
އަހަރުގެ މިހާތަނަށް އަލަށް ހުޅުވާފައިވާ ރިސޯޓުތައް
- އަލީލާ ކޮތައިފަރު މޯލްޑިވްސް – 160 އެނދު
- އާނުގަނޑު އައިލެންޑު ރިސޯޓު – 768 އެނދު
- ހިލްޓަން އަމިންގިރި ރިސޯޓު އެންޑު ސްޕާ – 238 އެނދު
ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވީ، އައު ރިސޯޓުތައް ހުޅުވުމުގައި ދަތިތަކެއް ހުރިކަމަށް ރިސޯޓު ތަރައްޤީ ކުރާ ފަރާތްތަކުން ބުނެފައިވާ ކަމަށެވެ.
" ޗައިނާވެސް އަދިވެސް މުޅިން އަކުން ނުހުޅުވާ، މެޓީރިއަލް އެއްޗެހި ހޯދުމުގައި ޑިލޭތައް އުޅޭ ވާހަކަ ބައެއް ރިސޯޓުތަކުން ބުނަނީ،" މިނިސްޓަރ މަޢުސޫމް ވިދާޅުވިއެވެ.
މިނިސްޓަރ ވިދާޅުވީ އައު ރަށްތައްވެސް ރިސޯޓުތަަކަށް ހުޅުވާލުމަށް ކައުންސިލްތަކުން މިނިސްޓްރީގައި އެދެމުންދާ ކަމަށެވެ. އެހެންކަމުން އެކަމާއި ގުޅޭ މަސައްކަތްތައްވެސް ކުރަމުންދާ ކަމަށް މިނިސްޓަރ ވިދާޅުވިއެވެ.
" އައު ރަށްތަކެއް ދިނުމަށްވެސް ކައުންސިލްތަކުން އެދޭ،ނުހެނދި ހުރި އެއްޗެހި ބަހައްޓާށޭ، ގާވެފައިހުރި އެއްޗިއްސަށްވެދާނެއޭ، އާ އެއްޗެހި ދީގެން ކުރިއަށްގެންދާށޭ، މިހާރު އަޅުގަނޑުމެންގެ ޓީމު ދަތުރުކުރޭ މި ސަރަހައްދުންދޭން، ރަށްތައް ކުޑަކޮށް ސްޓަޑީކޮށްލަން، ރަށްތަކުގެ ލިސްޓެއް ހަދާފައި، އަލުން ބިޑަށްލާނީ،" މިނިސްޓަރ ވިދާޅުވިއެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާގޮތުން މިމަހުގެ 13ވަނަ ދުވަހުގެ ނިޔަލަށް ރާއްޖޭގައި 164 ރިސޯޓެއް އަންނަނީ އޮޕްރޭޓްކުރަމުންނެވެ. އެއީ 40053 އެނދެވެ. ރާއްޖޭގައި ހިނގުމަށް ޖުމްލަ 170 ރިސޯޓުވަނީ ރަޖިސްޓްރީކޮށްފައެވެ. މި އީ 41175 އެނދެވެ.