ސަޢުދީ ފަންޑުގެ އެހީގައި ތަރައްޤީކުރާ 5 އައިސްޕްލާންޓުގެ މަސައްކަތް ބަޔަކާ ޙަވާލުކުރުމުގެ މަސައްކަތް ކުރިއަށްދާ ކަމަށް ފިޝަރީޒް މިނިސްޓްރީން ވިދާޅުވެއްޖެއެވެ.
އެމިނިސްޓްރީން ވިދާޅުވީ، މި 5 އައިސްޕްލާންޓު ތަރައްޤީކުރާނެ ބަޔަކު ހޯދުމަށް، 2 ފަހަރެއްގެ މަތިން އިޢުލާންކުރުމުންވެސް އެކަށީގެންވާ މިންވަރަކަށް ތަރުހީބު ލިބިފައެއް ނުވެއެވެ.
އެހެންކަމުން މިހާރު މިނިސްޓްރީން ހޮވާލި ބަޔަކާއި އެކު މަޝްވަރާކޮށް، އެފަރާތްތަކުން މިމަހުގެ ސެޕްޓެމްބަރުމަހުގެ 18ވަނަ ދުވަހުގެ ކުރިން ބިޑު ހުށަހެޅުމުގެ ފުރުސަތު ދީފައިވާ ކަމަށެވެ.
ސައުދީ ފަންޑުގެ އެހީގައި އައިސްޕްލާންޓުތައް ތަރައްޤީކުރުމަށް ހަމަޖެހިފައިވަނީ، ހއ.ދިއްދޫ
އއ.ރަސްދޫ ، ދ.މީދޫ ،ލ.މާމެންދޫ އަދި ގދ.ރަތަފަންދޫގައެވެ. މި ރަށްތަކުގައި ތަރައްޤީކުރުމަށް ހަމަޖެހިފައިވަނީ 25 ޓަނުގެ އައިސްޕްލާންޓެވެ.
ފިޝަރީޒް މިނިސްޓްރީން ވިދާޅުވީ، ޝައުގުވެރިކަން ފާޅުކޮށްފައިވާ ކުންފުނިތަކުގެތެރޭގައި ސަރުކާރު ކުންފުނިތަކާއި އަމިއްލަ ކުންފުނިތައް ހިމެނޭ ކަމަށެވެ. އައިސްޕްލާންޓުތައް ތަރައްޤީކުރުމުގެ މަސައްކަތް އަންނަ މަހުގެތެރޭ ބަޔަކާއި ހަވާލުކުރެވޭނެ ކަމަށް ފިޝަރީޒް މިނިސްޓްރީން ލަފާކުރެއެވެ. މަސައްކަތް ޙަވާލުކުރާތާ 8 މަސްދުވަސްތެރޭ އައިސްޕްލާންޓުތައް ތަރައްޤީކުރުމުގެ މަސައްކަތް ނިންމަންޖެހެއެވެ.
މަސްވެރިންނަށް ފަސޭހަކަމާއެކު އައިސްލިބޭނެ އިންތިޒާމް ހަމަޖެއްސުމުގެ ގޮތުން ސަރުކާރުން އަންނަނީ ރާއްޖޭގެ އެކި ހިސާބުތަކުގައި އައިސްޕްލާންޓްތައް އެޅުމުގެ މަސައްކަތް ކުރަމުންނެވެ. އެގޮތުން މިދިޔަ އަހަރުގެ މަސްވެރިންގެ ދުވަހު އެކަނިވެސް ސަރުކާރުން ވަނީ 4 އައިސްޕްލާންޓެއް ހުޅުވާފައެވެ. އޭގެތެރޭގައި ހިމެނެނީ ރ.މަޑުއްވަރީ، ކ.ގާފަރު، ހއ.ހޯރަފުށި އަދި ފެލިވަރެވެ. މީގެތެރެއިން ފެލިވަރު އައިސްޕްލާންޓް ފިޔަވައި ދެންހުރި ހުރިހާ އައިސްޕްލާންޓަކީ 25 ޓަނުގެ އައިސްޕްލާންޓެވެ. ފެލިވަރު އައިސްޕްލާންޓަކީ 50 ޓަނުގެ އައިސްޕްލާންޓެކެވެ.