މިފްކޯގެ މަސްކިރުމުގެ ކެޕޭސިޓީ އިތުރުކުރުމަށް މަސް ކިރުވުމުގެ މަސައްކަތަށް އިތުރު ބޯޓުތައް ހޯދުމުގެ މަސައްކަތް ކުރެވެމުންދާކަމަށް އެކުންފުނިން ހާމަކޮށްފިއެވެ.
މަސްވެރިކަން ރަނގަޅު ދުވަސްވަރު މިފްކޯގެ ކެޕޭސިޓީ ފުރި މަސްވެރިންނަށް މަސް ކިރުވުމަށް ދަތިތަކާއި ކުރިމަތިވެއެވެ. މިކަމަށް ހައްލު ހޯދުމަށް ސަރުކާރުން ދަނީ މިފްކޯގެ ފެސިލިޓީތައް އަޕްގްރޭޑުކުރުމުގެ މަސައްކަތްކުރަމުންނެވެ. އަދި މިކަމަށް އަވަސް ހައްލެއް ހޯދުމަށްމަސް ގަނެ ރައްކާކުރެވޭނެ ކެޕޭސިޓީ ހުރި މަސް ބޯޓު ފަހަރުތަކެއް ހޯދުމަށް ވަނީ ނިންމާފައެވެ. މިކަމާއި ގުޅޭ ތަފްސީލްތައް ދެއްވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ، މިފްކޯއިން ހޯދަމުން ދަނީ މަސް ގަނެ ގަނޑުކުރެވޭނެ ގާބިލްކަން ހުރި ބޯޓު ފަހަރުތައް ކަމަށެވެ.
"މަސްގަނެފައި މަސް ފްރީޒްކުރަން ޖެހޭ، ބްރައިން ފްރީންޒިން، އެ ފްރީޒިން ހުރި ބޯޓުތައް މި ބަލަނީ، ދެން އޭތި ކޯލަޑު ސްޓޯރޭޖަށް ލެވޭނެ" އިސްމާއިލް ވިދާޅުވިއެވެ.
މިފްކޯގެ ފްލީޓުގައި މިހާރުވެސް މިފަދަ ދެ ބޯޓު އޮވެއެވެ. އެއީ ޖަޒީރާ 102 އާއި މަހާ ކަލަމިންޖާއެވެ. ޖަޒީރާ 102 އަކީ 100 ޓަނުގެ މަސް ރައްކާކުރުމުގެ ޤާބިލްކަން ހުރި ބޯޓެކެވެ. އަދި މަހާ ކަލަމިންޖާއަކީ 90 ޓަނާއި ހަމައަށް މަސް ގަތުމުގެ ގާބިލްކަން ހުރި ބޯޓެކެވެ.
ބޯޓު ފަހަރު ހޯދުމަށް ކުރަމުން ކުރަމުންދާ މަސައްކަތްތަކާއި ގުޅޭގޮތުން އިސްމާއިލް ވިދާޅުވީ، އެންމެ ރަނގަޅު ބޯޓު ފަހަރުތައް ގަތުމަށްޓަކައި ހުރި ފުރުސަތުތައް ބަލަމުންދާ ކަމަށެވެ.
"އޮޕަރޭޝަނަށް އެންމެ ފީސަބަލް، މަސްވެރިންނަށްވެސް ފަސޭހައިން މަސް ކިރޭނެ، ސްޓޯރޭޖްވެސް އެންމެ ރަނގަޅަށް ހުރި، މަސް ކިރޭނެ އިންތިޒާމެއް ހޯދަނީ، ޖަޕާނުން 2 ބޯޓެއް އިންސްޕެކްޓުވެސް ކުރިން، ތައިލޭންޑުންވެސް ކުރިން، އެހެން ދިމާލެއްގައި އޮތް ބޯޓެއްވެސް މިހާރު ބަލަމުން މިދަނީ" އިސްމާއިލް ވިދާޅުވިއެވެ.
އިސްމާއިލް ވިދާޅުވީ އުއްމީދަކީ މަސްވެރިކަމުގެ މޫސުމުގައި އެ ބޯޓު ބޭނުން ކުރަން ފެށުން ކަމަށެވެ. އަދި މި ބޯޓާއި އެކު މަސް ކިރުވުމަށް ހުރި ދަތިތަކެއް ލުއި ލިބިގެންދާނެ ކަމަށްވެސް އިސްމާއިލް ވިދާޅުވިއެވެ.
ފާއިތުވީ 3 މަސް ދުވަހު މަސްވެރިކަން ވަރަށް ދަށްކޮށް އޮތުމަށްފަހު، މިހާރު މަސްވެރިކަން ދަނީ ރަނގަޅުވަމުންނެވެ. އެގޮތުން ދ. އަދި ތ. އަތޮޅުގައި މަސްވެރިކަން މިހާރު ރަނގަޅުވެފައިވާއިރު، އިއްޔެ މިފްކޯގެ ފްލީޓަށް ވަނީ 300 ޓަނުގެ މަސް ވަނީ ކިރާފައެވެ.