ޖަރުމަނުގައި ކުރިއަށްދިޔަ ބާލިން މެރަތަންގައި ވާދަކޮށް ރާއްޖޭގައި އުފެދުނު އެންމެ ކާމިޔާބު އެއް އަންހެން ދުވުންތެރިޔާ ޝަމްހާ އަޙްމަދު އެއް މަހުގެ ތެރޭގައި ދެވަނަ ފަހަރަށް ގައުމީ ރިކޯޑެއް މުގުރާލައިފިއެވެ.
މެރަތަންގައި ވާދަކޮށް ޝަމްހާ ރޭސް ނިންމާފައިވަނީ ތިން ގަޑިއިރާއި ދެ މިނެޓް 41 ސިކުންތުންނެވެ. ކުރިން މި ރެކޯޑް އޮންނަނީ 2019 ވަނަ އަހަރު ބޭއްވި ސާފް ގޭމްސްގައި ރެކޯޑު ހެދި މަރިޔަމް އަބްދުލް ކަރީމުގެ އަތުގައެވެ. އެއީ ތިން ގަޑިއިރާ 21 މިނެޓް 54 ސިކުންތުން ރޭސް ނިންމައިގެންނެވެ.
މިއީ ދިވެހި ތާރީހުގައި ދިގު ދުވުންތެރިއަކު މިހާ އަވަހަށް ދުވުން ނިންމި ފުރަތަމަ ފަހަރެވެ. މިއީ މަރިޔަމް އަބްދުލް ކަރީމުގެ ކުރީގެ ރެކޯޑަށް ވުރެ ގާތްގަނޑަކަށް 20 މިނިޓް އަވަސް މިނެކެވެ.
ޝަމްހާ ވަނީ މި މަހުގެ 17 ވަނަ ދުވަހު ނޯވޭގެ ވެރިރަށް އޮސްލޯގައި ކުރިއަށްދިޔަ "އޮސްލޯ މެރަތަން" ގެ ހާފު މެރަތަން ކެޓަގަރީގައި ވާދަކޮށް 1 ގަޑިއިރާ 27 މިނެޓު 51 ސިކުންތުން ރޭސް ނިންމައިގެން ހާފް މެރަތަންގެ ގައުމީ ރެކޯޑުވެސް މުގުރާލާފައެވެ. ހާފް މެރަތަންގެ ކުރީގެ ރެކޯޑު އޮތީ މަރްޔަމް އަބްދުލް ކަރީމް (މަރީ) އަތުގައެވެ. މަރީ ހާފް މެރަތަންގެ ގައުމީ ރެކޯޑު ހެދީ މިއަހަރުގެ ފެބްރުއަރީ މަހު ޔޫއޭއީގައި އޮތް ރަކް އަލް ހައިމާ ހާފް މެރަތަންގައެވެ. މަރީގެ ޓައިމިންއަކީ 1 ގަޑިއިރާ 30 މިނެޓު 46 ސިކުންތެވެ.
ޝަމްހާ ވަނީ މިއަހަރު ފަސް ކިލޯމީޓަރުގެ ގައުމީ ރެކޯޑުވެސް އައުކޮށްފައެވެ. ޖަރުމަނުގައި ބޭއްވި ދަ އިވިއެލް ހާފް މެރަތަންގެ ފަސް ކިލޯމީޓަރުގެ ރޭހުގައިި ވާދަކޮށް ޝަމްހާ ރެކޯޑު ހެދީ 20 މިނެޓު 8 ސިކުންތުން ރޭސް ނިންމައިގެންނެވެ.
ގިނަ ދުވަސްތަކެއް ވަންދެން 100 މީޓަރުގެ ގައުމީ ރެކޯޑުވެސް އޮތީ ޝަމްހާ އަތުގައެވެ. 19 އަހަރު ކުރިން ޝަމްހާ ކެނެޑާގެ އެޑްމޮންޓަންގައި 2001 ގައި ބޭއްވި ވޯލްޑް ޗެމްޕިއަންޝިޕުގައި ހެދި ރެކޯޑު މިހާރު ހުރި އެންމެ އުއްމީދީ އަންހެން ދުވުންތެރިޔާ ހިމްނާ ހަސަން މުގުރާލީ ތުރުކީގައި ކުރިއަށްދިޔަ އިސްލާމިކް ސޮލިޑާރިޓީ ގޭމްސްގައެވެ.