ފަތުރުވެރިކަމުގެ ސިނާއަތަށް 50 އަހަރު ފުރިގެންދިޔައިރު މި ސިނާއަތުގެ މުވައްޒަފުންގެ އަޑުއަހައި އެމީހުންގެ ކަންބޮޑުވުންތަކަށް ހައްލު ހޯދައިދިން ހަމައެކަނި ސަރުކާރަކީ ރައީސް އިބްރާހިމް މުހައްމަދު ސާލިހުގެ ސަރުކާރުކަމަށް ބުނާ ސަބަބުތަކެއް ހުރެއެވެ. އެންމެ ކުޑަ އުޖޫރައާއި އަދި ސަރވިސް ޗާޖުގެ ޔަގީން ކޮންމެހެން މުވައްޒަފުންނަށް ލިބެންޖެހޭ އެއްޗެއްގެ ގޮތުގައި މި ސަރުކާރުން ޤާނޫނުގައި ކަނޑައެޅުމަކީ މީގެތެރޭގައި ހިމެނޭ ސަބަބުތަކެކެވެ.
ރާއްޖޭގައި އެންމެ ކުޑަ އުޖޫރައިގެ ގޮތުގައި ދެވޭނެ ޢަދަދު ސަރުކާރުން ކަނޑައަޅާފައިވަނީ މިދިޔަ އަހަރު ނޮވެމްބަރުމަހުގެ 8 ވަނަ ދުވަހުއެވެ. މިއާއެކު ބޮޑެތި ކުންފުނިތަކުން މަހަކު 8000ރ. އެންމެ ކުޑަ އުޖޫރައިގެ ގޮތުގައި ދޭން ޖެހޭއިރު، ކުދި ވިޔަފާރިތަކުން ދޭން ޖެހެނީ 4500ރ. އެވެ. އަދި ސަރުކާރު މުވައްޒަފުންނަށާއި މެދުފަންތީގެ ވިޔަފާރިތަކުގައި މަސައްކަތްކުރާ މުވައްޒަފުންނަށް މަދުވެގެން 7000ރ. ދޭން ޖެހެއެވެ.
ސަރވިސް ޗާޖު ދޭ އުސޫލަށް ސަރުކާރުން ގެނައި އިސްލާހާއެކު ފަތުރުވެރިކަމުގެ ސިނާޢަތުގައި މަސައްކަތް ކުރާ 13،000 ދިވެހި މުވައްޒަފުންގެ މުސާރައަށް ވަނީ ކުރިއެރުން ލިބިގެންގޮސްފައެވެ.
ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މިނިމަމް ވޭޖް ކަނޑައަޅަން އެއްވެސް ސަރުކާރަކަށް ނުކެރި އޮއްވައި އެކަންކުރީ މި ސަރުކާރުން ކަމަށެވެ. އަދި އެކަން ކުރީވެސް ކޯވިޑްގެ އެންމެ ދަތި އުނދަގޫ ދަނޑިވަޅުގައިކަން މިނިސްޓަރ ފާހަގަކުރެއްވިއެވެ.
"މިނިމަމް ވޭޖް ކަނޑައަޅަން އެއްވެސް ސަރުކާރަކަށް ނުކެރި އޮއްވަކަ ނޫންތޯ މިކަންތައް ކުރީ. އަނެއްކަ ކޮންފަދަ ދަތި ދަނޑިވަޅެއްގައި. ކޯވިޑުން ކިރިޔާ އަރައިގަނެވުން ކަހަލަ ވަގުތެއްގައި. މިހާރު އިންޑަސްޓްރީގެ މުވައްޒަފުންނަށް ފުދޭވަރެއްގެ ރަނގަޅު އާމްދަނީއެއް އެބަލިބޭ. ޓޫރިޒަމް އިންޑަސްޓްރީ އަޅުގަނޑުމެން މިހާރު މި މިސްރާބު ހިފާފައި ހުރިގޮތުން ޓޫރިޒަމް އިންޑަސްޓްރީގެ ދިވެހި މުވައްޒަފުން މިނިމަމް ވޭޖްއަށްވުރެ މާމަތިން އާމްދަނީ ހޯދާނެ." މިނިސްޓަރ ވިދާޅުވިއެވެ.
ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ސަރވިސް ޗާޖު ނުދޭ މައްސަލައަކީ ވަރަށް ގިނައިން ދެކެވޭ ވާހަކައެވެ. ސަރވިސް ޗާޖު ބެހުމުގައި ހަމަހަމަކަމެއް ނެތުމާއި، ސަރވިސް ޗާޖު ނުދޭ މައްސަލައަކީ ބައެއް ރިސޯޓްތަކުން ފެންމަތިވާ މައްސަލަތަކެކެވެ. ސަރވިސް ޗާޖުގެ އިތުރުންވެސް މުވައްޒަފުންނަށް ދޭންޖެހޭ އެހެން އިނާޔަތްތައް ދިނުމުގައި ރިސޯޓްތަކުން ވަރަށް ބޮޑަށް އިހުމާލުވާ އަޑުތަކަކީ ވަރަށް ގިނައިން އިވޭ އަޑުތަކެކެވެ. އެހެންކަމުން މިކަމަށް ހައްލެއް ގެނައުމުގެ މަސައްކަތަކީ އަބަދުވެސް ކުރަމުންދާ މަސައްކަތެކެވެ. ނަމަވެސް ވަރަށް ފަހަކާއިޖެހެންދެންވެސް އެކަމަށް އޮތީ ހައްލެއް ނުލިބިފައެވެ.
ސަރވިސް ޗާޖު މައްސަލައިގައި ހައްލެއް ހޯދުމަށް ކުރަމުންދިޔަ މަސައްކަތުން މިކަމަށް ރަސްމީ ހައްލެއް ރައީސް އިބްރާހިމް މުހައްމަދު ޞާލިހުގެ ސަރުކާރުން ގެނެސްދެއްވިއެވެ. ސަރުކާރުން ސަރވިސް ޗާޖާބެހޭ ޤަވާއިދަށް ގެނައި އިސްލާހުތަކާއެކު މުވައްޒަފުންނަށް ސަރވިސް ޗާޖު ދޭންޖެހޭ އުސޫލުތައް ވަނީ ވަރަށް ތަފްސީލީ ގޮތެއްގައި ބަޔާންކޮށްދެއްވާފައެވެ.
ލޭބަރ ރިލޭޝަންސް އޮޓޯރިޓީން އާންމުކޮށްފައިވާ ސަރވިސް ޗާޖާބެހޭ ޤަވާއިދު ބުނާގޮތުން ފަތުރުވެރިކަމުގެ ޞިނާޢަތުގައި ހަރަކާތްތެރިވާ ތަންތަނުން ފޯރުކޮށްދޭ ކޮންމެ ޙިދުމަތަކުން %10 އަށްވުރެ މަދު ނޫން އަދަދަކުން ސަރވިސް ޗާޖު ނަގަންވާނެއެވެ. މި ޤަވައިދާއި އެއްގޮތަށް މިއަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން ސަރވިސްޗާޖު ދަނީ ނަގަމުންނެވެ. އަދި މިކަމުގެ ހެޔޮ ނަތީޖާ ފަތުރުވެރިކަމުގެ ސިނާއަތުގެ މުވައްޒަފުންގެ މުސާރައިން ދަނީ ފެންނަމުންނެވެ.