މިއަހަރުގެ ފުރަތަމަ 5 މަސްދުވަހުގެތެރޭގައި، ވަޒީފާ އަދާކުރާ މީހުންގެ އަދަދު ކޯވިޑުގެ ކުރިން ހުރި މިންވަރަށް ވުރެ އިތުރުވެފައިވާކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީގެ ފަރާތުން ރައްޔިތުންގެ މަޖިލީހަށް ހުށަހެޅި ސަރުކާރުގެ ފިސްކަލް ސްޓްރެޓެޖީ ބަޔާނުގައި ވަނީ ރާއްޖޭގައި ވަޒީފާގެ ބާޒަށް ކޯވިޑްގެ ފަހުން އަންނަ ކުރިއެރުންތަކަށް ބަލާލާފައެވެ.
ފިސްކަލް ސްޓްރެޓެޖީ ބަޔާނުގައި ބުނީ ރާއްޖޭގައި ޖުމްލަ އެމްޕްލޯއިމަންޓް ނުވަތަ މަސައްކަތުގައިއުޅޭ މީހުންގެ އަދަދާއި އަން-އެމްޕްލޯއިމަންޓް ނުވަތަ މަސައްކަތް ބޭނުންވެފައިވާ މީހުންގެ އަދަދު އެނގޭފަދަ ތަފާސް ހިސާބުތައް ގަވާއިދުން ކޮންމެ އަހަރަކު ލިބޭނެ އިންތިޒާމެއް މިވަގުތު ހަމަޖެހިފައިނެތް ކަމަށެވެ. އެހެންކަމުން، ރާއްޖޭގެ ބާޒާރަށް ކޯވިޑު ފަދަ ކާރިސާއަކުން އަންނަ އިގުތިސާދީ ލޮޅުމަކުން ނުވަތަ އިގުތިސާދީ އުފެއްދުންތެރިކަން އިތުރުވުމުގެ ސަބަބުން ކުރާ އަސަރު އެންމެ ފުރިހަމައަށް ދެނެގަތުމަކީ އުދަނގޫކަމެއްކަން ފާހަގަކޮށްފައިވެއެވެ.
ފިނޭންސް މިނިސްޓްރީން ވިދާޅުވީ، ވަޒީފާގެ ބާޒާރުގެ ކުރިއެރުން އަންގައިދޭ ތަފާސްހިސާބެއްގެ ގޮތުގައި މިވަގުތު ލިބެންހުރީ ޕެންޝަން އޮފީހުގައި ރަޖިސްޓްރީކުރެވިފައިވާ މުވައްޒަފުންގެ އަދަދުކަމަށެވެ. ނަމަވެސް ރާއްޖޭގެ ޕެންޝަން އޮފީހުގެ ތަފާސް ހިސާބުތަކުގައި މައިގަނޑު ގޮތެއްގައި ހިމެނެނީ ރަސްމީ ވަޒީފާ އަދާކުރާ ދިވެހިންނެވެ. އެހެންކަމުން ރާއްޖޭގެ މަސައްކަތްތެރިންގެ ބޮޑު ބައެއްކަމުގައިވާ ބިދޭސީންނާއި އަމިއްލަ މަސައްކަތްތެރިން އަދި އިންފޯމަލް ސެކްޓަރގައި މަސައްކަތްކުރާ ފަރާތްތަކުގެ ވަޒީފާގެ ބާޒާރަށް އަންނަ ބަދަލުތައް ޕެންޝަން އޮފީހުގެ ތަފާސް ހިސާބުތަކުން ނުފެނެއެވެ.
ފިސްކަލް ސްޓްރެޓެޖީ ބަޔާންގައިވާގޮތުން، ކޯވިޑުގެ ސަބަބުން 2020ވަނަ އަހަރާއި 2021ވަނަ އަހަރުގެތެރޭގައި ވަޒީފާގެ ބާޒާރަށް ގިނަ ލޮޅުންތަކެއް ވަނީ އައިސްފައެވެ. މިގޮތުން ޕެންޝަން އޮފީހުގައި ރަޖިސްޓްރީކޮށްފައިވާ މުވައްޒަފުންގެ އަދަދު ވަނީ 2020ވަނަ އަހަރުގެތެރޭގައި ވަރަށް ބޮޑަށް ދަށްވެފައެވެ.
އަދި 2021ވަނަ އަހަރު މިއަދަދު ޖުމްލަކޮށް މަތިވި ނަމަވެސް ކޯވިޑުގެ ކުރިން މުވައްޒަފުންގެ އަދަދު ހުރި މިންވަރަށް އިތުރުވެފައެއް ނުވެއެވެ. އަދި 2021 ވަނަ އަހަރު ކޯވިޑުގެ ޑެލްޓާ ވޭރިއެންޓު އެންމެ ހަލުވިކަމާއެކު ފެތުރެމުންދިޔަ ދުވަސްވަރު، މި ބަލި އިތުރަށް ފެތުރުނަ ނުދިނުމަށް އެޅި ފިޔަވަޅުތަކުގެ ސަބަބުން 2021 އަހަރުގެ ޖުލައިމަހު ވަނީ މުވައްޒަފުންގެ އަދަދު ދަށްވެފައެވެ.
ނަމަވެސް އޭގެފަހުން ބަލި އިތުރަށް ފެތުރުން ކޮންޓްރޯލްކުރެވި، އާބާދީގެ ބޮޑު ބަޔަކަށް ވެކްސިންދެވުމުން، އިގުތިސާދީ ހީނަރުކަމުން އަރައިގަންނަން ފަށައި، ގިނަ އިގްތިސާދީ ދާއިރާތަކުގެ އުފެއްދުންތެރިކަން 2021 ވަނަ އަހަރުގެ ފަހުކޮޅު ވަނީ އިތުރުވާން ފަށާފައިކަމަށް ފިނޭންސް މިނިސްޓްރީން ވިދާޅުވެއެވެ.
މިގޮތުން 2021 ވަނަ އަހަރުގެ ނޮވެމްބަރު އަދި ޑިސެމްބަރުމަހުގައި ޕެންޝަން އޮފީހުގައި ރަޖިސްޓްރީވެފައިވާ މުވައްޒަފުންގެ އަދަދު ވަނީ 2019ގެ މުއްދަތުގައި މުވައްޒަފުންގެ އަދަދުހުރި މިންވަރަށްވުރެ މަތިވެފައެވެ.
މިއަހަރުގެ ފުރަތަމަ 5 މަހުގެ މައުލޫމާތަށް ބަލާއިރު، ހުރިހާ މަހެއްގައި ވެސް މުވައްޒަފުންގެ އަދަދު ވަނީ 2019ގައި ހުރި މިންވަރަށް ވުރެ އިތުރުވެފައެވެ. ފަތުރުވެރިކަމުގެ ދާއިރާގައި ހަރަކާތްތެރިވާ މުވައްޒަފުންގެ އަދަދުމަހުން މަހަށް އިތުރުވަމުން ދިޔަނަމަވެސް، 2019ގެ މިންވަރަށްވުރެ އިތުރުވެފައި ވަނީ މިއަހަރުގެ މޭ މަހުގައެވެ.
ފަތުރުވެރިކަމުގެ ދާއިރާ ކުރިއަރަމުންދާ މިސްރާބަށް ބިނާކޮށް، މި އަދަދު މިއަހަރުގެ އެހެން މަސްތަކުގައި 2019ގައި ހުރި މިންވަރަށްވުރެ މައްޗަށް ދާނެކަމަށް ފިނޭންސް މިނިސްޓްރީން ވަނީ ލަފާކޮށްފައެވެ.
ޕެންޝަން އޮފީހުގައި ރަޖިސްޓަރީކޮށްފައިވާ މުވައްޒަފުންގެ 40 އިންސައްތައަކީ ޕަބްލިކް ސެކްޓަރަށް ނިސްބަތްވާ މުވައްޒަފުންނެވެ. އަދި 2020 ވަނަ އަހަރު ކޯވިޑާއި ގުޅިގެން ސިއްހީ ދާއިރާގެ ހަރަކާތްތައް ދައުލަތުން އިތުރުކޮށްފައިވާތީ އެއަހަރު ޕަބްލިކް ސެކްޓަރގައި މަސައްކަތްކުރާ މުވައްޒަފުންގެ އަދަދު ވަނީ އިތުރުވެފައެވެ. ނަމަވެސް 2022 ވަނަ އަހަރުގެތެރޭގައި އެންމެ ބޮޑަށް އިތުރުވެފައިވަނީ ޕަބްލިކް ސެކްޓަރ އާއި ފަތުރުވެރިކަމުގެ ދާއިރާ ނޫން އެހެން ދާއިރާތަކަށް ނިސްބަތްވާ މުވައްޒަފުންނެވެ.
ސަރުކާރުން ދަނީ ވަޒީފާގެ ފުރުސަތުތައް ފަހިކޮށްދިނުމަށް ގިނަ މަސައްކަތްތަކެއް ކުރަމުންނެވެ. އެގޮތުން ސަރުކާރުން ކުރިއަށްގެންދާ ނެޝަނަލް އެޕްރެންޓެންޝިޕް ޕްރޮގްރާމްގެ ދަށުންވެސް ތަމްރީނާއެކު ވަޒީފާގެ ބާޒާރަށް ގިނަ އަދަދެއްގެ ޒުވާނުން ނިކުމެފައިވެއެވެ. އަދި ކޯވިޑްގެ ހާލަތުގައި ވަޒީފާ ގެއްލުނު ފަރާތްތަކަށްވެސް ސަރުކާރުން ވަނީ ބޮޑު އެހީތެރިކަމެއް ފޯރުކޮށްދީފައެވެ.