މޯލްޑިވްސް އިސްލާމިކް ބޭންކް، އެމްއައިބީން ހާއްސަ އުސޫލެއްގެ ދަށުން، ކުޑަ ރޭޓެއްގައި ވިނަރެސް ފްލެޓްތަކަށް ފައިނޭންސްކުރުމަށް ނިންމާފައިވާކަމަށް އެބޭންކުން ބުނެފިއެވެ.
އެމްއައިބީން މައުލޫމާތު ދޭގޮތުގައި އެބޭންކުން ނިންމާފައިވަނީ ވިނަރެސް ފްލެޓްތައް 9 އިންސަތައިގައި ފައިނޭންސް ކުރުމަށެވެ. އަދި 3 މަހުގެ ގްރޭސް ޕީރިއަޑެއް ކަސްޓަމަރުންނަށް ދޭނެކަމަށް އެބޭންކުން ވިދާޅުވެއެވެ.
އަލަށް ތަނަކަށް ދިރިއުޅުން ބަދަލުކުރުމަކީ ބޮޑެތި ހަރަދުތަކެއް ކުރަންޖެހޭ ކަމަކަށް ވާތީ، މިއީ ކަސްޓަމަރުންނަށް ބޮޑު ލުޔެއް ލިބިގެންދާނެ ކަމެއްކަމަށް އެބޭންކުން ޤަބޫލުކުރެއެވެ.
ވިނަރެސް ފްލެޓް ގަތުމަށް ކަސްޓަމަރުން 20 އިންސައްތައިގެ އެޑްވާންސެއް ދައްކަންޖެހޭއިރު، އެޑްވާންސް ޕޭމަންޓްގެ ގޮތުގައި ޕެންޝަން ސްކީމުގެ ފައިސާ އެމްއައިބީން ބަލައިގަންނާނެކަމަށް އެބޭންކުން މަޢުލޫމާތުދެއެވެ.
ވިނަރެސް ހައުސިން މަޝްރޫޢަކީ ސަރުކާރުން އެޗް.ޑީ.ސީއާ ގުޅިގެން ކުރިއަށްގެންދާ މެދުފަންތީގެ ބޯހިޔާވަހިކަމުގެ މަޝްރޫޢެކެވެ. 10 ޓަވަރު ހިމެނޭހެން ތަރައްޤީކޮށްފައިވާ ވިނަރެސް މަޝްރޫޢުގައި 1344 ފްލެޓު ހިމެނެއެވެ. މިއީ މުޅިންވެސް 3 ކޮޓަރީއާއި 3 ފާޚާނާ ހިމެނޭ ފްލެޓްތަކެކެވެ. މި ފެލްޓްތައް ތަރައްޤީކޮށްފައިވަނީ ހުޅުމާލޭ ފޭސް ދޭއްގެ ހިތިގަސްމަގުގައެވެ.
ހުޅުމާލޭގައި އިމާރާތްކޮށްފައިވާ ވިނަރެސް ފްލެޓްގެ އަގު އުޅެނީ 2.5 މިލިއަނާއި 3.047 މިލިއަން ރުފިޔާއާ ދެމެދުގައެވެ. މި ފްލެޓްތައް ގަތުމަށް ގިނަބަޔަކު ޝައުގުވެރިކަން ފާޅުކޮށްފައިވާއިރު މިއީ ޝަރިއާ ހުއްދަކުރާ އުސޫލުން ފްލެޓް ގަތުމަށް ލިބޭ ރަނުގެ ފުރުސަތެކެވެ.