"މޯލްޑިވްސް ޓޫރިޒަމް އެވޯޑްސް 2022 ވިނަރ ބެޖް" ގެ ނަމުގައި މިނިސްޓްރީ އޮފް ޓޫރިޒަމްއިން ބެޖެއް ތަޢާރަފްކޮށްފިއެވެ.
މިއީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ގޮތުން ފަތުރުވެރިކަމުގެ ސިނާޢަތުގައި މަސައްކަތްކުރާ ފަރާތްތަކުގެ އަގު ވަޒަންކޮށް ސަރުކާރުން ދިން "މޯލްޑިވްސް ޓޫރިޒަމް އެވޯޑްސް" ހާސިލު ކުރި ފަރާތަތަކަށް ޙާއްސަކޮށްގެން ތައާރަފްކޮށްފައިވާ ބެޖެކެވެ.
ޓޫރިޒަމް މިނިސްޓްރީން ވިދާޅުވީ، އެކި ކެޓަގަރީތަކުން "މޯލްޑިވްސް ޓޫރިޒަމް އެވޯޑްސް" ހާސިލްކުރި ފަރާތްތަކުން ޕްރޮމޯޝަންތަކާއި ރަސްމީ ލިޔުންތަކުގައި ބޭނުންކުރުމަށް މި ބެޖު އެމިނިސްޓްރީން އެވޯޑްތައް ހާސިލްކޮށްފައިވާ ފަރާތްތަކާއި ހިއްސާކޮށްފައިވާ ކަމަށެވެ.
މިއަހަރުގެ "މޯލްޑިވްސް ޓޫރިޒަމް އެވޯޑް" 27 ފަރާތަކުން ވަނީ ހަވާލުކޮށްފައެވެ. އެވޯޑްތައް ހަވާލުކޮށްފައިވަނީ ޤައުމީ ފަތުރުވެރިކަމުގެ ދުވަސް ފާހަގަކުރުމަށް މި މަހުގެ ދެވަނަ ދުވަހު ދަރުބާރުގޭގައި ބޭއްވި ޚާއްސަ ޖަލްސާގައެވެ.
މި ޖަލްސާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ޝަރަފުވެރިކޮށްދެއްވާފައިވާއިރު އެމަނިކުފާނު ވަނީ 6 އެވޯޑެއް ހަވާލުކޮށްދެއްވާފައެވެ. އޭގެތެރޭގައި، ބެސްޓް ރިސޯޓް އެވޯޑާއި، ބެސްޓް ގެސްޓްހައުސް އެވޯޑްގެ އިތުރުން ބެސްޓް ޓްރެވެލް އެޖެންސީ އެވޯޑް ހިމެނެއެވެ.
ދަރުބާރުގޭގައި ބޭއްވި މި ޖަލްސާގައި ނައިބު ރައީސް ފައިސަލް ނަސީމްއާއި ޓޫރިޒަމް މިނިސްޓަރ ޑރ. އަބްދުﷲ މައުސޫމްގެ އިތުރުން ދައުލަތުގެ ވަޒީރުންނާއި ފަތުރުވެރިކަމުގެ ސިނާއަތުގައި މަސައްކަތްކުރާ ގިނަ އަދަދެއްގެ ފަރާތްތަކަކުން ބައިވެރިވިއެވެ. އަދި މި ޖަލްސާގައި ނައިބު ރައީސްވެސް ވަނީ ފަތުރުވެރިކަމުގެ ސިނާއަތުގެ 21 ފަރާތަކަށް އެވޯޑު ހަވާލުކޮށްދެއްވާފައެވެ.
މިއަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރުކަމުން މި އެވޯޑަކީ މި ސިނާއަތުގައި މަސައްކަތްކުރާ ފަރާތްތަކުގެ އަގު ވަޒަންކުރުމުގެ ގޮތުން ސަރުކާރުން ދިން އެވޯޑެކެވެ.