ފަރެސްމާތޮޑާގައި ދުއްވާ ބާޚިރާ ދޯނިން ގިނަ އަދަދެއްގެ މަސް ކިރުވައި، އެއް ދުވަހުން 8 ލައްކައަށްވުރެ ގިނަ ރުފިޔާ ހޯދައިފިއެވެ.
މިފްކޯއިން މައުލޫމާތުދޭ ގޮތުގައި އެދޯނިން ކޫއްޑޫއަށް 51.9 ޓަނުގެ މަސް ވަނީ ކިރުވާފައެވެ. އަދި ކިރުވި މަހަށް އެ ދޯންޏަށް ވަނީ 882674 (އަށް ލައްކަ އަށްޑިހަ ދެހާސް ހަސްތޭކަ ހަތްދިހަ ހަތަރު) ރުފިޔާ ލިބޭނެއެވެ.
މިފްކޯއިން މައުލޫމާތުދޭ ގޮތުގައި މި ރުފިޔާ އެ ދޯނީގެ އެކައުންޓަށް އާދިއްތަ ދުވަހު ޖަމާކޮށްދޭނެއެވެ. ކޮންމެ ހަފްތާއެއްގައިވެސް ކިރާ މަހުގެ ފައިސާ ޖަމާކޮށްދޭ ދުވަހެއްގެ ގޮތުގައި މިފްކޯއިން ކަނޑައަޅާފައި އޮންނަނީ އާދީއްތަ ދުވަހެވެ.
ބާޙިރާ ދޯންޏަކީ މަސްވެރިކަމުގައި ފާހަގަކޮށްލެވޭ ދޯންޏެކެވެ. މީގެކުރިންވެސް އެ ދޯނިން ވަނީ ބޮޑެތި އަދަދުތަކުން މަސް ކިރުވާފައެވެ.
ބާޙީރާ ދޯނިން މިފަހަރު ކިރުވާފައިވާ މަހުގެ އަދަދު ރެކޯޑު އަދަދަކާއި ގާތްކުރެއެވެ.
މިފްކޯއަށް އެންމެ ގިނަ އަދަދަކަށް މަސް ކިރުވާފައިވާ ދޯނީގެ ރެކޯޑު ޤާއިމްކޮށްފައިވަނީ ގދ.މަޑަވެލީގެ ޓީއެސް ލައިން ދޯނިންނެވެ. މިދިޔަމަހުގެ 29ވަނަ ދުވަހު އެ ދޯނިން ވަނީ ކޫއްޑޫއަށް 57.1 ޓަނު މަސް ކިރުވައި، ރެކޯޑެއް ޤާއިމްކޮށްފައެވެ. ޓީއެސް ލައިން ދޯނިން ކިރުވި މަހަަށް ވަނީ 971584 ( ނުވަލައްކަ ހަތްދިހަ އެއް ހާސް ފަސްސަތޭކަ އަށްޑިހަ ހަތަރު) ރުފިޔާ ލިބިފައެވެ.
ޓީއެސް ލައިން ދޯންޏަކީ މިދިޔަ އަހަރު މިފްކޯއަށް އެންމެ ގިނަ އަދަދަކަށް މަސް ކިރުވި ދޯނިވެސްމެއެވެ. އެއީ 1095.805 ޓަނުގެ މަހެވެ.