ގދ.ހޯނޑެއްދޫގައި ފުލުހުން ފަށާފައިވާ ޑްރަގް އޮޕަރޭޝަންގެ ތެރެއިން އިތުރު 69 ކިލޯގެ މަސްތުވާތަކެތި ފުލުހުން ހޯދައިފިއެވެ.
ކޮމިޝަނަރ އޮޕް ޕޮލިސް މުޙައްމަދު ޙަމީދް ކުރެއްވި ޓްވީޓެއްގައިވަނީ، މި އޮޕަރޭޝަންގައި މިހާތަނަށް ހޯދި މަސްތުވާތަކެތީގެ އަދަދު 82 ކިލޯއަށް އަރާފައިވާކަމަށެވެ.
އަލަށް ހޯދި 69 ކިލޯގެ މަސްތުވާތަކެތި ހޯދާފައިވަނީ، ހޯނޑެއްދުއާއި އަދި އެ ސަރަޙައްދުގެ ފަޅު ރަށެއްގައި ވަޅުލާފައި ހުއްޓައެވެ. ސީޕީ ވިދާޅުވީ މީގެ ތެރޭގައި ހިމެނެނީ މެތް އާއި ހެރޮއިން ކަމަށެވެ.
ސީޕީ ހަމީދު ވަނީ، މި އޮޕަރޭޝަންގައި ފުލުހުން ކުރި މަސައްކަތްތަކާއި، ހޯދަމުންދާ ކުރިއެރުން ފާހަގަކުރައްވާފައެވެ.
Apart from 13 kgs of heroin our teams found buried in G.DH Hoadehdhoo on 27/10, @PoliceMv teams have done commendable work to find 69 kgs of narcotic drugs buried in G.DH Hoadehdhoo and a close by uninhabited island today. Taking it to a total 82 kgs of both meth & heroin. pic.twitter.com/ZZCLL0QxXW
— Mohamed Hameed (@M_Hameedh) November 2, 2022
މި އޮޕަރޭޝަންގައި އެންމެ ފުރަތަމަ މަސްތުވާތަކެތި ހޯދާފައިވަނީ، މިދިޔަ އޮކްޓޯބަރު މަހު 27ވަނަ ދުވަހު، ގދ.ހޯނޑެއްދޫ ވަލުތެރޭގައި ވަޅުލާފަ ހުއްޓައެވެ. އެއީ 13 ކިލޯގެ މަސްތުވާތަކެއްޗެވެ.
ފުލުހުން މި ތަކެތި ހޯދާފައިވަނީ ފުލުހުންގެ ޑްރަގް އެންފޯސްމަންޓާއި އިންޓެލިޖެންސް އަދި ސައުތު ޕޮލިސްގެ ފުލުހުން ގުޅިގެން މިހާރު ކުރިއަށްގެންދާ ޚާއްސަ އޮޕަރޭޝަންގެ ތެރެއިންނެވެ.
ރާއްޖެއަށް މަސްތުވާތަކެތި އެތެރެކޮށް އެތަކެތި ވިއްކައި ވިޔަފާރިކުރާކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެން ކުރިއަށްގެންދާ މި އޮޕަރޭޝަންގައި މިހާތަނަށް ބައެއް މީހުން ވަނީ ފުލުހުންގެ ބެލުމުގެދަށަށް ގެންގޮސްފައެވެ.