ރާއްޖެ އިޝްތިހާރުކުރުމަށް އެމްއެމްޕީއާރުސީގެ ޓީމުން، ކުރި ބުރަ މަސައްކަތުގެ އަގު ދުނިޔެއިން ބަލައިގަނެފައިވާކަމަށް އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވެއްޖެއެވެ. ޠައްޔިބު މިހެން ވިދާޅުވީ ދުނިޔޭގެ ލީޑިންގ ޓޫރިސްޓު ބޯޑުގެ އެވޯޑު ފުރަތަމަ ފަހަރަށް، އެމްއެމްޕީއާރުސީން ކާމިޔާބުކުރުމާއި ގުޅޭގޮތުންނެވެ.
މޯލްޑިވްސް މަރކެޓިންގް އެންޑު ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީއަށް ދުނިޔޭގެ ލީޑިންގ ޓޫރިސްޓު ބޯޑުގެ އެވޯޑު ލިބިފައިވަނީ ދުނިޔޭގެ 28 ޓޫރިސްޓު ބޯޑަކާއި ވާދަކޮށްގެންގެންނެވެ.
އޮމާންގެ ރިޓްޒް ކާލްޓަން، އަލް ބުސްތާން ޕެލަސްގައި ބޭއްވި މިއަހަރުގެ ވޯލްޑު ޓްރެވަލް އެވޯޑްސްގެ ހަފްލާގައި އެމްއެމްޕީއާރުސީއަށް ލިބުނު އެވޯޑާއި ހަވާލުވެވަޑައިގަތީ އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ ޠައްޔިބު މުޙައްމަދެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީއަށް މި ލިބުނު އެވޯޑާއި ގުޅޭގޮތުން، ޠައްޔިބު ވިދާޅުވީ ފާއިތުވި އަހަރުތަކުގައި ދުނިޔެއަށް ކުރިމަތިލާން ޖެހުނު އެކި އެކި ގޮންޖެހުންތައް ތަހައްމަލުކޮށް، އެމްއެމްޕީއާރުސީގެ ޓީމުން ކުރި ބުރަ މަސައްކަތުގެ އަގު ދުނިޔެއިން ވަޒަންކޮށްފައިވާކަމަށެވެ.
ޠައްޔިބު ވިދާޅުވީ، މި ފަދަ ޝަރަފުވެރި އެވޯޑެއް އެމްއެމްޕީއާރުސީއަށް ލިބިގެންގޮސްފައި މިވަނީ ރާއްޖެ އިޝްތިހާރުކުރުމަށް އެމްއެމްޕީއާރުސީން ކުރަމުންދާ މަސައްކަތްތަކަށް ގެނެސްފައިވާ ބަދަލުތަކާއި ގުޅިގެން ކަމަށް ޤަބޫލުކުރެވޭކަމަށެވެ.
"މިދިޔަ އަަހަރުވެސް އަޅުގަނޑުމެން ނޮމިނޭޓުވި، ތަފާތު އެކި ގޮތްގޮތުން ބަލާފަ ކަނޑައިގެން ދިޔައީ. ޓޫރިސްޓު ބޯޑެއްގެ ގޮތުގައި އެޤައުމު އިޝްތިހާރު ކުރުމަށް ކުރާ މަސައްކަތް ތަފާތު ގޮތްގޮތަށް ކުރިއަށް ގެންދެވިގެން މި އެވޯޑު ލިބޭނީވެސް. މި ފަހަރު މި ލިބުނީ އެވޯޑު، މިއީ ޤައުމަށް ލިބުނު ވަރަށް ރީތި ނަމެއް،" ޠައްޔިބު ވިދާޅުވިއެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީ އިން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22އަށްވުރެ މާކެޓެއްގައި 260 އަށްވުރެ ގިނަ ހަރަކާތް ވަނީ ހިންގާފައެވެ.
މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ޤައުމުތަކުގައި ރޯޑްޝޯތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ކެމްޕެއިންތައް ވަނީ ހިންގާފައެވެ.