މޯލްޑިވިއަންއިން އެކްސެސް ބެގޭޖަށް ނަގަމުން އަންނަ ފީއަށް ބަދަލެއް

ޤައުމީ އެއަރލައިން މޯލްޑިވިއަނުން އެކްސެސް ބެގޭޖަށް ނަގަމުން އަންނަ ފީއަށް ބަދަލު ގެނެސްފިއެވެ.

މޯލްޑިވިއަނުން ދަތުރުކުރާ ފަރާތްތަކަށް ހިލޭ 20 ކިލޯ ގެންދެވޭނެއެވެ. އޭގެ އިތުރަށް ގެންދާ ކިލޯގެ އަގު އެއަރލައިނުން މިހާރު ވަނީ ބޮޑުކޮށްފައެވެ.

ޕީއެސްއެމް ނިއުސްއަށް މައުލޫމާތުދެއްވަމުން އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު ޖެނިފާ ވިދާޅުވީ، އެކްސެސް ބެގޭޖު ފީ ބޮޑުކޮށްފައިވަނީ ރާއްޖޭގެ އެހެން އެއަރލައިންތަކުން ނަގަމުންދާ ރޭޓަށް ބެލުމަށްފަހު ކަމަށެވެ. އަދި މިހާރުވެސް މޯލްޑިވިއަނުން ނަގަމުންދާ ރޭޓަކީ އެހެން އެއަރލައިންތަކަށްވެސް ދަށް ރޭޓެއްކަން ޖެނިފާ ފާހަަގަކުރެއްވިއެވެ.

"މިހާރު އެކްސެސްވާ ކޮންމެ ކިލޯއަކަށް ހަނިމާދޫ، ހޯރަފުށި، ކުޅުދުއްފުއްޓަށް މިިއިނީ 36ރ، އިފުރު، މާފަރު، މަޑިވަރަށް 30ރ، ފުނަދޫ 36ރ، ދަރަވަންދޫ، ތިމަރަފުށި، 24ރ، ކައްދޫއަށް 36ރ، ކޫއްޑޫ، ކާޑެއްދޫ، މާވަރުލަށް 48ރ، ފުވައްމުލަކަށް 57ރ، ގަމަށް 60ރ، ނަގާނެ،" ޖެނިފާ ވިދާޅުވިއެވެ.

ޖެނިފާ ވިދާޅުވީ އެއަރލައިނުން ނަގަމުންދާ އެކްސެސް ބެގޭޖް ފީގެ އަގު ބޮޑުކުރުމުގައި ގިނަ ކަންތައްތަކަކަށް ބަލާފައިވާނެ ކަމަށެވެ. އެގޮތުން މިހާރު ތެލުގެ އަގުވެސް ބޮޑުފައިވާތީ އިތުރަށް ބަރުކޮށް ދަތުރުކުރުމަކީ ތެލުގެ އަގުވެސް ބޮޑުވާނެ ކަމެއްކަންވެސް ޖެނިފާ ފާހަގަކުރެއްވިއެވެ.