އިއާދަކުރަނި ހަކަތައިގެ ދާއިރާއިން ރާއްޖެއިން ކުރަމުންދާ މަސައްކަތަށް ވޯލްޑް ބޭންކުގެ ތައުރީފް

ރާއްޖޭގައި އިއާދަކުރަނިވި ހަކަތައިގެ ދާއިރާއިން ކުރިއަށްގެންދާ މަޝްރޫއުތަކަކީ ރާއްޖެ ފަދަ އެހެން ޤައުމުތަކުގައި ހިންގާ މިފަދަ މަޝްރޫޢުތަކަށް ނަމޫނާއެއްކަމަށް ވޯލްޑު ބޭންކުން ހާމަކޮށްފިއެވެ.

ވޯލްޑު ބޭންކުން ދިވެހިރާއްޖެ ހިމެނޭ ދެކުނު އޭޝިއާގެ ޤައުމުތަކަށް ކަނޑައަޅާފައި ހުންނަވާ ނައިބު ރައީސް މާޓިން ރައިޒަރ މިހެން ވިދާޅުވީ ހުޅުލެ-ހުޅުމާލޭ ލިންކް ރޯޑްގައި ޤާއިމުކުރާ 5 މެގަވޮޓްގެ ސޯލަރ ޕީވީ ނިޒާމުގެ އަމަލީ މަސައްކަތް ރަސްމީކޮށް ފެށުމަށް ބޭއްވި ރަސްމިއްޔާތުގައެވެ.

ހުޅުލެ-ހުޅުމާލޭ ލިންކް ރޯޑްގައި ޤާއިމުކުރާ 5 މެގަވޮޓްގެ ސޯލަރ ޕީވީ ނިޒާމުގެ މަސައްކަތަކީ ވޯލްޑް ބޭންކްގެ އެހީގައި މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީއިން ހިންގާ އެކްސެލެރޭޓިންގް ސަސްޓެއިނަބަލް ޕްރައިވެޓް އިންވެސްޓްމަންޓްއިން ރިނިއުބަލް އެނާރޖީ (އެސްޕަޔަރ) ޕްރޮޖެކްޓްގެ ދަށުން ހިންގާ މަޝްރޫޢެކެވެ.

މި މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ރަސްމީ ދަތުރުފުޅެއްގައި މިހާރު ރާއްޖެ ވަޑައިގެން އުޅުއްވާ ވޯލްޑް ބެންކުގެ ނާއިބު ރައީސް މާޓިން ރައިޒަރ ވިދާޅުވީ، ހަކަތައިގެ ދާއިރާއިން ރާއްޖެއިން ކުރަމުންދާ މަސައްކަތުގައި ބައިވެރިވުމަކީ ވޯލްޑު ބޭންކަށް ލިބޭ ފަޙުރެއް ކަމަށެވެ. އަދި ރާއްޖޭގައި އިއާދަކުރަނިވި ހަކަތައިގެ ދާއިރާއިން ވޯލްޑު ބޭންކާއި ގުޅިގެން ކުރިއަށްގެންދާ މަޝްރޫޢުއަކީ ވަރަށް ކާމިޔާބު މަޝްރޫޢެެއް ކަމަށާއި، މިހާރު ރާއްޖޭގައި ކުރިއަށްގެންދާ މަޝްރޫޢާއި އެކު ރާއްޖެ ފަދަ އެހެން ޤައުމުތަކުގައި މި މަސައްކަތްކުރިއަށް ގެންދިޔުމަށް އެހީތެރިވެދޭނެ ކަމަށް މާޓިން ފާހަގަކުރެއްވިއެވެ.

"ރާއްޖޭގައި ކުރިއަށް މިދަނީ ވޯލްޑު ބޭންކަށް ޕައިލެޓު ޕްރޮޖެކްޓެއް، މި ޕްރޮޖެކްޓުން ދަސްވާ ކަންތައްތައް ރާއްޖެ ފަދަ އެހެން ޤައުމުތަކުގައި ހިންގާ ޕްރޮޖެކްޓުތަކުގައި ބޭނުންކުރެވޭނެ،" މާޓިން ވިދާޅުވިއެވެ.

އެސްޕަޔަރ ޕްރޮޖެކްޓުން ދަސްވެފައިވާ ބައެއް ކަންތައްތަކުގެ ތަފްސީލްތައްވެސް މާޓިންވަނީ ދީފައެވެ. އެގޮތުން މި ޕްރޮޖެކްޓު ކާމިޔާބުކަމާއެކު ކުރިއަށްގެންދިޔުމަށް އިންވެސްޓަރުން ހޯދުމަށްވެސް ގިނަ މަސައްކަތްތަކެއް ކުރެވިގެންދިޔަކަން މާޓިން ފާހަގަކުރެއްވިއެވެ.

"ޕްރޮޖެކްޓު ކުރިއަށްގެންދިޔުމަށް ރާވާލީ ތަފާތު ގޮތަކަށް، މިއާއެކު ރާއްޖެ ފަދަ ޤައުމެއްގައި ކުރިއަށްގެންދާ މިފަދަ ކުޑަ މަޝްރޫޢަކަށްވެސް ޕްރައިވެޓް އިންވެސްޓަރުން ޝައުގުވެރިކަން ފާޅުކުރި،" މާޓިން ވިދާޅުވިއެވެ.

އެސްޕަޔަރގެ ދެވަނަ ފިޔަފަހީގެ ދަށުން ހުޅުލެ-ހުޅުމާލޭގައި 5 މެގަވޮޓްގެ އިރުގެ އަލިން ހަކަތަ އުފައްދާ ނިޒާމެއް ޤާއިމްކުރުމަށް ހުޅުވާލި ފުރުޞަތުގައި 21 ކުންފުންޏަކުން ވަނީ ޝައުޤުވެރިކަން ފާޅުކޮށްފައެވެ. އަދި ވާދަވެރި ބީލަމެއްގެ ތެރެއިން ފަންނީ އަދި މާލީ ޤާބިލުކަމުގެ އިތުރުން އެންމެ ކުޑަ އަގެއް ހުށަހަޅައިގެން މި މަސައްކަތުގެ ބީލަން ކާމިޔާބު ކުރީ ތައިލޭންޑްގެ އެންސިސް ކޯ ލިމިޓެޑުންނެވެ.

އެންސިސް ކޯ ލިމިޓެޑުންވަނީ ސޯލަރ ޕީވީ ޖެހުމަށް ލިންކް ރޯޑްގު މެދުގައި އޮންނަ ހުސް ސަރަހައްދުގެ އިތުރުން އިރުމަތީ ފަރާތު މޫދާވީ ފަޅީގައި ސްޓީލް ސްޓްރަކްޗަރ އެއް ޤާއިމުކޮށްފައެވެ. މި ސްޓްރަކްޗަރގެ މަތީގައި ސޯލަރ ޕީވީ މޮޑިއުލްތައް ހަރުކޮށް ނިންމައި ޕެނަލްތަކުން ކަރަންޓް އުފައްދަން ފަށާނެކަމަށް އަންދާޒާ ކުރެވެނީ 2023 ވަނަ އަހަރުގެ 2 ވަނަ ކުއާރޓަރ ނިމުމުގެ ކުރިންނެވެ.