މަންޓާ އެއަރގެ ސީޕްލޭން އޮޕަރޭޝަން އިތުރަށް ފުޅާކުރުމަށްޓަކައި، 12 ބޯޓު ހޯދުމުގެ މަސައްކަތް ފަށައިފިއެވެ.
މަންޓާއިން މިހާރު ވަނީ 12 ޑީ.އެޗް.ސީ 6، ޓުވިން އޮޓޯ އެއަރ ކްރާފްޓް ކުއްޔަށް ނުވަތަ ގަންނަން އިއުލާންކޮށްފައެވެ. އަދި މިކަމަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓްރެސްޓު އަންނަމަހުގެ 15 ވަނަ ދުވަހުގެ ކުރިން ހުށަހެޅުމަށްވެސް އެ އެއަރލައިނުން ބުނެއެވެ.
މަންޓާގެ ސީ-ޕްލޭން ފްލީޓުގައި މިހާރު 16 އެއަރކުރާފްޓު އޮވެއެވެ. މަންޓާއިން ބުނީ އިތުރަށް 12 ސީޕްލޭން ހޯދުމުގެ މަސައްކަތްކުރަނީ ޑިމާންޑާއި އެއްވަރަށް ޙިދުމަތް ދިނުމަށް ކަމަށެވެ.
މަންޓާއިން މިހާރުދަނީ ރާއްޖޭގެ 17 ރިސޯޓަކަށް އުދުހުންތައް ބާއްވަމުންނެވެ. އެހެންނަމަވެސް ކުރިއަށް އޮތްތަނުގައި އިތުރު ރިސޯޓުތަކަށް އުދުހުންތައް ބޭއްވުމަށް މަންޓާއިން ދަނީ ތައްޔާރުވަމުންނެވެ.
ސީޕްލޭން ޚިދުމަތުގެ އިތުރުން ޑޮމެސްޓިކް ދަތުރުތައްވެސް މަންޓާ އެއަރއިން އަންނަނީ ކުރަމުންނެވެ. ޑޮމެސްޓިކް ދަތުރުތަކުގައި މަންޓާއިން ބޭނުންކުރަނީ އޭޓީއާރު މަރުކާގެ ބޯޓުތަކެވެ. މަންޓާ އެއަރއަކީ ރާއްޖޭގެ އެތެރޭގެ އުދުހުންތަކަށް ޚާއްސަކޮށްގެން ރާއްޖޭގައި އޮޕަރޭޓްކުރާ 3 ވަނަ އެއަރލައިންނެވެ.