މިހާރު ކުރިއަށްދާ ތަރައްޤީގެ މަޝްރޫޢުތަކާއެކު މަސްވެރިން ބޭނުންވާ ފެންވަރަށް ޙިދުމަތްތައް ދެވިގެންދާނެކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
މިފްކޯގެ ސީއީއޯ އިސްމާއިލް މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.
ސަރުކާރުން ދަނީ މިފްކޯގެ ކެޕޭސިޓީ އިތުރުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯގެ މަސް ގަންނަ ފެސިލިޓީތައް ތަރައްޤީކުރުމާއި މަސް ގަންނަ އިތުރު ބޯޓުތައް ހޯދުމުގެ މަސައްކަތް ހިމެނެއެވެ.
ކެޕޭސިޓީ އިތުރުކުރުމަށް ކުރަމުންދާ މަސައްކަތްތަކާއި ގުޅޭގޮތުން މައުލޫމާތުދެއްވަމުން ސީއީއޯ އިސްމާއިލް ފައުޒީ ވިދާޅުވީ، މިފްކޯގެ ތަރައްޤީއަށް މި ސަރުކާރުން ކުރިއަށްގެންދާ 2 ބިލިއަން ރުފިޔާގެ އިންވެސްޓްމަންޓާއެކު މަސް ގަތުމުގެ ކެޕޭސިޓީއަށް ބޮޑު ކުރިއެރުމެއް ލިބިގެންދާނެ ކަމަށެވެ. އެގޮތުން ކޫއްޑޫ އަދި ފެލިވަރު އިތުރަށް ތަރައްޤީކުރުމާއި، އިތުރު ފެސިލިޓީތައް ގާއިމްކުރުމުގެ މަސައްކަތާއެކު، ފްރީޒިންގ ކެޕޭސިޓީ 1300 ޓަނާއި ހަމައަށް އިތުރުވެގެންދާނެކަމަށް އިސްމާއިލް ވިދާޅުވިއެވެ.
"އެއީ ވަރަށް ރަނގަޅު އަދަދެއް، ދެން 14000 ޓަނާ ހަމައަށް އެބައާދެ މިފްކޯގެ ސްޓޯރޭޖް ކެޕޭސިޓީ، އެއީ ތިނަދޫގައި އަލަށް އަންނަ ފެސިލިޓީގައި 1000 ޓަނުގެ ކޯލްޑު ސްޓޯރޭޖެއް، 120 ޓަނުގެ ބްރައިން ފްރީޒިންގ، އެހެންވީމަ 2 ޝިފްޓަށް 240 ގަނެވޭނެ، މުލަކުގެ ފެސިލިޓީގައިވެސް 240 ޓަނު ގަނެވޭ، ދެން އިހަވަންދޫގައިވެސް ފެސިލިޓީއެއް ގާއިމްކުރެވޭ،" އިސްމާއިލް ވިދާޅުވިއެވެ.
ފެލިވަރު ތަރައްޤީކުރުމަށްވެސް ބިޔަ މަޝްރޫޢެއް ސަރުކާރުން ވަނީ ފަށާފައެވެ. މި މަޝްރޫޢާއި ގުޅޭ ތަފްސީލްތައް ދެމުން، އިސްމާއިލް ވިދާޅުވީ، މި މަސައްކަތް ކުރިއަށްގެންދިޔުމަށް ރޭވިފައިވަނީ 2 ބަޔަކަށް ބަހާލައިގެން ކަމަށާއި، ފުރަތަމަ ކުރިއަށްދަނީ މަސް ގަތުމުގެ ފެސިލިޓީއާއި ކޯލްޑު ސްޓޯރޭޖްގެ މަސައްކަތް ކަމަށެވެ.
"ފެލިވަރުގެ ކެޕޭސިޓީ ގާތްގަނޑަށް 300 ޓަނާއި ހަމައަށް އެބަ އާދޭ، ފްރީޒިންގ ކެޕޭސިޓީ، އަދި ސްޓޯރޭޖް ކެޕޭސިޓީ 4000 ޓަނާއި ހަމައަށް އާދޭ، މިހާރު ހުރީ 700 ޓަނުގެ ވަރަށް ކުރީގެ ކޯލްޑު ސްޓޯރޭޖެއް، މެއިންޓެއިން ކުރަންވެސް ދަތިތަކާއި ދިމާވޭ،" އިސްމާއިލް ވިދާޅުވިއެވެ.
އިސްމާއިލް ވިދާޅުވީ އުއްމީދަކީ މި މަޝްރޫޢުތަކާއެކު މަސްވެރިން ބޭނުންވާ ފެންވަރަށް ޙިދުމަތްތައް ދިނުންކަމަށާއި، ކިއުގައި ނުޖެހި މަސް ކިރުވުމުގެ މަސައްކަތްތައް ކުރިއަށްދާނެ ކަމަށެވެ.
މަސް ކިރުވުމަށް އިތުރު 3 ބޯޓު މިފްކޯއިން ވަނީ ދާދިފަހުން ގަނެފައެވެ. އެ ބޯޓުތައް ރާއްޖެއަށް ގެނައުމުގެ މަސައްކަތްކުރިއަށްދާއިރު، މި ބޯޓުތަކުގައި 60 ޓަނުގެ މަސް ފްރީޒް ކުރުމުގެ ކެޕޭސިޓީ ގާއިމްކުރުމަށްވެސް ހަމަޖެހިފައިވާ ކަމަށް އިސްމާއިލް ވިދާޅުވިއެވެ.
މިފްކޯއިން މިގެންނަ މަސް ބޯޓުތައް ހަރަކާތްތެރިވާނީ އުތުރުގައި ކަމަށާއި، އުތުރުން މަސް ގަތުމުގެ މަސައްކަތްކަށް މި ބޯޓުތަކާއެކު އުތުރުގެ މަސްވެރިންނަށް މަސް ކިރުވުމުގައި ގިނަ ލުއިތަކެއް ލިބިގެންދާނެކަމަށް މިފްކޯއިން ދެކެއެވެ.