ނޯޑިކްގެ ޓްރެވަލް ޓްރޭޑް އަދި ކޮންސިއުމަރ މާކެޓުގައި ރާއްޖެ އިޝްތިހާރުކުރުމަށް މަޓްކާ ނޯޑިކް ޓްރެވަލް ފެއަރގައި ރާއްޖެއިން ބައިވެރިވެއްޖެއެވެ.
މި ފެއަރ ކުރިއަށްދަނީ މިމަހުގެ 19 - 22ގެ ނިޔަލަށް ފިންލޭންޑްގެ މެސޫކެސްކަސް ހެލްސިންކީ އެކްސްޕޯ އެންޑް ކޮންވެންޝަން ސެންޓަރުގައެވެ. މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއާ އެކު މި ފެއަރގައި 13 އިންޑަސްޓްރީ ޕާޓްނަރުން ބައިވެރިވެފައިވެއެވެ. އެމްއެމްޕީއާރުސީން މި ފެއާގައި މި އަހަރު ބައިވެރިވަނީ 2 އަހަރުގެ މެދު ކެނޑުމަކަށް ފަހުއެވެ.
މަޓްކާ އަކީ އުތުރު ޔޫރަޕްގެ އެންމެ ބޮޑު ޓްރެވަލް ފެއަރއެވެ. މި ފެއަރގައި 80 އަށް ވުރެ ގިނަ ގައުމުން 1000 އަށް ވުރެ ގިނަ ޓްރެވަލް އޯގަނައިޒަރުންނާއި ޑެސްޓިނޭޝަންތަކާއި ޓޫރިޒަމް އޯގަނައިޒޭޝަންތައް ބައިވެރިވެއެވެ. މި ޓްރެވަލް ފެއަރގައި 68،000 އަށް ވުރެ ގިނަ ވިޒިޓަރުން ބައިވެރިވާނެ ކަމަށް ލަފާކުރެއެވެ. މިފެއަރގައި ބައިވެރިވުމަކީ ނޯޑިކް މާކެޓުގައި ދިވެހިރާއްޖޭގެ ބްރޭންޑް ވަރުގަދަކުރުމަށް ލިބޭ ބޮޑު ފުރުސަތެއްގެ ގޮތުގައި އެމްއެމްޕީއާރުސީން ދެކެއެވެ.
މި ފެއަރގެ ރާއްޖޭގެ ސްޓޭންޑު ފަރުމާކޮށްފައިވަނީ، ރާއްޖޭގެ ޖަޒީރާ ރަށްތަކުގެ ރީތިކަމާއި އަމާންކަން ތަމްސީލުކޮށްދޭ ގޮތަށެވެ. އަދި މި ސްޓޭންޑަކީ އިންޑަސްޓްރީގެ ބައިވެރިންނާއި ފެއަރގެ ބައިވެރިންގެ ދެމެދުގައި ބައްދަލުވުންތައް ބޭއްވޭގޮތަށް ފަރުމާކޮށްފައިވާ ސްޓޭންޑެކެވެ.
ރާއްޖޭގެ ސްޓޭންޑަށް ޒިޔާރަތްކުރާ ފަރާތްތަކަށް ސަގާފީ ސެޓްއަޕެއްގައި ޚާއްސަ ސޯޝަލް މީޑިއާ ފިލްޓަރުތައް ބޭނުންކޮށްގެން ފޮޓޯނަގާ ސޯޝަލް މީޑިޔާ އެކައުންޓްތަކުގައި ޕޯސްޓް ކުރުމަށް ފުރުސަތު ލިބޭނެއެވެ. މީގެ އިތުރުން ސްޓޭންޑަށް ޒިޔާރަތްކުރާ ފަރާތްތަކަށް ކެލިގްރަފީ ބުކްމާކެއް ހަދިޔާކޮށް، ދިވެހިރާއްޖޭގެ މީރު ރަހަތައް ތަޖްރިބާކުރުމުގެ ފުރުސަތު ވެސް ލިބޭނެކަމަށް އެމްއެމްޕީއާރުސީން ހާމަކުރެއެވެ.
މަތީ ފަންތީގެ ފަތުރުވެރިން ގިނަ ނޯޑިކް މާކެޓަކީ ދިވެހިރާއްޖެއަށް ވަރަށް އުންމީދީ މާކެޓެކެވެ. މިދިޔަ އަހަރު 30,493 ފަތުރުވެރިން ވަނީ ނޯޑިކް މާކެޓުން ރާއްޖެއަށް ޒިޔާރަތްކޮށްފައެވެ. މި މާކެޓަށް އަމާޒުކޮށް އެމްއެމްޕީއާރުސީއިން ވަނީ މިދިޔަ އަހަރު ގިނަ ކެމްޕޭންތަކެއް ހިންގާފައެވެ. އޭގެ ތެރޭގައި ބްލިކްސަން ޓުއާސް އާއެކު ކުރިއަށްގެންދިޔަ ޖޮއިންޓް ކެމްޕޭނަކާއި ފެމިލަރައިޒޭޝަން ދަތުރެއްގެ އިތުރުން ނޯޑިކް ޓްރެވަލް ޓްރޭޑަށް އަމާޒުކޮށްގެން ވެބިނާއެއް ވެސް ކުރިއަށް ގެންގޮސްފައިވެއެވެ. މި އަހަރު ވެސް ގިނަ ކެމްޕޭންތަކެއް މި މާކެޓަށް އަމާޒުކޮށްގެން ކުރިއަށް ގެންދިއުމަށް ވަނީ ރާވާފައެވެ.
2022 ވަނަ އަހަރު އެމްއެމްޕީއާރުސީން ޖުމްލަ 176 ހަރަކާތް ހިންގާފައިވާއިރު، މީގެތެރޭގައި 90 މާކެޓިންގ ކެމްޕޭން، 42 ފެއަރގައި ބައިވެރިވުން، 06 ރޯޑްޝޯ ހޯސްޓުކުރުން، 10 ވާޗުއަލް އިވެންޓް، 18 ފެމިލަރައިޒޭޝަން ދަތުރު، އަދި 10 އެހެނިހެން އިވެންޓްތައް ދުނިޔޭގެ އެކި ކަންކޮޅުތަކުގައި ވަނީ ހިންގާފައެވެ.