ކުރީގެ މޮޅު ކުޅުންތެރިންނާއެކު ވެލެންސިޔާގެ ވެޓަރެންސް ޓީމް ދެ މުބާރާތެއްގައި ވާދަކުރަން މެލޭޝިޔާއަށް ހިނގައްޖެއެވެ. ރޭ މެލޭޝިޔާއަށްދިޔަ ވެލެންސިޔާގެ ވެޓަރެންސް ޓީމް ވާދަކުރާނީ ވެޓަރެންސް މުބާރާތާއި، މާސްޓަރ ވެޓަރެންސް މުބާރާތުގައެވެ. މާސްޓަރ ކެޓަގަރީއަކީ 50 އަހަރުން މަތީގެ ކުޅުންތެރިން ވާދަކުރާ ކެޓަގަރީއެކެވެ.
އެކުގައި ޕްރެކްޓިސް ކުރާތާ ގިނަ ދުވަސްތަކެއްވެފައިވާ ވެލެންސިޔާގެ ވެޓަރެންސް ޓީމްގައި މިފަހަރު މީގެކުރިން އެކްލަބަށް ކުޅުފައިނުވާ ކުޅުންތެރިންނާއި، ވެލެންސިޔާގެ ތަރިން ހިމެނެއެވެ. ވެލެންސިޔާއަށް ކުރިން ކުޅުނު ކުޅުންތެރިންގެ ތެރެއިން މިޓީމްގައި ހިމެނޭ ކުޅުންތެރިންގެ ތެރޭގައި ކުރީގެ ކެޕްޓަން އަސްއަދު އަބުދުލްޣަނީ، މުޚުޠާރު ނަސީރު، ކީޕަރު އަސްލަމް އަބުދުއްރަހީމް، މުޙައްމަދު ނިޒާމް، އަލީ ރަޝީދު ( ސިލާޗީ )، މުޙައްމަދު އިބްރާހީމް ( ދޮންބެ )، އަދި ހީނާ އަހުމަދު ސަލީމް ހިމެނެއެވެ. ވެލެންސިޔާއަށް ކުރިން ކުޅެފައިނުވާ ކުޅުންތެރިންގެ ތެރޭގައި ނިއުރޭޑިއަންޓްގެ ކެރިއަރު ނިންމާލި އެޓީމްގެ ކުރީގެ ކެޕްޓަނުންކަމަށްވާ އިބްރާހީމް ރަޝީދާއި، މުޙައްމަދު ކަލީމާއި، އަހުމަދު އިރުފާން ފާހަގަކޮށްލެވެއެވެ.
ވެލެންސިޔާއާއި ނިއުރޭޑިއަންޓާއި، ހުރައަށް ކުޅުނު ރާއްޖޭގެ ކުރީގެ އެންމެ މޮޅު ކުޅުންތެރިޔާ މޫސާ މަނިކު ( ކުޑަ މޫސަ ) ވެސް މިޓީމްގައި ހިމެނެއެވެ.