ތިލަދުންމަތީ އުތުރުބުރީ އުތީމަށް އުފަންވެވަޑައިގެންނެވި ދިވެހިންގެ ޤައުމީ ބަޠަލް އައްސުލްތާން މުޙައްމަދު ތަކުރުފާނުލް އަޢުޒަމް، ބޮޑުތަކުރުފާނާއި، އެތަކުރުފާނުގެ ޢާއިލާ ދިރިއުޅުއްވި ގެކޮޅު ނުވަތަ މިހާރުގެ ގޮތުންނަމަ އުތީމު ގަނޑުވަރަކީ ދިވެހިންގެ ފަޚުރެކެވެ.
ރާއްޖޭގެ ގިނަ ރަށްރަށުގައި ބަނދަރު ހެއްދެއިރު އުތީމުގައި ބަނދަރެއް ނުހައްދަވައި އޮތުމަށްފަހު އެރަށުގައި ބަނދަރު ހެއްދެވުމުން އައި ބަދަލުތަކުގެ ތެރެއިން އެއް ބަދަލު ގުޅިފައިނީ ބޮޑުތަކުރުފާނުގެ ޢާއިލީ ގަނޑުވަރާއެވެ. އެއީ، ބަނދަރުގެ ފަސޭހައާއެކު އެ ގަނޑުވަރަށް ޒިޔާރަތްކުރާ މީހުން އިތުރުވާން ފެށުމެވެ.
ރާއްޖޭގެ ތާރީޚީ ތަންތަނުގެ ތެރެއިން އުތީމު ގަނޑުވަރަކީ، ވަރަށް ގިނަ ގޮތް ގޮތުން ޚާއްސަ، ސިފަތަކެއް ލިބިފައިވާ ގަނޑުވަރެކެވެ. ފައްސަތޭކަ ވަރަކަށް އަހަރުވެފައިވާ އުތީމު ގަނޑުވަރު ޚާއްސަ ވެގެންދާ ސަބަބުތަކުގެ ތެރޭގައި ތިލަދުންމަތީ އުތުރުބުރީ އުތީމަށް އުފަންވެވަޑައިގެންނެވި ދިވެހިންގެ ޤައުމީ ބަތަލު އައްސުލްޠާން މުޙައްމަދު ތަކުރުފާނުލް އައުޒަމް، ބޮޑުތަކުރުފާނާއި، އެތަކުރުފާނުގެ އާއިލާ ދިރިއުޅުއްވި ގެކޮޅަށް ވުމާއި، އެޒަމާނުގައިވެސް ހުރިގޮތަށް، އެ ގެކޮޅު މިހާތަނަށްވެސް މާބޮޑު ބަދަލެއް ނައިސް، ހުރުމެވެ. އެހެންކަމުން ރާއްޖޭގައި ބަޔަކު ދިރިއުޅުނު ކަމަށް ފެންނަންހުރި އެންމެ ގިނަދުވަސްވީ ގެކޮޅުގެ ގޮތުގައި އުތީމު ގަނޑުވަރު ފެނިގެންދާކަމީވެސް މިތަން ޚާއްސަވާ އެއްސަބަބެވެ.
img:http://s1.psmnews.mv/images/660x400/14571044959259.jpg|އުތީމުގެ ބަނދަރު ހެދުމުގެ ކުރިން އެރަށަށް އަރާ ފައިބާ އުޅުނުގޮތް- ފައިލް ފޮޓޯ: ޕީއެސްއެމް
ގަނޑުވަރުގެ ގޯތިތެރެއާއި އެތެރޭގައިވާ ބިނާތަކުންވެސް މީހުން ޝައުގުވެރިވާ ގިނަ ކަންތަތަކެއް ފާހަގަކުރެވެއެވެ. އުތީމު ގަނޑުވަރު ބަލައިލުމައްޓަކައި ޒަމާނުންސުރެ މީހުން ޒިޔާރަތް ކުރަމުންގެންދެއެވެ. ކުރިން ގަނޑުވަރު ބަލާލަން ޒިޔާރަތްކުރާ ފަރާތްތަކަށް އުތީމަށް ލަފާފުރުމުގައި އުނދަގޫ ގޮތްތަކެއް ކުރިމަތިވެ ގިނަ ފަހަރު މޫދަށް ވެއްޓިގެން ރަށަށް އަރަން ޖެހުނު ނަމަވެސް އަލަށް ހެދިގެންދިޔަ ބަނދަރާއެކު އެމައްސަލަ މިހާރުވަނީ ހައްލު ކުރެވިފައެވެ. ގަނޑުވަރަށް ޒިޔާރަތް ކުރާ މެހެމާނުންނަށް މަޢުލޫމާތު ފޯރުކޮށްދިނުމުގައި 13 އަހަރު ހޭދަކޮށްފައިވާ އަލީ ހާފިޒް ވިދާޅުވީ، ރާއްޖޭގެ އެކި ކަންކޮޅުތަކުން ގަނޑުވަރު ބަލާލުމައްޓަކައި މީހުން ޒިޔާތްތްކުރާކަމަށާއި، ނަމަވެސް އަލަށް ހެދިގެން ދިޔަ ބަނދަރާއެކު އެއަދަދު ދެގުނައަށް އިތުރުވެފައިވާކަމަށެވެ.
img:http://s3.psmnews.mv/images/660x400/14571072679597.jpg|އުތީމު ގަނޑުވަރު ބަލާލުމަށް ބަޔަކު އެ ގަނޑުވަރުގެ ގޯތިތެރޭގައި- ފައިލް ފޮޓޯ: ޕީއެސްއެމް
ސްކޫލުތަކުގެ ދަރިވަރުންނާއި، ޚާއްސަކޮށް އުތުރުގެ ރަށްރަށުން ބޮޑެތި ބޯޓުފަހަރުގައި ގަނޑުވަރު ބަލާލުމަށް ޒިޔާރަތް ކުރަމުންގެންދާކަން ގަނޑުވަރު ބަލަހައްޓަވާ ހަނދާނީ މަރުކަޒުން ވިދާޅުވެއެވެ. ގަނޑުވަރުގެ ޚާއްސަ ތަންތަނަށް ބަލާއިރު، އެންމެ ބޮޑުކޮށް ހުރީ، އުތީމު ތިން ބެއިންނާއި، ފާތިމާފާނު އުޅުއްވާ ބޮޑުފުޅުވި ބޮޑު ގެކޮޅެވެ. ގޮކޮޅުގައި ހުރި ބޮޑު އައްޓާއި، ގެންގުޅުއްވި ބައެއް ސާމާނު މީހާރުވެސް ހަމަ އެގޮތަށް ހުރިކަން ފާހަގަވެއެވެ. އެ ގަނޑުވަރުގެ ދެކުނުފަރާތުން ހިނގާ މީހުންގެ ހިޔަނި ފެންނާނެހެން ބޮޑުގެކޮޅުގައި، ޕިން ހޯލް ކެމެރާއެއްގޮތަށް ހަދާފައިވާ ތަނަކީވެސް ފާހަގަކޮއްލެވޭ ތަނެކެވެ. ދުނިޔޭގެ އެހެން ތަންތަނުގައިވެސް ޕިން ހޯލް ތިއަރީ ބޭނުންކުރެއެވެ. ނަމަވެސް އުތީމު ގަނޑުވަރުގެ ބޮޑު ގެކޮޅުގައި ހުންނަ މި ތަނުގެ ސަބަބުން ދިވެހިންގެޒަމާންވީ ހުނަރުވެރިކަމާއި ޤާބިލުކަން ފެނިގެންދެއެވެ.
ބޮޑުތަކުރުފާނުގެ ދައިތާފުޅު އުޅުއްވި މަރިޔާދު ގެކޮޅުން ވެސް ޚާއްސަކަމެއް ފެންނަހުރެއެވެ. ބުނެވޭ ގޮތުގައި އުތީމު ތިން ބެއިން ރާއްޖެ އިސްލާމް ކުރެއްވުމުގެ މަތިވެރި ޖިހާދު ފެއްޓެވުމަށްޓަކައި އާއިލާގެ ބޭފުޅުން މަލިކަށް ގެނދެވިރޭ މަރިޔާދުގޭގެ ދެކުނު ކޮޅުގައި ހުންނަ ދޮރުކޮޅު، ހަސަން ތަކުރުފާނު ތުއްޕުޅު ކަލާފާނު އުރުވަޑުވައިގެން ނުކުމެ ލެއްޕެވިފަހުން އަދިވެސް މިދޮރުކޮޅު ހުރީ ޖެއްސެވި ގޮތަށެވެ. ގަނޑުވަރުގެ އަށިގެކޮޅު ކުރިމަތީގައި ހުރި ލެއްގި ވަޅޭ ކިޔާ ވަޅުގެ ސާފުކަމާއި، ހިރިގަލުގެ މަސައްކަތަކީވެސް ފާހަގަކޮށްލެވޭ ކަންކަމެވެ. ގަނޑުވަރުގެ ސަލާމަތައްޓަކައި ކޮންމެހެން ކުރަންޖެހުނު މަރާމާތެއް ނޫން ބަދަލެއް މިހާތަނަށްވެސް ގެނެސްފައެއްނުވާކަމަށް ގަނޑުވަރު ބަލަހައްޓާ ފަރާތްތަކުން ވިދާޅުވެއެވެ.
img:http://s3.psmnews.mv/images/660x400/14571046711432.jpg|އުތީމު ގަނޑުވަރު- ފައިލް ފޮޓޯ: ޕީއެސްއެމް
އުތީމުގައި ބޮޑު ތަކުރުފާނާއި ގުޅުންހުރި އިތުރުތަންތަންވެސް އުތީމުގައި ހުރެއެވެ. އޭގެ ތެރޭގައި ގަނޑުވަރު ކައިރިން އަތިރިއަށްވާގޮތަށް ބޮޑުތަކުރުފާނު ވިޔުއްވާ ހަރުގައި ޖެއްސެވި ކަޑަރޯވެގެން ހެދިފައިފައި ހުރި ބޮޑު ކާނި ގަހާއި، އުތީމު ތިން ބެއިންނާއި ބައްޕާފުޅު ހުސެއިން ޚަތީބު ތަކުރުފާނު ނަމާދު ކުރެއްވި ކަނދުވަލު މިސްކިތްވެސް ފާހަގަކުރެވެއެވެ.
16 ވަނަ ގަރުނުގެ މެދުތެރޭގައި ރާއްޖެއަށް އަތްގަދަ ކޮއްލި ޕޯޗުގީޒުންނާއި ހަނގުރާމަ ކުރައްވައި ރާއްޖޭގެ މިނިވަންކަމާއި، ޒަމާނުންސުރެ ޤާއިމްވެފައިވާ އިސްލާމްދީނުގެ ހައްގުގައި ޖިހާދުކުރައްވާ 15 އަހަރުގެ އަނދިރި އަޅުވެތި ކަމަކުން ރާއްޖެ ސަލާމްތްކޮށްދެއްވި، މުޙައްމަދު ތަކުރުފާނުގެ ޒުވާން ދުވަސްވަރު ދިރިއުޅުއްވި ގެކޮޅު ނުވަތަ އުތީމުގަނޑުވަރަކީ، އުތީމު ތިންބެއިންގެ ހަނދާންތައް ދިވެހިންގެ ހިތްތަކުން އަބަދުމެ ނުފިލާ ހުންނަކަން ހާމަކޮށްދޭ ރިވެތި މިސާލެކެވެ.
އުތީމަށް ފަތުރުވެރިޔަކު އަޔަސް އަދި ހަމަ އެހެންމެ ރަށުންބޭރުގެ މީހަކު ދާނަމަ ގަނޑުވަރު ބަލާލުމަކީ ކޮންމެހެންވެސް އެފަދަމީހުން ކުރާކަމެކެވެ. މިއަދާހަމައަށް އުތީމު ގަނޑުވަރަށް ބޮޑުބަދަލެއް ނައިސް އިހުގެ ގޮތަށް ފެންނަހުރީ ވޭތުވެދިޔަ ސަރުކާރުތަކުންނާއި، އުތީމު ރައްޔިތުން ގަނޑުވަރުގެ މިކަމައް ސަމާލުކަން ދެއްވައި މިފަދަ ބިނާތަކުން ރާއްޖޭގެ ތާރީޚު ދައްކުވައިދެއްވުމަށް ކުރައްވާ މަސައްކަތުންނެވެ.