ވަޒީފާ ދޭނެކަމަށް ބުނެ ދައުރުކުރަނީ ޙަޤީޤަތާއި ޚިލާފު މެސެޖުތަކެއް: ސައީދު

ފެނަކަ ކޯރޕަރޭޝަންގެ ނަމުގައި ދައުރުކުރަމުންދާ މެސެޖްތަކަކީ ޙަޤީޤަތާއި ޚިލާފު މެސެޖުތަކެއްކަމަށް އެކުންފުނީގެ މެނޭޖިންގ ޑިރެކްޓަރ އަޙްމަދު ސައީދު މުޙައްމަދު ވިދާޅުވެއްޖެއެވެ.

ސައީދު މިހެން ވިދާޅުވީ، ފެނަކަ މެނޭޖިންގ ޑިރެކްޓަރުގެ ނަމުގައި އެކި މީހުންނަށް ވަޒީފާ ހުށަހަޅަމުން އަންނަ މެސެޖުތަކެއް ސޯޝަލް މީޑިއާގައި ދައުރުވަމުންދާތީއެވެ.

މިކަމާގުޅިގެން ކުރެއްވި ޓުވީޓެއްގައި ސައީދު ވިދާޅުވީ، އޭނާގެ ނަމުގައާއި ފެނަކަ ކޯރޕަރޭޝަންގެ ނަމުގައި ދައުރުވަމުންދާ މެސެޖުތަކަކީ އެއްވެސް ޙަޤީޤަތެއް ނެތް އަދި އެ ކޯރޕަރޭޝަންގެ އަގު ވައްޓާލަން ހިންގާ ނާތަޙުޒީބު ފިނޑި އަމަލެއް ކަމަށެވެ.

Alhuganda Fenaka nan beynun kohggen dhauru kuramundhaa message thaka kee ehvves hageegatheh neiy alhugandu ge aburu kathilumah adhi Fenaka ge agu vattalan hinga naathahuzeebu findi amaleh. Efadha ehvves muaamalathe nuhingaane kamuge yageen kan lobuvethi rayyithunnah aruvan.

— Ahmed Saeed Mohamed (@myfoona) June 25, 2023

ސައީދު ވަނީ އެފަދަ އެއްވެސް މުޢާމަލާތެއް ނުހިންގާނެކަމުގެ ޔަޤީންކަން ދިވެހި ރައްޔިތުންނަށް އަރުވާކަމަށް ވިދާޅުވެފައެވެ.

ފެނަކަ ކޯރޕަރޭޝަންގެ ނަމުގައި މީގެކުރިންވެސް ޙަޤީޤަތާއި ޚިލާފު މިފަދަ މެސެޖުތަކެއް ސޯޝަލް މީޑިއާގައި ދައުރުކޮށްފައިވެއެވެ. މިފަދަ ކަންކަމަށް ސަމާލުވުމަށް އެ ކޯރޕަރޭޝަނުން ވަނީ އާއްމުންގެ ކިބައިން އެދިފައެވެ.