މުޞްޙަފް އެންދި މައްސަލާގައި އޯއައިސީގެ ކުއްލި ބައްދަލުވުމެއް ބާއްވައި މަޝްވަރާކުރައްވައިފި
-
އޯއައިސީގެ ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގަތީ ސަފީރު މުޙައްމަދު ޚަލީލް
-
ރާއްޖެއިން ވަނީ އެ ޢަމަލު ކުށްވެރިކުރައްވާފައި
-
އިސްލާމީ މުޅި އުންމަތުންވެސް އަންނަނީ އެ ޢަމަލު ކުށްވެރިކުރަމުން
އަޟްޙާ ޢީދު ދުވަހާ ދިމާކޮށް ސްވިޑެންގައި މުޞްޙަފް އެންދުމާއިގުޅިގެން މިކަން އިތުރަށް ތަކުރާރު ވިޔަނުދިނުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން ބޭއްވެވި އޯ.އައި.ސީގެ ކުއްލި ބައްދަލުވުމުގައި ރާއްޖެއިން ބައިވެރިވެ އެކަންކަން ތަކުރާރު ނުވާނެ ކަންކަމާއި ގުޅޭގޮތުން މަޝްވަރާކުރައްވައިފިއެވެ. ޖިއްދާގައި ހުންނަ އޯއައިސީގެ މައި މަރުކަޒުގައި ބޭއްވެވި އެ ޖަމުޢިއްޔާގެ އެގްޒެކެޓިވް ކޮމިޓީގެ އޯޕަން-އެންޑެޑް ކުއްލި ބައްދަލުވުމުގައި ދިވެހިރާއްޖޭގެ ފަރާތުން އޯ.އައި.ސީ. އަށް ކަނޑައަޅުއްވާފައި ހުންނަވާ ދާއިމީ މަންދޫބު އަދި ދިވެހިރާއްޖޭގެ ފަރާތުން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު މުޙައްމަދު ޚަލީލް ބައިވެރިވެ ވަޑައިގަތެވެ.
މި ބައްދަލުވުމުގައި ސްވިޑެންގައި މުޞްޙަފް އެންދި މައްސަލައާ ގުޅޭގޮތުން އެ މަނިކުފާނު ވަނީ ތަޤްރީރު ކުރައްވާފައެވެ. އެމަނިކުފާނުގެ ތަޤްރީރުގައި އަޟްޙާ ޢީދު ދުވަހާ ދިމާކޮށް ސްވިޑެންގައި މުޞްޙަފް އަންދައި ހިންގައިފައިވާ މި ހަޑިހުތުރު އަމަލު ދިވެހި ސަރުކާރުން ހަރުކަށި އިބާރާތުން ކުށްވެރިކުރައްވާކަން ހާމަކުރެއްވިއެވެ.
މީގެ އިތުރުން މިފަދަ އިޙްތިރާމް ކުޑަ ޢަމަލު ތަކުރާރުވުމަކީވެސް މުޅި ދުނިޔޭގެ އެތައް މިލިއަން މުސްލިމުންގެ ދީނީ ޝުޢޫރުތަކަށް އަނިޔާވާ ކަމެއް ކަމަށާއި، ހަމައެކަނި ޚިޔާލުފާޅުކުރުމުގެ މިނިވަންކަމުގެ މައްޗަށް ބިނާކޮށް މިފަދަ އަމަލުތައް ހިންގުމަށް ހުއްދަ ދިނުމަކީ ބަލައިނުގަނެވޭނެ ކަމެއްކަމުގައި ފާހަގަކުރެއްވިއެވެ. އަދި އިސްލާމްދީނާ ދެކޮޅަށް ހިންގާ މިފަދަ ނަފްރަތު އުފެދޭ އަމަލުތައް ނިމުމަކަށް ގެނައުމަށްވެސް ދިވެހި ސަރުކާރުން ތަކުރާރުކޮށް ގޮވާލަމުންދާކަން ފާހަގަކުރެއްވިއެވެ.
މިޞްރާއި ސަޢޫދީ ޢަރަބިއްޔާއިން ވެސް ބުނީ މި އަމަލުން ހާމަ ވަނީ ސްވިޑެން ސަރުކާރުން ޚިޔާލުފާޅުކުރުމުގެ މިނިވަންކަމުގެ ނިވަލުގައި މުސްލިމުންނާ މެދު ނަފުރަތު އުފެއްދުމަށް ފުރުޞަތު ދެމުންދާ ކަން ކަމުގައެވެ. އަދި، މިއީ އެއްވެސް ހާލެއްގައި ބަލައިގަނެވޭނެ އަމަލެއް ނޫން ކަމުގައި މުސްލިމުން އުންމަތުން ދަނީ ބުނަމުންނެވެ.