ފެރިދޫ ސިއްޙީ މަރުކަޒުގެ އައު ޢިމާރާތާއެކު ޞިއްޙީ ޚިދުމަތަށް ބޮޑު ކުރިއެރުމެއް

ރަށެއްގެ ތަރައްޤީ އެންމެ ބޮޑަށް ގުޅެނީ އެރަށަކަށް ޢުމްރާނީގޮތުން ލިބޭ ކުރިއެރުމާއެވެ. އާބާދީ މަދުނަމަވެސް ކޮންމެ ރަށަކަކީވެސް އެރަށެއްގެ ރައްޔިތުންނަށް ހަމަޖެހިލައިގެން ދިރިއުޅެވޭނެ އަސާސީ ޚިދުމަތްތައް ލިބިފައިވާ ރަށްތަކަށް ހެދުމަށް ސަރުކާރުންވެސް އަންނީ ގިނަ ގުނަ މަސައްކަތްތަކެއް ކުރައްވަމުންނެވެ.

ރަށުގައި މުޅިން އަލަށް ހިންގޭ މަޝްރޫޢުތަކާއި، އަދި މިހާރު ހުރި ޚިދުމަތްތައް ޒަމާނާ އެއްގޮތަށް ފުޅާކުރުމަށް ގިނަ މަޝްރޫޢޫތައް އަންނަނީ ހިންގަމުންނެވެ. ރަށްރަށުގެ އާބާދީ އިތުރުވުމާއި، ފަތުރުވެރިކަންފަދަ ވިޔަފާރިތައް ފުޅާވަމުން އަންނައިރު، އެރަށެއްގެ ޚިދުމަތްތައްވެސް އެއާއި އެއްހަމައެއްގައި ކުރިއަރައިގެން ދިއުމަކީ ރައްޔިތުންގެ އެންމެ ބޮޑު އެދުމެވެ.

މިގޮތަށް ހުރި މަޝްރޫޢޫތަކުގެ ތެރެއިން ރަށްރަށުގެ ސިއްޙީ ޚިދުމަތްތައް އިތުރަށް ހަރުދަނާކުރުމަށް ބޭނުންވާ ގިނަ މަޝްރޫޢުތައް އަތޮޅުތަކުގައި އަންނަނީ ހިންގަމުންނެވެ. ރަށްރަށުގައި ހުރި ދުވަސްވީ ސިއްޙީ މަރުކަޒުތައް އިތުރަށް ތަރައްޤީކުރުމަށް ހިންގާ އެކްސްޓެންޝަން ޕްރޮޖެކްޓްތަކާއި، އެމްބިއުލާންސްގެ ޚިދުމަތަކީ ރަށްރަށަށް އެންމެ މުހިންމު ޚިދުމަތްތަކެވެ.

އއ.ފެރިދޫގައި މިހާރު ބޭނުންކުރަމުންދާ ސިއްޙީ މަރުކަޒުގެ އިމާރާތަކީ 2003ވަނަ އަހަރު ޚިދުމަތް ދޭންފެށި މަރުކަޒެކެވެ. ބަލިމީހުން ބެލުމާއި، އެޑްމިޓްކޮށްގެން ދޭންޖެހޭ ފަރުވާއާއި އަދި މަރުކަޒުގެ އިދާރީ މަސައްކަތްތައްވެސް ބަލަހައްޓަމުން އަންނަނީ އެ ކުޑަކުޑަ ޢިމާރާތުގައެއެވެ. މިކަން ސަރުކާރަށް ހުށައަޅާ ކުރެވުނު މަސައްކަތުން އެ ސިއްޙީ މަރުކަޒަށް ޖާގަ އިތުރުކުރުމުގެ މަސައްކަތް ސަރުކާރުން ވަނީ ކުރިއަށްގެންދަވާފައެވެ.

އެގޮތުން ސިއްޙީ މަރުކަޒުގެ އިދާރީ މަސައްކަތްތަކާއި، ޕަބްލިކް ހެލްޓް ނުވަތަ ޢާއްމު ސިއްޙަތާ ގުޅޭ ޚިދުމަތްތައް ދިނުމަށް އައު ޢިމާރާތެއް އަޅާ އެތަން މިހާރު ވަނީ ބޭނުންކުރަން ފަށާފައެވެ.

ސިއްޙީ މަރުކަޒު ހިންގެވުމާ ހަވާލުވެހުންނެވި، ސީނިއަރ އެޑްމިނިސްޓްރޭޓިވް އޮފިސަރ އަބްދުﷲ އަސްލަމް ވިދާޅުވީ، އައު ޢިމާރާތާއެކު ޖާގައިގެ މައްސަލައަށް ވަރަށް ބޮޑު ލުޔެއް ލިބިއްޖެކަމަށެވެ. އެގޮތުން އިދާރީ މުވައްޒަފުން މަސައްކަތް ކުރާ ޖާގައާއި، މީޓިން ރޫމާއި، ޕަބްލިކް ހެލްތް ޔުނިޓް އަދި ލޯންޑްރީއާއި ސްޓޯރޭޖް ރޫމެއްވެސް އައު ޢިމާރާތުގައި ގާއިމުކޮށްފައިވާކަމަށެވެ. މިއާއިއެކު ސިއްޙީ މަރުކަޒު ހިންގުމުގައި ކުރިމަތިވި ޖާގައިގެ ދަތިކަން ޙައްލުވެފައިވާކަމަށް އޭނާ ވިދާޅުވިއެވެ.

"800 މީހުންގެ އާބާދީއެއް އޮތް ރަށެއް މީ. ޚިދުމަތްތައް ވަސީލަތްތައް އިތުރުކުރެވޭނީ ޖާގަ ލިބިގެން. ކުރިން އެއް ޢިމާރާތެއްގައި ވަރަށް ޖާގަ ދަތިކޮށް ޚިދުމަތް ދެމުން އައީ. ސަރުކާރުގައި އަޅުގަނޑުމެން ދަންނަވައިގެން، އެންމެ ފުރަތަމަ އެކްސްޓެންޝަން ޕްރޮޖެކްޓްތަކުގައި ހިމެނިގެން މިރަށުގެ މަސައްކަތް މި ކުރިއަށް ދިޔައީ." އަސްލަމް ވިދާޅުވިއެވެ.

އަސްލަމް ވިދާޅުވީ އިދާރީ މަސައްކަތްތައް އައު އޮފީސް ޢިމާރާތަށް ބަދަލުކުރުމާއެކު ހުސްވި ޖާގަ، ކުއްލި ޙާލަތްތަކުގައި ފަރުވާދޭ ބައެއްގެ ގޮތުގައި ބޭނުނުކުރުމަށް ހަމަޖެހިފައިވާކަމަށެވެ. އެކަމުގެ ފްލޯ ޕްލޭން އެކުލަވާލާ މިނިސްޓްރީއާއި ގުޅިގެން އޭގެ މަސައްކަތްތައްވެސް ކުރަމުންދާކަމަށެވެ.

ފެރިދޫ ކައުންސިލްގެ ރައީސް އިސްމާޢީލް ޝާހު ވިދާޅުވީ ރަށުގެ ރައްޔިތުންގެ އިތުރުން، ރަށުގައި ފަތުވެރިކަން ފުޅާވެގެން އަންނައިރު ސިއްޙީ ޚިދުމަތް އިތުރަށް ރަނގަޅުވެގެން އައުން ރަށަށް ވަރަށް މުހިންމުކަމަށެވެ. ފެރިދޫގައި މިހާރުވެސް ބާރަވަރަކަށް ގެސްޓްހައުސް ހިންގަމުންއާދެއެވެ.

އެހެންކަމުން އެކަމުގެ މަޝްވަރާތައް އަތޮޅު ފެންވަރުގައިވެސް ސަރުކާރާއެކު ކުރިއަށްގެންދާކަމަށް ޝާހު ވިދާޅުވިއެވެ. މީގެދަށުން ކުރެވުނު މަސައްކަތްކުގައި ފެރިދުއަށް ވަނީ ޒަމާނީ އެމްބިއުލާންސްވެސް ސަރުކާރުން ފޯރުކޮށްދީފައެވެ.

"ސިއްޙީ ޚިދުމަތުގެ ފެންވަރު އިތުރަށް ރަނގަޅުކުރުމަށް އެކި ލެވަލްގައި އެބަ މަޝްވަރާ ކުރެވޭ. މިރަށުގައި ކުރިން އޮތް ދުވަސްވީ އެމްބިއުލާންސްގެ ބަދަލުގައި އެމްބިއުލާންސްވެސް ލިބިއްޖެ. ކުރިން މައްސަލަޖެހި ބައެއްފަހަރު ބޭނުންވެސް ނުކުރެވޭ. އެމަޖެންސީ ޚިދުމަތަށް މިއީ ވަރަށް މުހިންމު ޚިދުމަތެއް." ޝާހު ވިދާޅުވިއެވެ.

އެކްސްޓެންޝަން ޢިމާރާތާއެކު މިހާރު ރަށުގެ ރައްޔިތުން ކުރާ އެންމެ ބޮޑު އުއްމިދަކީ ރަށުގައި ތިބެގެން ކުދިކުދި ޓެސްޓްތައް ހެދޭނެ ޚިދުމަތް ލިބުމެވެ.

ފެރިދޫ ސިއްޙީ މަރުކަޒުގައި ޑޮކްޓަރަކާ 5 ނަރުހުން މަސައްކަތްކުރަމުން އާދެއެވެ. އެޑްމިޓްކޮށްގެން ފަރުވާ ދިނުމަށް 7 އެނދުގެ ވޯޑެއްވެސް ހިމެނެއެވެ. އެ ސިއްޙީ މަރުކަޒުގެ ޚިދުމަތް 16ގަޑިއިރު އަންނަނީ ދެމުންނެވެ. އެވަރެޖްކޮށް އަހަރަކު 4000އަށްވުރެ ގިނަ މީހުން ސިއްޙީ މަރުކަޒުން ޚިދުމަތް ހޯދައެވެ.