ޒަމާނީ ވަސީލަތްތަކާއެކު ހުޅުމާލޭ ހޮސްޕިޓަލުގެ އައިސީޔޫގެ ކެޕޭސިޓީ ދެގުނަ އިތުރުކުރަނީ

ހުޅުމާލޭ ހޮސްޕިޓަލްގެ އައިސީޔޫއާއި އެންއައިސީޔޫގެ ޚިދުމަތަށް އެނދު އިތުރުކޮށް، އެތަން އިތުރަށް ތަރައްޤީކުރުމަށް ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއާ ހަވާލުކުރައްވައިފިއެވެ.

ހުޅުމާލޭ ހޮސްޕިޓަލްގެ އައިސީޔޫއާއި އެންއައިސީޔޫގެ ކެޕޭސިޓީ އިތުރުކޮށް، ޙިދުމަތުގެ ފެންވަރު މަތިކުރުމުގެ މަސައްކަތް އެސްޓީއޯއާ ހަވާލުކޮށްފައި މިވަނީ ހުޅުމާލޭގައި އުޅޭ އާބާދީ ދުވަހަކަށްވުރެ ދުވަހެއް އިތުރުވަމުންގޮސްް، ސިއްހީ ހިދުމަތަށް އޮންނަ ޑިމާންޑުވެސް އުފުލެމުންދާތީއެވެ.

މީގެ 19 އަހަރުކުރިން ޚިދުމަތްދޭން ފެށި ހުުޅުމާލެ ހޮސްޕިޓަލްގައި، ފުރިހަމަ ސިއްޙީ ޚިދުމަތެއް ފޯރުކޮށްދީ އާ ޚިދުމަތްތައް ޤާއިމުކުރުމަށް އޮތް އެންމެ ބޮޑު ހުރަހަކީ ޖާގައާއި ވަސީލަތްތައް ނެތުމުގެ ދަތިކަމެވެ. ނަމަވެސް ހުޅުމާލެ ހޮސްޕިޓަލުން ޚިދުމަތް ހޯދާ މީހުންގެ ޢަދަދު އިތުރުވަމުންދިއުމުގެ ސަބަބުން ސަރުކާރުން ދަނީ ހުޅުމާލޭގައި އުޅޭ ރައްޔިތުންނަށް ފެންވަރު ރަނގަޅު ސިއްހީ ހިދުމަތްތަކެއް ފޯރުކޮށްދެއްވުމަށް މަސައްކަތްކުރައްވަމުންނެވެ.

ހުޅުމާލެ ހޮސްޕިޓަލް ތަރައްޤީކުރުމުގެ މަސައްކަތުގެ ދަށުން ސަރުކާރުން އެންމެފަހު ފެށި މަސައްކަތަކީ އެސްޓީއޯއާ ހަވާލުކުރެއްވި އެ ހޮސްޕިޓަލުގެ ކުއްލި ފަރުވާއަށް ބޭނުންވާ އައިސީޔޫއާއި އެންއައިސީޔޫގެ ކެޕޭސިޓީ އިތުރުކޮށް ތަރައްޤީކުރުމުގެ މަސައްކަތެވެ.

އައިސީޔޫއާއި އެންއައިސީޔޫ ހިމެނޭހެން މިހާރު އެ ހޮސްޕިޓަލްގައި ބޭނުންކުރަމުންދަނީ 17 އެނދެވެ. ނަމަވެސް މި މަޝްރޫޢުއާއެކު އައިސީޔޫއަށް އިތުރު 10 އެނދާ އެންއައިސީޔޫއަށް އިތުރު 14 އެނދު އިތުރުވެގެންދާނެކަމަށް ސަރުކާރުން ވިދާޅުވެއެވެ.

ސަރުކާރުން ވިދާޅުވީ ހުޅުމާލެ ހޮސްޕިޓަލަށް ގެންނަ ތަރައްޤީއާއެކު އައިސީޔޫގެ ވަސީލަތްތަކުގެ ކެޕޭސިޓީ ދެގުނަ އިތުރުވާނެކަމަށެވެ. އަދި މި މަޝްރޫއު ނިމޭއިރު، ހުޅުމާލެ ހޮސްޕިޓަލުގެ އައިސީޔޫ އަދި އެންއައިސީޔޫއަކީ އެންމެ ޒަމާނީ މެޑިކަލް ވަސީލަތްތަކާއި އާލާތްތަކާއެކު ޚިދުމަތްދެވޭ ތަނަކަށް ވެގެންދާނެކަމަށްވެސް ސަރުކާރުން ވިދާޅުވެއެވެ.

އެސްޓީއޯ ހެޑް އޮފީހުގައި ބޭއްވި ރަސްމިއްޔާތެއްގައި މި މަޝްރޫޢު ކުރިއަށްގެންދިއުމުގެ އެއްބަސްވުމުގައި ހުޅުމާލެ ހޮސްޕިޓަލްގެ ފަރާތުން ސޮއިކުރެއްވީ އެ ހޮސްޕިޓަލްގެ ސީއީއޯ މާރިޔާ ސައީދުއެވެ. އަދި އެސްޓީއޯގެ ފަރާތުން ސޮއިކުރެއްވީ އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ އަބްދުﷲ ސަޢީދުއެވެ.

މި މަސައްކަތުގެ އިތުރުންވެސް ހުޅުމާލެ ހޮސްޕިޓަލް ތަރައްޤީކުރުމަށް ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ހޮސްޕިޓްލުގެ އޮޕަރޭޝަން ތިއޭޓަރުތައް އިތުރުކުރުމުގެ ޕްރޮޖެކްޓާއެކު އެންމެ އޮޕަރޭޝަން ތިއޭޓަރެއްގެ ބަދަލުގައި 5 އޮޕަރޭޝަން ތިއޭޓަރު ހުންނާނެއެވެ. އަދި ކަށީ އޮޕަރޭޝަންތަކާއި ލޮލުގެ އޮޕަރޭޝަންތަކާއި އަންހެނުންގެ ބަލިތަކަށް ހާއްސަ އަދި އާންމު ސާޖަރީތައް އެ ހޮސްޕިޓަލްގައި ކުރެވޭނެކަމަށްވެސް ސަރުކާރުން ވިދާޅުވެއެވެ.

ހުޅުމާލޭ ހޮސްޕިޓަލުގައި މިހާރުވެސް ސަރުކާރުން ވަނީ މުހިއްމު ޚިދުމަތްތަކެއް ދޭން ފަށާފައެވެ. އެގޮތުން ނަފްސާނީ ބަލީގެ ފަރުވާއާއި، ކުޑަކުދީން ހެދިބޮޑުވުމުގައި ދިމާވާ ތަފާތު ސިއްހީ މައްސަލަތަކަށް ހާއްސަ ފަރުވާ ދިނުމަށް ވަކި ހާއްސަ ސެންޓަރެއްގެ އިތުރުން ކެންސަރު ބައްޔަށް ފަރުވާދޭ އޮންކޮލޮޖީ ސެންޓަރެއްގެ ޚިދުމަތްވެސް ދަނީ ފޯރުކޮށްދެމުންނެވެ.

ސަރުކާރުން ޤަބޫލުކުރައްވާ ގޮތުގައި މިހާރު ކުރިއަށްދާ މަސައްކަތްތަކާއެކު ހުޅުމާލެ ހޮސްޕިޓަލްގައި ދެމުންދާ ހިދުމަތްތަކަށް ބޮޑެތި ކުރިއެރުންތަކެއް ލިބި، ސިއްހީ ހިދުމަތް ހޯދުމަށް ހުޅުމާލޭގައި އުޅޭ ރައްޔިތުންނަށް ވަރަށް ބޮޑު ލުއި ފަސޭހައެއް ލިބިގެންދާނެއެވެ.