އާބާދީގައި 224، ތަރައްޤީގެ މަޝްރޫޢުތައް ކުރިއަށް!

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ މުހިންމު ސިޔާސަތުތަކުގެތެރެއިން އެމަނިކުފާނު އެންމެ އިސްކަމެއް ދެއްވާ އެއްކަމަކީ އެއްވެސް ރަށެއް ބާކީނުކޮށް ތަރައްޤީގެ މަޝްރޫޢުތައް ހިންގުމެވެ. ކުޑަރަށެއް ބޮޑުރަށެއް ތަފާތު ނުކުރެއްވުމެވެ. އެގޮތުން ރާއްޖޭގެ އެންމެ އާބާދީ ކުދި ރަށްރަށްވެސް ހިމެނޭހެން ތަރައްޤީގެ މަޝްރޫޢެއް ހިނގާފައި ނުވަތަ ހިނގަމުން ނުދާ ރަށެއް ނެތެވެ.

ސަރުކާރުގެ ތަރައްޤީގެ މަޝްރޫޢުތައް މިވަގުތުވެސް، ހިނގަމުން އަންނަ ރަށްރަށުގެތެރެއިން އަރިއަތޮޅު ދެކުނުބުރީ ދިއްދުއަކީ އެއްރަށެވެ. އެއީ ރާއްޖޭގެ އެންމެ އާބާދީ މަދު ރަށްރަށުގެތެރޭގައި ހިމެނޭ ރަށެކެވެ. ރަށުގެ މިހާރުގެ ޖުމުލަ އާބާދީއަކީ 224އެވެ. އެހެންނަމަވެސް ސަރުކާރުން އަންނަނީ އެރަށުގެ ތަރައްޤީއާއި ކުރިއެރުމަށްވެސް ގިނަ މަސައްކަތްތަކެއް ކުރައްވަމުންނެވެ.

ރަށުގައި މިވަގުތު ހަމަލޮލަށް ފެންނަމުންދާ، ތަރައްޤީގެ މަސައްކަތްތަކުގެ ތެރެއިން ރަށުގެ ބަނދަރުގެ މަޝްރޫޢު ފާހަގަކޮށްލެވެއެވެ. އެމަޝްރޫޢުގެ މަސައްކަތް މުޅިން ނިމި ބަދަނރު އަންނަނީ މިހާރު ބޭނުންކުރަމުންނެވެ. އެހެންނަމަވެސް ބަނދަރު ޑިޒައިންކޮށްފައިވާގޮތުން ހުޅަނގު މޫސުމުގެ ގަދަ ދުވަސްވަރު ބަނދުރުގެ އެތެރެއަށް ރާޅުވަދެ ގަދަވުމުގެސަބަބުން ދަތިތަކާ ކުރިމަތިލާންޖެހެއެވެ.

މިބަނދަރު ހަދާފައިވަނީ އޭރުގެ ރަށުކައުންސިލާ މަޝްވަރާކޮށްގެން ކައުންސިލުންވެސް އެއްބަސްވީގޮތަށްކަމަށް މަޢުލޫމާތު ލިބެއެވެ. އެހެންނަމަވެސް ފަހުން ބަނދަރަށް ބަދަލުތަކެއް ގެނައުމަށް ރައްޔިތުންނާއި ކައުންސިލުން ބޭނުންވިއެވެ. އެހެންނަމަވެސް އޭރު ބަނދަރުގެ މަސައްކަތް ފަށާފައިވުމާއެކު މަސައްކަތްކުރިއަށްގެންދިޔަ ހެވީފޯސްއިން އެބަދަލު ގެނެސްފައި ނުވެއެވެ.

ބަނދަރާގުޅޭ ޝަކުވާ ރަށުކައުންސިލުގެ ފަރާތުން ސަރުކާރަށް ހުށަހެޅުމާއެކު ސަރުކާރުންވަނީ ދިއްދޫ ބަނދަރު ފައިކަށި ހެދުމަށް ޕްލޭންކޮށް އެކަން ޢިއުލާންކޮށްފައެވެ. ދިއްދޫ ބަނދަރަކީ ސަރުކާރުން 21,956,238 ރުފިޔާ ޚަރަދުކޮށްގެން ތަރައްޤީކުރި ބަނދަރެކެވެ.

މީގެއިތުރުން މިދިޔަ 4 އަހަރެއްގައި ދުވަހު އދ.ދިއްދުއަށް އަމާޒުކޮށްގެން ކުރިއަށްގެންދަވާފައިވާ ކަންކަމުގެތެރޭގައި، މިހާރު ހުރި ކުނިކޮށި އަޕްގްރޭޑުކުރުމާއި ޒޯން 3ގެ ކުންޏާއި ވަޞީލަތްތައް މެނޭޖުކުރާ މަރުކަޒު އަޕްގްރޭޑްކުރުން ވަނީ ޕްރީ ޓެންޑަރިން މަރުޙަލާގައެވެ. މީގެއިތުރުން އެރަށް ޕްލޭންކޮށްފައިވާ ކަންކަމުގެ ތެރޭގައި މިހާރު ހުރި ކައުންސިލްގެ އިދާރާގެ ބަދަލުގައި އައު ޢިމާރާތެއް ހެދުން ހިމެނެއެވެ.

ރަށުގެ ކުޑަކުދިންގެ ޕާކަށް ބޭނުންވާ ސާމާނު ފޯރުކޮށްދިނުންވަނީ ޕްރީ ޓެންޑަރިން މަރުޙަލާގައެވެ. ސޯލާ ޕީވީ އަދި ބެޓަރި އެނާޖީ ސްޓޯރޭޖު ސިސްޓަމް ޤާއިމުކުރުން ވަނީ ޓެންޑަރކޮށްފައެވެ.

މިދިޔަ 4 އަހަރެއްހައި ދުވަހު ސަރުކާރުން ދިއްދުއަށް ކުރައްވާފައިވާ ހޭދައަށް ބަލާއިރު އެރަށް ނިސްބަތްވާ 2 ދަރިވަރަކު މިހާރުވެސް ފުރަތަމަ ޑިގްރީއަށް ކިޔަވަމުންދެއެވެ. އެއްދަރިވަރަކުވަނީ ނިމިފައެވެ. 2019އިން 2020ވަނަ އަހަރާހަމައަށް ސާޅީސް ހަތް ހާހަށްވުރެ ގިނަ ރުފިޔާ ދިއްދޫ ސްކޫލްކުދިންގެ ނާސްތާ ޕްރޮގްރާމަށް ހޭދަކޮށްފައިވެއެވެ. އެރަށު ސްކޫލުގައި މިވަގުތު ކިޔަވާކުދިންގެ ޢަދަދަކީ ޖުމުލަ 14އެވެ.

އާބާދީ މަދުވުމާއެކު ދިއްދުއަށް ވަނީ ބައެއް ކަންކަމުގައި ދަތިތަކާ ކުރިމަތިވެފައެވެ. އެހެންނަމަވެސް ތަރައްޤީގެ މަސައްކަތްތަކާއެކު ރަށް ކުރިއަރުވަން ބައެއް މުހިންމު ކަންކަން ކުރުމުގެ ވިސްނުން ކައުންސިލުން ގެންގުޅޭކަން ރަށުކައުންސިލްގެ ރައީސް މުޙައްމަދު ޣައްސާން ފާހަގަކުރެއްވިއެވެ. އޭނާ ވިދާޅުވީ މިހާރުވެސް 4 ގެސްޓުހައުސްއެއްގެ މަސައްކަތް ކުރަމުންދާކަމަށެވެ. އަދި ރަށުގެ ލޭންޑްޔޫސް ޕްލޭން ފާސްވިހާ އަވަހަކަށް ރަށުގެ ދެކުނުކޮޅުން ގެސްޓުހައުސް ހަދަން ބިން ދޫކުރާނެކަމަށް ކައުންސިލްގެ ރައީސް ވިދާޅުވިއެވެ.