ޙައްޤުތަކާއެކު މަސްއޫލިއްޔަތުތަކާއި ވާޖިބުތަކެއްވެސް ހުރޭ: އުއްތަމަ ފަނޑިޔާރު

ޤާނޫނުއަސާސީން ކަށަވަރުކޮށްދޭ ހައްގުތަކާއެކު، މަސްއޫލިއްޔަތުތަކާއި ވާޖިބުތަކެއްވެސް ހުންނަކަމަށް އުއްތަމަ ފަނޑިޔާރު އަހުމަދު މުޢުތަސިމް އަދުނާން ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހއ. ބާރަށު މެޖިސްޓްރޭޓް ކޯޓުގެ އައު އިމާރާތް ހުޅުވައިދެއްވުމަށްފަހު ދެއްކެވި ވާހަކަފުޅުގައެވެ.

މިއަދު ހުޅުވި ހއ.ބާރަށު މެޖިސްޓްރޭޓް ކޯޓުގެ އާ އިމާރާތަކީ، 2021 ވަނަ އަހަރުގެ ޖުލައި މަހުގެ ތެރޭގައި ހއ.ބާރަށު ކައުންސިލްއާ ޙަވާލުކޮށް ފެށި މަސައްކަތެކެވެ. މީގެ ކުރިން މި ކޯޓު ހިންގަމުން އައިސްފައިވަނީ 2 ކޮޓަރީގެ ޖާގައިގެ ޢިމާރާތެއްގެ ތެރޭގައެވެ. އެކަމުގެ ސަބަބުން ޝަރީޢަތްތައް ހިންގުމާއި، އިދާރީ މަސައްކަތްތަކާއި، ކޯޓުގެ އިދާރީ ހިންގުމާގުޅޭ އެންމެހައި ކަންކަން ހިންގައި ބަލަހައްޓަމުން ގެންދިޔައީ ވަރަށް ދަތިކޮށެވެ.

މެޖިސްޓްރޭޓް ކޯޓުގެ އާ އިމާރާތް ހުޅުވުމަށް ހއ.ބާރަށުގައި މިއަދު ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުން އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން ވިދާޅުވީ، ދުނިޔެ އަވަސް ދުވެއްޔެއްގައި ތަރައްގީވަމުންދާއިރު، ޢަދުލު އިންސާފު ފޯރުކޮށްދިނުމުގެ ކަންކަންވެސް އަވަސްވެ ތަރައްގީވާންވާނެކަމަށެވެ. އަދި އަދުލު އިންސާފު ފޯރުކޮށްދިނުމާއެކު، ހުރިހާ ފަނޑިޔާރުންވެސް އިހުސާންތެރިވުމަށް ހާއްސަ ސަމާލުކަމެއް ދެއްވުމަށް އިލްތިމާސްކުރެއްވިއެވެ.

އުއްތަމަ ފަނޑިޔާރު ވިދާޅުވީ ޤާނޫނު އަސާސީން ހައްގުތައް ކަށަވަރުކޮށްދެވޭއިރު، ހައްގުތަކާއެކު ކޮންމެ ބޭފުޅެއްގެ މަސްއޫލިއްޔަތުތަކާއި ވާޖިބުތަކެއް ވާނެކަން ހަނދުމަފުޅުކުރަންޖެހޭކަމަށެވެ.

ހއ.ބާރަށު މެޖިސްޓްރޭޓް ކޯޓުގެ އައު އިމާރާތް ފަރުމާކުރެވިފައިވަނީ، މިހާރުގެ ޤާނޫނުތަކުން ތަސައްވަރު ކުރާ ފަދަ ގޮތަކަށް ޝަރީޢަތްތައް ހިންގުމަށް ބޭނުންވާނެ ޖާގައާއި ވަސީލަތްތައް ހިމެނޭ ގޮތަށެވެ. އެގޮތުން ޝަރީޢަތްކުރާނެ ވަކި 2 މާލަމަކާއި، މެޖިސްޓްރޭޓުންނާއި މުވައްޒަފުން މަސައްކަތްކުރުމަށް ވަކިން ޚާއްޞަކުރެވިފައިވާ ބައިތަކުގެ އިތުރުން ސްޓޭންޑަރޑް ކޯޓެއްގައި ފުރިހަމަވާންޖެހޭ ގިނަ ކަންކަން ހިމެނޭގޮތަށެވެ.

އޭގެތެރޭގައި ކޯޓަށް ހާޒިރުވާ ވަކީލުން މަޑުކުރުމަށް ހާއްސަ ރޫމަކާއި، ޕޮލިސް ޕޯސްޓަކާއެކު ކުށުގެ ތުހުމަތުގައި ހާޟިރުކުރެވޭ ފަރާތްތައް ވަކިން ބައިތިއްބާނެ ތަނަކާއި، ކޮންފަރެންސް ރޫމް އަދި ޝަރުޢީ ލިޔެކިޔުންތައް އަރުޝީފް ކުރާނެ ޖާގައިގެ އިތުރުން ޢާންމުންނަށް ޚިދުމަތް ފޯރުކޮށް ދިނުމަށް ފަސޭހަވާނެހެން ރިސެޕްޝަން އޭރިއާއަކާއި ވެއިޓިންގ އޭރިއެއް ކޯޓުގައި ހިމެނޭ ހިމެނެއެވެ.

ދިވެހިރާއްޖޭގެ އުއްތަމަ ފަނޑިޔާރު ހއ. އަތޮޅަށް ކުރައްވާ ދަތުރުފުޅުގައި ހއ.މުރައިދޫ މެޖިސްޓްރޭޓް ކޯޓު، ހއ.ވަށަފަރު މެޖިސްޓްރޭޓް ކޯޓު އަދި ހއ.ބާރަށު މެޖިސްޓްރޭޓް ކޯޓުގެ މެޖިސްޓްރޭޓުންނާއި މުވައްޒަފުންނާއި ވަނީ ބައްދަލުކުރައްވާފައެވެ. މި ބައްދަލުވުންތަކުގައި ކޯޓުގެ މަސައްކަތްތަކުގައި ދިމާވާ ދަތިތަކާ ގުޅޭގޮތުން މެޖިސްޓްރޭޓުންނާއި މުވައްޒަފުންނާ މަޝްވަރާކުރެއްވިއެވެ. އުއްތަމަ ފަނޑިޔާރުގެ މި ދަތުރުފުޅުގައި ހއ.އިހަވަންދޫ، ހއ.ހޯރަފުށި އަދި ހއ.ދިއްދޫ މެޖިސްޓްރޭޓް ކޯޓުގެ މެޖިސްޓްރޭޓުންނާއި މުވައްޒަފުންނާ ބައްދަލުކުރެއްވުމަށް ވަނީ ހަމަޖެހިފައެވެ.

މިދަތުރުގައި ދިވެހިރާއްޖޭގެ އުއްތަމަ ފަނޑިޔާރުގެ އަރިހުގައި ޖުޑީޝަލް ސަރވިސް ކޮމިޝަނުގެ ނާއިބު ރައީސް އަލްއުސްތާޛު މަސްތޫރު ޙުސްނީ، ޖުޑީޝަލް ސަރވިސް ކޮމިޝަނުގެ މެންބަރު އަލްއުސްތާޛު ޢަބްދުލްމާނިޢު ޙުސައިން، ޖުޑީޝަލް ސަރވިސް ކޮމިޝަނުގެ މެންބަރު އަލްފާޟިލާ އާމިނަތު އުއްމުކުލްޘޫމް އަދި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ބައިވެރިވެވަޑައިގަންނަވައެވެ.