ދިގުރަށު ބަނދަރުގެ މަސައްކަތް ބާރަށް ކުރިއަށް

އަރިއަތޮޅު ދެކުނުބުރީ ދިގުރަށަކީ މިއަތޮޅުގައި އެންމެ ހަލުވި ދުވެލީގައި ތަރައްޤީވަމުން އަންނަ އެއް ރަށެވެ. ރަށުގެ ތަރައްޤީއާއެކު ހަލުވި ދުވެލީގައި ކުރިއަރަމުން އަންނަ ރަށު ފަތުރުވެރިކަމާއެކު ރަށުގައި މިވަގުތު އޮތް ބަނދަރުވަނީ ކުޑަވެފައެވެ. މިއާއެކު އެރަށުގެ ބަނދަރަށް ބައެއް އިތުރުކޮށް ބޮޑުކުރުމުގެ މަސައްކަތް ސަރުކާރުންވަނީ ފަށްޓަވާފައެވެ.

ދިގުރަށު ބަނދަރު އަޕްގްރޭޑުކުރުމުގެ މަޝްރޫޢުގެ މަސައްކަތް ސަރުކާރުން ފަށާފައިވަނީ މިދިޔައަހަރުގެ މެއި މަހުގެތެރޭގައެވެ. މިމަސައްކަތް މިހާރު ބާރަށް ކުރިއަށްދެއެވެ. މިމަސައްކަތް ކުރިއަށްގެންދާ އެމްޓީސީސީން ބުނިގޮތުގައި ދިގުރަށް ބަނދަރު ތަރައްޤީ ކުރުމުގެ މަޝްރޫޢުގެ ދަށުން އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތުގެ %50 ވަނީ މިހާރު ނިމިފައެވެ.

އދ. ދިގުރަށް ބަނދަރު ތަރައްޤީ ކުރުމުގެ މަޝްރޫޢުގެ ދަށިުން، އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތުގެ 50 ޕަސެންޓް ނިމިއްޖެ.#MTCCProjects #RayyithugeKunfuni pic.twitter.com/8S7eKbtS4b

— MTCC Plc (@MTCCPlc) July 11, 2023

އދ. ދިގުރަށުގައި މިހާރު އޮތީ 2000ގެ ކުރީކޮޅުގައި ހަދާފައި އޮތް ބަނދަރެކެވެ. އެ ބަނދަރު އަދިވެސް ރަނގަޅެވެ. ނަމަވެސް ރަށުގެ ތަރައްޤީއަށް އަދި ބަދަލުތަކާއި ރަށުފަތުރުވެރިކަން ފުޅާވުމާއެކު މިހާރު މިބަނދަރުގެ ޖާގަ ކުޑަވެއްޖެއެވެ. އެކަމުގެ އުނދަގޫތަކާ ރަށުގެ ރައްޔިތުން ކުރިމަތިލާންޖެހެއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ދިގުރަށު ކައުންސިލްގެ ރައީސް އިބްރާހިމް އުސްމާން ވިދާޅުވީ ބަނދަރުގެ ޖާގަ އިތުރުވެގެން ދިއުމަކީ ވަރަށްބޮޑު ލުއިފަސޭހައެއް ރަށަށް ލިބިގެންދާނެކަމެއްކަމަށެވެ. އަދި މީގެ ސަބަބުން ރަށުގެ ތަރައްޤީއަށް އިތުރު ލުއިފަސޭހަކަމެއް ލިބިގެންދާނެކަމަށެވެ.

ދިގުރަށު ބަނދަރު ބޮޑުކުރުމުގެ މި މަޝްރޫޢަކީ 50.2 މިލިޔަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ. މި މަސައްކަތުގެ ތެރެއިން އެރަށުގައި 64،416 އަކަމީޓަރުގެ ސަރަހައްދެއްގެ ބަނދަރު ފުންކުރުމަށް ހަމަޖެހިފައިވެއެވެ. އަދި 6770 އަކަމީޓަރުގެ ސަރަހައްދެއްގެ ނެރު ފުންކުރުމާއި، 294 މީޓަރުގެ ސަރަހައްދެއްގައި އެއްގަމުތޮށި ލާނެއެވެ.

މީގެ އިތުރަށް 287 މީޓަރުގެ ސަރަޙައްދެއްގެ ބޭރުތޮށި ލުމާއި، 98 މީޓަރުގެ ސަރަޙައްދެއްގައި ރިވެޓްމަންޓް ޖެހުމާއި، 2324 އަކަ މީޓަރުގެ ސަރަހައްދެއްގައި ހާބަރ ޕޭވްމަންޓް ހެދުމަށް ވެސް ހަމަޖެހިފައިވެއެވެ. ބަނދަރު ހެދުމުގެ މަސައްކަތުގެ ދަށުން ރޭމްޕެއް ހެދުމާއި، ޖެޓީއެއް ހެދުމާއި، އޭޕްރަންއެއް ހެދުމާއި، ބަނދަރު ބައްތި ހަރުކުރުމުގެ މަސައްކަތް ހިމެނެނެއެވެ.