އޮމަދޫގެ ތަރައްޤީއަށް އެންމެ ބޭނުންވާކަންކަން ފުރިހަމަވުމާ ގާތަށް!

އަރިއަތޮޅު ދެކުނުބުރީގެ ރަށްރަށުގެ ތަރައްޤީއަށް ސަރުކާރުން ކުރިއަށްގެންދާ މަސައްކަތް މަސައްކަތްތަކުގެ ތެރެއިން އެންމެ މުހިންމު އެއްކަމަކީ ރަށްރަށުގެ އަސާސީ ޚިދުމަތްތައް ފުރިހަމަކުރައްވަން ކުރައްވަމުންދާ މަސައްކަތްތަކެވެ. އެކި ރަށުގައި އެކި މިންވަރަށް މިފަދަ މަޝްރޫޢުތަކުގެ މަސައްކަތްތައް އަންނަނީ ހިނގަމުންނެވެ. އެފަދަ އެއް ރަށަކީ އޮމަދޫއެވެ.

އަރިއަތޮޅު ދެކުނުބުރީ އޮމަދުއަކީވެސް އެރަށުގެ ރައްޔިތުންގެ ކުރިއެރުމަށް ސަރުކާރުން ގިނަ ހޭދަތަކެއް ކުރައްވަމުން އަންނަ ރަށެކެވެ. އެގޮތުން މިވަގުތު ހިނގަމުން އެންމެ މުހިންމު ކަމަކީ ރަށުގެ ފެނުގެ ނިޒާމުގެ މަސައްކަތެވެ. ފެނުގެ ނިޒާމުގެ މަސައްކަތް މިހާރުވަނީ ގާތްގަނޑަކަށް ނިމިފައެވެ. މިމަޝްރޫޢުގެ ދަށުން މިހާރު ކުރަމުންދާ މަސައްކަތަކީ ގޭގެއަށް ފެންހޮޅި ގުޅުމުގެ މަސައްކަތެވެ. މިއީ ދައުލަތުގެ ބަޖެޓުންނާއި މޯލްޑިވްސް ގްރީން ފަންޑުން ހޭދަކޮށްގެން ކުރިއަށްގެންދާ މަޝްރޫޢެކެވެ. މިމަޝްރޫޢައް 13 މިލިޔަނަށްވުރެ ގިނަ ރުފިޔާ ހޭދަވެއެވެ.

އޮމަދޫގެ ތަރައްޤީއަށް ސަރުކާރުން ކުރައްވާފައިވާ ބައެއް ކަންކަމަށް ބަލާއިރު، ރާއްޖޭގެ ޤައުމީ ދަތުރުފަތުރުގެ ނިޒާމާ އޮމަދޫ ގުޅުވާލުމަށްޓަކައި ކުރަންޖެހޭ ބައެއް މަސައްކަތްތައް މިހާރުވަނީ ކޮންޓްރެކްޓްކޮށްފައެވެ. ރަށުގައި އާ ވޭސްޓު މެނޭޖުމަންޓު ސިސްޓަމެއް ޤާއިމުކުރުމުގެ މަސައްކަތްވަނީ ޕްރީ ޓެންޑަރިން މަރުޚަލާގައެވެ. ރަށުގެ ކުޑަކުދިންގެ ޕާކަށް ބޭނުންވާ ސާމާނުވަނީ ސަޕްލައިކޮށް ނިމިފައެވެ. ރަށުގައި ސޯލާ ޕީވީ ހަރުކުރުމުގެ މަސައްކަތްވަނީ މިހާރު ޓެންޑަރކޮށްފައެވެ. އޮމަދޫ ސިއްޙީމަރުކަޒުގެ އާ ޢިމާރާތުގެ މަސައްކަތް ވަނީ ޕްރީ ޓެންޑަރިން މަރުޙަލާގައެވެ.

މި މަޝްރޫޢުތަކުގެ މަސައްކަތް އެކި މަރުޙަލާތަކުގައިވީ ނަމަވެސް ތަރައްޤީގެ ކުރިއެރުން ރަށަށް ހޯދުމަށް މިއަތޮޅުގެ ރަށްރަށުގެ ރައްޔިތުންގެ މެދުގައި އޮންނަ ވާދަވެރިކަން މިރަށުގެ ރައްޔިތުންގެ ކިބާގައިވެސް ވެއެވެ. ރައްޔިތުން ކަންބޮޑުވާކަންކަން އެންމެ ފުރަތަމަ ޙައްލުވެ ފުރިހަމަ ވާންޖެހޭނީ މިރަށުގައިކަމަށް މިރަށުގެ ރައްޔިތުން ދެކެއެވެ. އެގޮތުން ރައްޔިތުން އެންމެ ކަންބޮޑުވާ މައްސަލައަކީ ރަށުގެ ބަނދަރުގެ ދަތިކަމާއި ރަށްގިރުމުގެ މައްސަލައެވެ.

ރައްޔިތުންގެ މި ކަންބޮޑުވުންތައް އަޑުއައްސަވައި ސަރުކާރުން އަންނަނީ ކޮންމެ ރަށެއްގެ ރައްޔިތުންގެ ކަންބޮޑުވުންތައްވެސް ޙައްލުކުރެއްވުމަށް މަސައްކަތް ކުރައްވަމުންނެވެ. ކުޑަރަށެއް ބޮޑުރަށެއް ތަފާތު ނުކުރައްވާނެކމަށް ސަރުކާރުން އަންނަނީ ވިދާޅުވަމުންނެވެ. އެގޮތުން އޮމަދޫގެ ރައްޔިތުންގެ ކަންބޮޑުވުންތަކަށްވެސް ސަރުކާރުން ވަނީ ޙައްލު ގެނައުމުގެ މަސައްކަތް ފަށްޓަވާފައެވެ.

ރަށުގެ ބަނދަރު އަޕްގްރޭޑްކުރުންވަނީ ޓެންޑަރކޮށްފައެވެ. ގޮނޑުދޮށް ޙިމާޔަތްކުރުމުގެ މަޝްރޫޢުވެސް މިހާރުވަނީ ޕްރީ ޓެންޑަރިން މަރުޙަލާގައެވެ. ރަށު ކައުންސިލްގެ ރައީސް އިބްރާހީމް ޢާދިލްވިދާޅުވީ މިއީ އޮމަދުއަށް ލިބިގެންދާ ވަރަށްބޮޑު އުފަލެއްކަމަށެވެ.

ރަށުގައި ކުރިއަށްދާ ޢުމްރާނީ މަސައްކަތްތަކަށް ސަރުކާރުން ކުރެއްވި ހޭދަތަކުގެ އިތުރުންވެސް އޮމަދޫގެ ތަރައްޤީއާއި ރައްޔިތުންގެ ކުރިއެރުމަށް ގިނަގުނަ ހޭދަތަކެއް ކުރައްވާފައިވެއެވެ.

އެގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވަޢުދުތަކުގެ ތެރޭގައި ހިމެނޭ ހިލޭ ޑިގްރީ ޕްރޮގްރާމުގެ ދަށުން އޮމަދުއަށް ނިސްބަތްވާ 33 ދަރިވަރަކު މިވަގުތުވެސް ކިޔަވަމުން ދެއެވެ. އަދި 15 ދަރިވަރަކުވަނީ ކިޔަވައި ނިންމާފައެވެ. ސްޓޫޑެންޓް ލޯން ސްކީމްގެ ދަށުން 3 ދަރިވަރަކު އަންނަނީ ކިޔވަމުންނެވެ. އޮމަދޫގެ ކުދިވިޔަފާރިތަކާއި މެދުފަންތީގެ ވިޔަފާރިތައް ކުރިއެރުވުމަށްޓަކައި ރަށުގެ 3 ފަރާތަކަށް އެސްޑީއެފްސީން މިލިޔަނަކަށްވުރެ ގިނަ ރުފިޔާ ލޯނުގެގޮތުގައި ވަނީ ދޫކޮށްފައެވެ.

އޮމަދުއަކީވެސް މިއަތޮޅުގެ އެހެން ރަށްރަށެކޭ އެއްފަދައިން ރަށުފަތުރުވެރިކަން ފުޅާދާއިރާއެއްގައި ކުރިއަރަމުން އަންނަ ރަށެކެވެ. އެހެންކަމުން މިވިޔަފާރިއަށް ފަހިވާނެގޮތަކަށް ތަރައްޤީގެ އެތައްކަމެއް ފުރިހަމަވުމަށް ރައްޔިތުން އެދެއެވެ.