އައްޑޫ ސިޓީން ބިން ހިއްކުން: ވެލި އެޅުމުގެ މަސައްކަތް އަންނަމަހު ނިމޭނެ

އައްޑޫ ސިޓީގެ ބިން ހިއްކުމުގެ ބިޔަ މަޝްރޫޢުގެ ދަށުން ހިއްކާ ސަރަޙައްދުތަކަށް ވެލި އެޅުމުގެ މަސައްކަތް އަންނަ މަހުގެ ނިޔަލަށް ނިމޭނެކަަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވެއްޖެއެވެ.

އައްޑޫ ބިން ހިއްކުމަށް ޑްރެޖިން މަސައްކަތްތައް ފެށީ މިދިޔަމަހު ކުރީކޮޅުއެވެ.

އައްޑޫ ސިޓީގެ ބިން ހިއްކުމުގެ މަޝްރޫޢުއަކީ އަތޮޅުތަކުގައި ކުރިއަށްގެންދާ ބިން ހިއްކުމުގެ އެންމެ ބޮޑު މަޝްރޫޢުއެވެ. މިއީ އައްޑޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައާއި، އަދި އެ ސިޓީގައި އިޤްތިޞާދީ އިތުރު ފުރުޞަތުތައް ފަހިކޮށްދެއްވުމަށް ސަރުކާރުން ފައްޓަވާފައިވާ މަސައްކަތެކެވެ.

އައްޑޫ ބިން ހިއްކުމުގެ މަޝްރޫޢުގައި ޖުމްލަ 228 ހެކްޓަރުގެ ބިން ހިއްކައެވެ. މި މަޝްރޫޢު ކުރިއަށްގެންދަނީ ނެދަލޭންޑްސްގެ ވެންއޫޑް ކުންފުންޏާއި، އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީއާއި ހަވާލުކޮށްގެންނެވެ.

މި މަޝްރޫޢުގެ ދަށުން އެންމެ ފުރަތަމަ ހިއްކަން ފަށާފައިވަނީ އައްޑޫ ހިތަދުއިން ހިއްކާ ސަރަޙައްދެއެވެ. ޒޯން 1 ގެ ގޮތުގައި ކަނޑައަޅާފައިވާ އެ ސަރަޙައްދަށް ވެލި އެޅުމުގެ މަސައްކަތްތައް މިހާރު ވަނީ ގާތްގަނޑަކަށް ނިމިފައެވެ. އެއީ 40 ހެކްޓަރަށްވުރެ ބޮޑު ސަރަޙައްދެކެވެ. މިއީ ބޯހިޔަވާހިކަމަށް ދޫކުރުމާއި، ސަރުކާރުގެ ބޭނުންތަކަށް ހިއްކާ ސަރަޙައްދެކެވެ.

އައްޑޫ ބިން ހިއްކުމުގެ މަޝްރޫޢުގައި ފަތުރުވެރިކަމާއި އިޤްތިޞާދީ ހަރަކާތްތަކަށް ޚާއްސަ ސަރަޙައްދުތައްވެސް ހިމެނެއެވެ.

މި މަޝްރޫޢު ކުރިއަށްދާގޮތާއި ގުޅޭގޮތުން ޕްލޭނިން މިނިސްޓްރީން ވިދާޅުވީ، އައްޑޫ ބިން ހިއްކުމުގެ މަޝްރޫޢުގެ މަސައްކަތް ޕްލޭނާއި އެއްގޮތަށް ބާރު ސްޕީޑްގައި ކުރިއަށްދާކަމަށެވެ. އަދި މިހާރު މަސައްކަތްތައް ކުރިއަށްދާގޮތަށް ބަލާއިރު، ހިއްކާ ސަރަޙައްދުތަކަށް ވެލިއެޅުމުގެ މަސައްކަތްވެސް އަންނަ މަހުގެ ނިޔަލަށް ނިންމާނެކަމަށް އެ ކުންފުނިން ބުނެއެވެ. އަދި އެއާއި އެކުއެކީގައި، ހިއްކި ސަރަޙައްދުތަކުގައި ބޮޑުހިލަޖަހައިގެން ޙިމާޔަތްކުރުމުގެ މަސައްކަތްވެސް ކުރިއަށްގެންދާނެއެވެ.

މި މަޝްރޫޢު ނިމިގެންދާއިރު އައްޑޫ ސިޓީ ހިތަދޫއަށް 80 ހެކްޓަރުގެ ބިން، މަރަދޫ އަދި މަރަދޫފޭދޫ އަށް 76 ހެކްޓަރުގެ ބިން، ހުޅުދޫ އަދި މީދޫއަށް 32.3 ހެކްޓަރުގެ ބިން އިތުރުވެގެންދާނެއެވެ.

މީގެއިތުރުން އިންޓަގްރޭޓަޑް ޓޫރިޒަމަށް ޚާއްސަކޮށްގެން ތަރައްޤީކުރާ ހަންކެޑެއަށް 4.7 ހެކްޓަރުގެ ބިން އަދި ފަތުރުވެރިކަމަށް ޚާއްސަކޮށް އައްޑޫ ސިޓީ ފަޅުތެރެއިން 8.3 ހެކްޓަރުގެ 3 ރަށާއި 5 ހެކްޓަރުގެ 2 ރަށެއް އިތުރުކުރެވޭނެއެވެ.

ރިސޯޓު ތަރައްޤީކުރުމަށް ނެދަލޭންޑްސްގެ ކުންފުނިން 3 ރަށް ހިއްކަމުން އަންނައިރު، އެމްޓީސީސީން 5 ހެކްޓަރުގެ 2 ރަށް ހިއްކާނެއެވެ. އަދި އެ ސަރަޙައްދުތައް ޙިމާޔަތްކުރުމަށް ޖުމްލަ 11 ކިލޯމީޓަރުގެ ބޮޑުހިލައިގެ ތޮށިލާނެއެވެ.

އައްޑޫ ބިންހިއްކުމުގެ މަޝްރޫޢުއަކީ ބިލިއަނަކަށްވުރެ ގިނަ ރުފިޔާ ހޭދަކޮށްގެން ސަރުކާރުން ކުރިއަށްގެންދަވާ މަޝްރޫޢުއެކެވެ.