ވަށަފަރާއި ދިއްދޫގައި ކުރިއަށްގެންދިޔަ މަޝްރޫއުތަކެއްގެ ނިމުން ފާހަގަކުރައްވައިފި

ހއ. ވަށަފަރު ޞިއްޙީ މަރުކަޒަށް އިތުރުކުރި ޢިމާރާތާއި، ހއ.ދިއްދޫ ފުޓުބޯޅަ ދަނޑު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހުޅުއްވައިދެއްވައިފިއެވެ.

ރައީސުލްޖުމްހޫރިއްޔާ މި ދެތަން ހުޅުއްވައިދެއްވައިފައި ވަނީ ހއ.އަތޮޅަށް ފައްޓަވާފައިވާ ދަތުރުފުޅުގެތެރެއިން، އެ ދެރަށަށް ކުރެއްވި ދަތުރުފުޅުގައެވެ.

ރަށްރަށުގައި ސިއްޙީ ޚިދުމަތުގެ ނިޒާމު ލުއިފަސޭހަ ކުރެއްވުމަށް ސަރުކާރުން އަންނަނީ މުހިންމު މަސައްކަތްތަކެއް ކުރައްވަމުންނެވެ. އެގޮތުން ހއ. ވަށަފަރު ޞިއްޙީ މަރުކަޒަށް އިތުރުކުރި ޢިމާރާތުގެ މަސައްކަތް ކޮށްފައި ވަނީ ޕާރފެކްޓް މަލަފެހި މޯލްޑިވްސް ޕްރައިވެޓް ލިމިޓެޑް ކިޔާ ކުންފުންޏަކާ ހަވާލުކުރައްވައިގެންނެވެ. މި ޢިމާރާތުގައި ޕަބްލިކް ހެލްތު ޔުނިޓަކާއި، އިދާރީ އޮފީސް އަދި ސްޓޯރޭޖު ރޫމްތަކާއި، ލޯންޑްރީ ހިމެނެއެވެ.

މީގެކުރީގައި ވަށަފަރުގައި ސިއްޙީ މަރުކަޒުގެ އިދާރީ މަސައްކަތްތަކާއި، އެހެން ގިނަ ޚިދުމަތްތައްވެސް ދެމުން އައީ ބަލިމީހުން ބަލާ އިމާރާތުގައެވެ. ނަމަވެސް އަލަށް އިތުރުކުރި އިމާރާތަށް އިދާރީ މަސައްކަތްތައް ބަދަލުކޮށް، ކުރިން އޮތް ޖާގައިގެ މައްސަލަ ވަނީ ޙައްލުކޮށްދެއްވާފައެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ވަނީ ހއ.ދިއްދުއަށްވެސް ވަޑައިގެންފައެވެ. އަދި ރަށުގައި ޓާފް އަޅާ ސަރުކާރުން ތަރައްޤީކޮށްދެއްވި ފުޓުބޯޅަ ދަނޑު ވަނީ ހުޅުއްވައިދެއްވާފައެވެ. ސަރުކާރުން ދަނީ ގިނަ ރަށްތަކެއްގައި ޒަމާނީ ފުޓުބޯޅަ ދަނޑުތައް ތަރައްޤީކޮށްދެއްވަމުންނެވެ. މިއީ އަމިއްލަ ރަށުގައި ތިބެގެންވެސް، ޒަމާނީ ވަސީލަތްތަކާއެކު ކުޅިވަރު ކުޅެވޭނެ މަގު ޒުވާނުންނާ ރަށުގެ ރައްޔިތުންނަށް ފަހިކޮށްދެއްވުމަށް ކުރައްވަމުންދާ މަސައްކަތްކެކެވެ.

ރާއްޖޭގެ ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި، ފަޚުރުވެރި، އަބުރުވެރި ދިރިއުޅުމެއް އުޅެވޭނެހެން މަގުފަހިކުރުމަށް ތަފާތުކުރުމެއް ނެތި، ރާއްޖޭގެ ރަށްރަށުގައި ސަރުކާރުން ދަނީ ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގަމުންނެވެ.