އައްޑޫން ގޯއްޗަށް އެދި 4000 ފޯމް، ގޯތި ލިބޭ މީހުންގެ ލިސްޓު އޮގަސްޓް މަހު އާންމުކުރަނީ

އައްޑޫ ސިޓީން ގޯތި ލބޭ ފަރާތްތަކުގެ ލިސްޓް އޮގަސްޓްމަހުގެ ތެރޭގައި އާއްމުކުރެވޭނެ ކަމަށް އުއްމީދު ކުރައްވާ ކަމަށް މޭޔަރ އަލީ ނިޒާރު ވިދާޅުވެއްޖެއެވެ.

އަލީ ނިޒާރް މިހެން ވިދާޅުވީ އައްޑޫ ސިޓީގެ ރައްޔިތުއްނާއި އެކު ބޭއްވި ބައްދަލުކުރެއްވުމުގައެވެ.

33000 އަށްވުރެ ބޮޑު އާބާދީއެއް އޮންނަ އައްޑޫސިޓީގެ 6 ރަށުގެ ތެރެއިން އެންމެ ބޮޑު އާބާދީއެއް އޮތީ ހިތަދޫގައެވެ. އެރަށުގެ އާބާދީ 16،000 އިން މައްޗެވެ. ބޯހިޔާވަހިކަމުގެ މައްސަލަ ކުރިމަތިވެފައިވާ މުޅި އައްޑޫ ސިޓީއަށް ބަލާއިރު ހިތަދޫން އެންމެ ފަހުން ގޯތި ދޫކޮށްފައިވަނީ މީގެ 21 އަހަރު ކުރިން 2002ވަނަ އަހަރުއެވެ. އަދި، ހުޅުދޫއާއި މީދޫންވެސް ގޯތިދޫނުކުރާތާ 15 އަހަރުވެފައިވާއިރު، ފޭދޫން ގޯތި ދޫނުކުރާތާ 25 އަހަރު ވަނީ ވެފައެވެ.

އައްޑޫގެ ރައްޔިތުންނާއެކު ބޭއްވި ބައްދަލުވުމުގައި ވާހަކަ ދައްކަމުން މޭޔަރު އަލީ ނިޒާރު ވިދާޅުވީ ގޯތި ދޫކުރުމަށް ހުޅުވާލި މުއްދަތުގެ ތެރޭގައި 1،000 ގޯއްޗަށް އެދި 4،000 އަށްވުރެ ގިނަ މީހުން ފޯމު ހުށަހަޅާފައިވާ ކަމަށެވެ. އޭގެ ތެރެއިން 2،000 އަށްވުރެ ގިނަ ފޯމު ހުށަހަޅާފައި ވަނީ ހިތަދޫން ކަމަށެވެ. ހިތަދޫން ހުށައަޅާފައިވާ ފޯމްތަކުގެ ދެބައިކުޅަ އެއްބައި ފޯމު މިހާރު އިވެލުއޭޓުކޮށް ނިމިފައިވާ ކަމަށް މޭޔަރު ވިދާޅުވިއެވެ. އަދި ހުޅުދޫއާއި ފޭދޫއިން ހުށަހެޅި އިވެލުއޭޓްކޮށް މިހާރު ނިމިފައިވާ ކަމަށް މޭޔަރު ވިދާޅުވިއެވެ.

" އުންމީދަކީ، ކުރިއަށް އޮތް އޮގަސްޓު މަހުގެ ތެރޭގައި ރައްޔިތުންނާ ހަމައަށް ގޯތި ލިބޭ ފަރާތްތަކުގެ ލިސްޓު ނެރެ އާންމު ކުރެވޭނެ ކަމަށް. މީގެ ކުރިންވެސް ޖުލައިމަހު އަޅުގަނޑުމެން މަސައްކަތް ކުރިން ފޯމުތަކުގެ މަސައްކަތް ނިންމުމަަށް. ލަސްވި އެއް ސަބަބަކީ، ސްކޫލް ޗުއްޓީ ދުވަސްވަރާ ދިމާވުން" ނިޒާރު ވިދާޅުވިއެެވެ.

މޭޔަރ ވިދާޅުވީ ކައުންސިލަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ އައްޑޫ ސިޓީން ދޫކޮށްފައިވާ ގެތަކުގެ ތެރެއިން 350 އަށްވުރެ ގިނަ ގޯތި ޗަސްބިމުން ދޫކޮށްފައި އޮތް އޮތުންކަމަށެވެ. އެގޮތުން މިއަދާ ހަމަޔައް އައިއރުވެސް މި މައްސަލަ މުޅިއަކުން ހައްލުވެފައި ނުވާކަން މޭޔަރ ފާހަގަކުރެއްވިއެވެ. މޭޔާރ ވިދާޅުވީ މިސަރުކާރުން އެކި ފަހަރު މަތިން ދެއްވި އެހީތެރިކަމާ އެއްކޮށް މި ފަހުން ފޭދޫ އާއި ހިތަދޫގެ ޗަސްބިން ހިއްކުމަށް ދިން ގްރާންޓްގެ ސަބަބުން އެކަމަށް ބޮޑު ހައްލެއް ލިބިގެން ދިޔަކަމަށެެވެ.

އައްޑޫގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށްޓަކައި މި 4 ރަށުން ގޯއްޗަށް އެދުމުގެ ފުރުޞަތު ހުޅުވާލީ ޖެނުއަރީމަހުގެ ފަހުކޮޅުގައެވެ. އެގޮތުން ހުޅުދޫއާއި މީދޫއިން ކޮންމެ ރަށަކުން 100 ގޯތި ފޭދޫއިން 350 ގޯތި އަދި ހިތަދޫން 300 އާއި 400 ދެމެދުގެ ޢަދަދަކަށް ގޯތި ދޫކުރަން ހުޅުވާލިކަމަށް ސިޓީ ކައުންސިލުން ވިދާޅުވެއެވެ.

އެތައް އަހަރަކަށް ފަހު އައްޑޫސިޓީން ގޯތި ދޫކުރުމަށް ނިންމާފައިވާއިރު އެ ސިޓީއަށް ބިން އިތުރުކުރުމަށްޓަކައި ބިން ހިއްކުމުގެ މަސައްކަތްވެސް މިހާރު ވަނީ ފަށާފައެވެ. އައްޑޫ ބިން ހިއްކުމުގެ މަސައްކަތް އަންނަ އޯގަސްޓް އަދި ސެޕްޓެމްބަރު ހިސާބުގައި އެއްކޮށް ނިންމާލެވޭނެކަމަށް މޭޔަރވަނީ ވިދާޅުވެފައެވެ.

އައްޑޫ ބިންހިއްކުމަށް ކުރިއަށްގެންދާ ބިލިއަން ޑޮލަރުގެ މަޝްރޫޢުގެ ދަށުން އައްޑޫ ސިޓީ ހިތަދޫ، މަރަދޫއާއި މަރަދޫފޭދޫއިން 194 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި މިރަށްރަށުގެ ފަޅު ތެރެއިން އިތުރު ތިން ރަށެއް ތަރައްޤީކުރުމަށް ހަމަޖެހިފައިވާކަމަށްވެސް ކުރިންވަނީ ހާމަކޮށްފައެވެ. އަދި 11 ކިލޯމީޓަރުގެ އެއްގަމު ތޮއްޓެއްލާ އެސަރަޙައްދު ޙިމާޔަތްކުރުމަށްވެސްވަނީ ހަމަޖެހިފައެވެ.