އަމީނީ މަގު އެންމެ ބާރު ބޮޑު ސަރަޙައްދުގައި ތާރުއަޅައި ނިމިއްޖެ، ސްކޫލް ހުޅުވެންވާއިރަށް ހުޅުވާލަނީ

އަމީނީމަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން ސެގްމަންޓް 8،9 ގައި ތާރު އަޅައި ނިންމާލައިފިއެވެ. މި މަޝްރޫޢުގެ ކޮންޓްރެކްޓަރ އާރް.ޑީ.ސީއިން ބުނީ އެކުންފުނީގެ އަމާޒަކީ އަމީނީމަގުގެ އެންމެ ބާރު ބޮޑު މި ސަރަޙައްދުގެ ހުރިހާ މަސައްކަތެއް ނިންމާ، ދިރާސީ އައު އަހަރު ފެށުމުގެ ކުރިން އެ ސަރަޙައްދު އާއްމުންނަށް ބޭނުންކުރަން ހުޅުވާލުންކަމަށެވެ.

އަމީނީމަގު ޒަމާނީ ފެންވަރަށް ތަރައްޤީކުރަމުގެ މަސައްކަތުގެ ދަށުން ސެގްމެންޓް 8 ގެ މަސައްކަތް ފެށީ ޖޫން މަހުގެ 10 ވަނަ ދުވަހުއެވެ. ސެގްމެންޓް 8 އަދި 9 ގެ މައިގަނޑު މަސައްކަތް ނިންމާ، މިހާރު ވަނީ ތާރު އަޅާ ނިންމާލާފައެވެ. މި ސެގްމަންޓުތަކުގައި ހިމެނެނީ އަމީނީ މަގުގެ އެންމެ ކާރޫބާރޫ ބޮޑު ސަރަޙައްދެވެ. އެގޮތުން ބިލަބޮންގ އިންޓަރނޭޝަނަލް ހައިސްކޫލާއި، ޣިޔާޘުއްދީން އިންޓަރނޭޝަނަލް ސްކޫލާއި، އަޙްމަދިއްޔާ އިންޓަރނޭޝަނަލް ސްކޫލް ހިމެނޭ މި ސަރަޙައްދަކީ ސްކޫލް ގަޑިތަކާއި ދިމާކޮށް ޓްރެފިކް ބާރު ބޮޑުވާ ސަރަޙައްދުތަކެއެވެ.

ޕީ.އެސް.އެމް ނިއުސްއަށް މަޢުލޫމާތުދެއްވަމުން އާރް.ޑީ.ސީގެ އޮފިޝަލް އަޙްމަދު ފައިރޫޒް ވިދާޅުވީ، އަމީނީމަގުގެ ސެގްމަންޓް 8،9 ގައި ތާރުއަޅާ މިހާރު ނިމިފައިވާކަމަށެވެ. އަދި މޫސުން ތަންދޭނަމަ ދިރާސީ އައު އަހަރު ފެށެންވާއިރަށް ޓްރެފިކް ނިޝާންތައް ކުރަހާ ނިންމާ އެ ސަރަޙައްދު އާންމުންނަށް ހުޅުވާލެވޭނެކަމަށެވެ.

"މިހާރު ތާރު އަޅާ އެއޮތީ ނިމިފައި. ދެން ދެވަރަށް ދުވަސް ނަގާނެ ތާރު ހިކެން. ދެން މަސައްކަތް މި ކުރަނީ ޓްރެފިކް ނިޝާންތައް ކުރަހާ މަގު އަންނަ ހަފްތާ ހުޅުވާލުމަށް" ފައިރޫޒް ވިދާޅުވިއެވެ.

ފައިރޫޒް ވިދާޅުވީ، އަމީނީމަގުގެ ސެގްމަންޓް 10،11 ގެ މަސައްކަތްވެސް މިހާރު ކުރިއަށްދާ ކަމަށެއެވެ. އެގޮތުން އެ ސެގްމަންޓަކުގެ މިހާރު ކުރިއަތް ދަނީ ހޮޅި ވަޅުލުމުގެ މަސައްކަތްތަކެވެ.

އަމީނީ މަގުގެ މަސައްކަތް ކުރަމުން އަންނަނީ ޖުމްލަ 13 ސެގްމަންޓަކަށް ބަހާލައިގެންނެވެ. މިގޮތުން 7 ވަނަ ސެގްމަންޓާއި ހަމައަށް ހުރިހާ މަސައްކަތެއް ނިންމާ، މިހާރު ދަނީ ބޭނުންކުރަމުންނެވެ.

ޒަމާނީ ފެންވަރަށް އަމީނީ މަގު ތަރައްޤީކުރުމަށް އާރް.ޑީ.ސީއާއި ޙަވާލުކޮށްފައިވަނީ 84.4 މިލިއަން ރުފިޔާއަށެވެ. މި މަޝްރޫޢުގެ ދަށުން އަމީނީމަގުގެ ހެންވޭރު ކޮޅުން ފެށިގެން މާފަންނު ކޮޅާއިހަމައަށް ޖުމްލަ 1.79 ކިލޯމީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށްވަނީ ހަމަޖެހިފައެވެ.