ކުރިއަށްއޮތް ތިން ހަފްތާތޭގައި ގދ.މާވަރުލު އެއާރޕޯޓަށް ރޭގަނޑުގެ ދަތުރުތަށް ފެށުމުމުގެ މަސައްކަތް ކުރާކަމުގައި ރީޖަނަލް އެއާރޕޯޓްސް އިން ބުނެފިއެވެ. މާވަރުލު އެއާރޕޯޓުގެ ހިދުމަތް ރަތްޔިތުންނަށް ދޭން ފަށާފައިވަނީ 2020 ވަނަ އަހަރުގެ ޖުލައި މަހުގެ ތެރޭގައެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ރީޖަނަލް އެއާރޕޯޓްސް އިން ބުނީ ގދ. މާވަރުލު އެއާޕޯޓްގެ ރޭގަނޑު ހިދުމަތްތައް ފެށުމުގެ ގޮތުން އެއާރޕޯޓް ރަންވޭގައި ލައިޓް ހަރުކުރުމުގެ މަސައްކަތްތައް މިހާރު ކުރިއަށްދާކަމަށެވެ. އަދި ކުރިއަށް އޮތް ތިން ހަފްތާ ދުވަހުގެ ތެރޭގައި އެ މަސައްކަތް ނިންމާ، ރޭގަނޑު ދަތުރުތަށް ފެށޭނެކަމަށްވެސް އެކުންފުނިން ބުންޏެވެ. ރަންވޭގެ މަސައްކަތްތައް ރީޖަނަލް އެއާޕޯޓުން ކުރަމުން އަންނަނީ ރާއްޖެއިން ބޭރުގެ ކުންފުންޔަކާ ހަވާލުކޮށްފައެވެ.
މިދިޔަ ހުކުރު ދުވަހުގެރޭ ހޯރަފުށީ އެއާރޕޯޓަށް ރޭގަނޑު ދަތުރުތައް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރީޖަނަލް އެއަރޕޯޓްސް ކުންފުނީގެ މެނޭޖިންގ ޑިރެކްޓަރ މުހައްމަދު ރިޒްވީ ވިދާޅުވީ ވަރަށް އަވަހަށް މާވަރުލު އެއާރޕޯޓަށް ރޭގަނޑު ދަތުރުތައް ފަށާނެކަމަށެވެ.
"ހޯރަފުށީ އެއާރޕޯޓުގެ އިތުރުން އެހެން އެއާޕޯޓެއްގައިވެސް އަޅުގަނޑުމެން މިދަނީ ނައިޓް ލޭންޑިންގގެ ހިދުމަތް ދިނުމަށްޓަކާ މަސައްކަތް ކުރަމުން. ވަރަށް އަވަހަށް މާވަރުލު އެއާޕޯޓުގައި ރަންވޭގެ މަސައްކަތްތައް ނިމި އެއާރޕޯޓުގައި ޓެސްޓް ފްލައިޓް ޖެއްސޭނެ." ރިޒްވީ ވިދާޅުވިއެވެ.
މާވަރުލު އެއާޕޯޓުގެ ހިދުމާތް ރޭގަނޑު ދިނުމައްޓަކައި ވާންޖެހޭ ފަހުގެ ތައްޔާރީތައް މިހާރު ވަމުން އަންނައިރު، މި ހިދުމަތާއެކު އެ ސަރަހައްދުގެ ޓޫރިޒަމަށް ބޮޑު ކުރިއެރުމަކާއި ފަސޭހަތަކެއް ލިބިދެން ދާނެކަމުގައި ރީޖަނަލް އެއާޕޯޓްސްއިންވަނީ ބުނެފައެވެ.
ރީޖަނަލް އެއާރޕޯޓްސް އިން މިހާރު އަންނަނީ ހޯރަފުށި އެއާޕޯޓުގެ އިތުރުން، ހަނިމާދޫ އިންޓަނޭޝަނަލް އެއާޕޯޓާއި ކުޅުދުއްފުށި އެއާޕޯޓާއި ފަރެސްމާތޮޑާ އެއާޕޯޓާއި ފުވައްމުލަކު އެއާޕޯޓުގައިވެސް ރޭގަނޑު ދަތުރުތައް ބާއްވަމުންނެވެ.