އިންތިޚާބު ބޮއިކޮޓްކުރުމަށް ރައީސް ޔާމީން އެންގެވުމުން ޕީޕީއެމް ސެނެޓު ހޫނުވެއްޖެ
-
ރައީސް ޔާމީން ވަނީ އިންތިޚާބު ބޮއިކޮޓްކުރުމަށް ޕީޕީއެމް ލީޑާރޝިޕްގައި އެދިވަޑައިގެންފައި
-
ނަމަވެސް ސެނެޓުގެ ބައެއް މެންބަރުން އެކަމަށް އެއްބަސްވެފައެއް ނުވޭ
-
ބެކަޕް ކެނޑިޑޭތެއްގެ ގޮތުގައި މާލޭގެ މޭޔަރު ޑރ.މުޢިއްޒު ވަނީ ކަނޑައަޅާފައި
ރިޔާސީ އިންތިޚާބު ބޮއިކޮޓްކުރުމަށް ކުރީގެ ރައީސް ޢަބްދުﷲ ޔާމީން އެންގެވުމުން، އެކަމާއި ގުޅޭގޮތުން ގޮތެއް ނިންމުމަށްބޭއްވި ޕީޕީއެމް ޕީއެންސީގެ ޖޮއިންޓް ސެނެޓުގައި ޚިޔާލުތަފާތުވެ ބައްދަލުވުން ހޫނުވެއްޖެއެވެ.
އަންނަ މަހު އޮންނަ ރިޔާސީ އިންތިޚާބުގައި، ކުރީގެ ރައީސް ޢަބްދުﷲ ޔާމީނަށް ވާދަނުކުރެވޭނެކަމަށް ސުޕްރީމް ކޯޓުން ނިންމެވި ނިންމެވުމާއި ގުޅިގެން، އެމަނިކުފާނު ވަނީ އިންތިޚާބު ބޮއިކޮޓްކުރެއްވުމަށް ޕީޕީއެމް ލީޑާރޝިޕްގައި އެދިވަޑައިގެންފައެވެ. އެގޮތުން ރައީސް ޔާމީން އެދިވަޑައިގަތީ އެމަނިކުފާނުގެ އިންތިޚާބީ ހައްޤު ނިގުޅައިގަނެފައިވާކަމަށް ސެނެޓަށް ޤަބޫލުކުރެވޭނަމަ އިންތިޚާބު ބޮއިކޮޓްކުރުމަށެވެ.
މިއާއެކު އެކަމާއި ގުޅޭގޮތުން ގޮތެއް ނިންމުމަށް ޕީޕީއެމް ޕީއެންސީގެ ޖޮއިންޓް ސެނެޓުގެ ބައްދަލުވުމެއް ފަށައިގެން ކުރިއަށްދިޔަނަމަވެސް، ސެނެޓަރުންގެ މެދުގައި ޚިޔާލުތަފާތުވެ ވަނީ އެ ބައްދަލުވުން ހޫނުވެފައެވެ. އަދި ބައްދަލުވުން ކުރިއަށް ނުގެންދެވިގެން މެދުކަނޑާލާފައިވެސްވެއެވެ.
ޕީޕީއެމް އޮފީސްތެރޭގައި ކުރިއަށްދިޔަ އެ ބައްދަލުވުމުގައި ޚިޔާލުތަފާތުވެ ހިނގާދިޔަ ކަންކަމާއި ގުޅިގެން ފުލުހުން ދަނީ އެސަރަހައްދުގައި ހަރަކާތްތެރިވަމުންނެވެ. ފުލުހުން ވިދާޅުވީ ޕީޕީއެމް ސެނެޓު މެންބަރުންގެ ބައްދަލުވުމެއް ޕީޕީއެމް އޮފީހުގައި ކުރިއަށްދަނިކޮށް އެތަނަށް އިތުރު ބަޔަކު ވަދެފައިވާ މައްސަލަ ޕީޕީއެމުން ފުލުހުންނަށް ހުށައެޅުމާއި ގުޅިގެން ފުލުހުން ހަރަކާތްތެރިވާން ފަށާފައިވާކަމަށެވެ.
ރިޔާސީ އިންތިޚާބު ބޮއިކޮޓްކުރުމަށް ރައީސް ޔާމީން އެދިވަޑައިގެންފައިވައި ވީނަމަވެސް، ރައީސް ޔާމީނަށް އިންތިޚާބުގައި ވާދަނުކުރެވޭ ހާލަތުގައި އިންތިޚާބުގައި ވާދަކުރާ "ބެކްއަޕް" ކެނޑިޑޭޓެއްގެ ގޮތުގައި މާލޭގެ މޭޔަރު ޑރ.މުޙައްމަދު މުޢިއްޒު ކަނޑައަޅާފައެވެ. އަދި މުޢިއްޒުގެ ރަނިންމޭޓަކަށް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް ވަނީ ހަމަޖައްސަވާފައެވެ. މިއާއެކު ސެނެޓުގެ ބައެއް މެންބަރުން ވަނީ މުޢިއްޒު އިންތިޚާބުގައި ވާދަކުރެއްވުމަށް ކަނޑައެޅުއްވީ ރައީސް ޔާމީންގެ އެންގެވުމަށްކަމަށެވެ. ނަމަވެސް އިންތިޚާބު ބޮއިކޮޓްކުރުމަށް އެމަނިކުފާނު އެންގެވުން ބަލައި ނުގަނެވޭނެކަމަށް ސެނެޓުގެ ބައެއް މެންބަރުން ވިދާޅުވެފައިވެއެވެ.
އަންނަ ރިޔާސީ އިންތިޚާބުގައި ވާދަކުރެއްވުމަށް ރައީސް އަބްދުﷲ ޔާމީން ޝަރުތު ފުރިހަމަނުވާކަމަށް ސުޕްރީމްކޯޓުން ނިންމަވާފައިވަނީ، ރައީސް ޔާމީންގެ ކެންޑިޑަސީ ފޯމް އިލެކްޝަންސް ކޮމިޝަނުން ބަލައި ނުގަތުމުން އެމަނިކުފާނު ހުށައެޅި މައްސަލާގައި މިއަދު އިއްވެވި ޙުކުމުގައެވެ. އެ މައްސަލަ ބެއްލެވި ހަތް ފަނޑިޔާރުންގެ އިއްތިފާގުން ނިންމެވި، ރައީސް ޔާމީންގެ ކެންޑިޑެސީ ބަލައިނުގަންނަން އީސީން ނިންމީ ރަނގަޅަށް ކަމަށެވެ.