އައްޑޫ ބިން ހިއްކުން: ވެލި އެޅުމުގެ މަސައްކަތް ނިންމާލައިފި

އައްޑޫ ސިޓީގެ ބިން ހިއްކުމުގެ ބިޔަ މަޝްރޫޢުގެ ދަށުން ހިއްކާ ސަރަޙައްދުތަކަށް ވެލި އެޅުމުގެ މަސައްކަތް މިއަދު ހެނދުނު ނިންމާލައިފިއެވެ. އައްޑޫ ބިން ހިއްކުމަށް ޑްރެޖިން މަސައްކަތްތައް ފެށީ ޖޫން މަހުގެ ކުރީކޮޅުއެވެ.

އައްޑޫ ސިޓީގެ ބިން ހިއްކުމުގެ މަޝްރޫޢަކީ އަތޮޅުތަކުގައި ކުރިއަށްގެންދާ ބިން ހިއްކުމުގެ އެންމެ ބޮޑު މަޝްރޫޢެވެ. މިއީ އައްޑޫ ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައާއި، އަދި އެސިޓީގައި އިޤްތިޞާދީ އިތުރު ފުރުޞަތުތައް ފަހިކޮށްދެއްވުމަށް ސަރުކާރުން ފައްޓަވާފައިވާ މަސައްކަތެކެވެ.

އައްޑޫ ބިން ހިއްކުމުގެ މަޝްރޫޢުގައި ޖުމްލަ 228 ހެކްޓަރުގެ ބިން ހިއްކައެވެ. މި މަޝްރޫޢު ކުރިއަށްގެންދަނީ ނެދަލޭންޑްސްގެ ވެންއޫޑް ކުންފުންޏާއި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީއާއި ހަވާލުކުރައްވައިގެންނެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން މިނިސްޓަރ އޮފް ސްޓޭޓް ފޮރ ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ޢަބްދުﷲ ޞާދިޤު ވިދާޅުވީ ބިން ހިއްކުމުގެ މަސައްކަތުގެ ދަށުން ވެލި އެޅުމުގެ މަސައްކަތްކޮށް ނިންމާފައިވާކަމަށެވެ. އަދި މިހާރު ދަނީ ހިއްކި ސަރަހައްދު ހިމާޔަތް ކުރުމަށްޓަކައި ރިވެޓްމަންޓް ޖެހުމުގެ މަސައްކަތް ކަމަށް ޞާދިޤް ވިދާޅުވިއެވެ. އެގޮތުން ރިވެޓްމަންޓް ޖެހުމުގެވެސް ބޮޑު ބައެއް ނިމިފައިވާކަމަށާއި ދެން ކުރިއަށްދާނީ ހިއްކި ސަރަހައްދާއި އައްޑޫގެ ރަށްތަކާ ގުޅުވާލުމަށް ކުރަންޖެހޭ މަސައްކަތް ކަމަށް ޞާދިގު ވިދާޅުވިއެވެ. އަދި މުޅި ބިންހއްކުމުގެ މަސައްކަތް މިއަހަރު ނިންމާލެވޭނެ ކަމަށްވެސް އޭނާ ވިދާޅުވިއެވެ.

" ބިންހިއްކުމުގެ މަސައްކަތުގެ އެސަރަޙައްދު ހިމާޔަތް ކުރުމަށްޓަކައި ދެކުނުފަރާތުގައި ރިވެޓްމަންޓް ޖެހުމުގެ ބޮޑު ބައެއް ވަނީ ނިންމާލާފައި. އުތުރު ފަރާތުންވެސް އެމަސައްކަތްތައް ކުރަމުން އެބަދޭ. ދެން ކުރިއަށްދަނީ އައްޑޫގެ ރަށްތަކާއި އެ ސަރަޙައްދާއި ދެމެދު ކުރަން ޖެހޭ ބައެއް އެހެނިހެން މަސައްކަތް." ޢަބްދުﷲ ޞާދިޤު ވިދާޅުވިއެވެ.

އައްޑޫ ބިން ހިއްކުމުގެ މަޝްރޫޢުގައި ފަތުރުވެރިކަމާއި އިޤްތިޞާދީ ހަރަކާތްތަކަށް ޚާއްސަ ސަރަޙައްދުތައްވެސް ހިމެނެއެވެ. މި މަޝްރޫޢު ނިމިގެންދާއިރު އައްޑޫ ސިޓީ ހިތަދޫއަށް 80 ހެކްޓަރުގެ ބިން، މަރަދޫ އަދި މަރަދޫފޭދޫ އަށް 76 ހެކްޓަރުގެ ބިން، ހުޅުދޫ އަދި މީދޫއަށް 32.3 ހެކްޓަރުގެ ބިން އިތުރުވެގެންދާނެއެވެ.

މީގެއިތުރުން އިންޓަގްރޭޓަޑް ޓޫރިޒަމަށް ޚާއްސަކޮށްގެން ތަރައްޤީކުރާ ހަންކެޑެއަށް 4.7 ހެކްޓަރުގެ ބިން އަދި ފަތުރުވެރިކަމަށް ޚާއްސަކޮށް އައްޑޫ ސިޓީ ފަޅުތެރެއިން 8.3 ހެކްޓަރުގެ 3 ރަށާއި 5 ހެކްޓަރުގެ 2 ރަށެއް އިތުރުކުރެވޭނެއެވެ. މި މަޝްރޫޢުގެ ތެރޭގައި އިންޓަރގްރޭޓެޑް ރިސޯޓް، ސިޓީ ހޮޓާ، ގެސްޓް ހައުސް އަދި ވޯޓަރ ވިލާތައް ތަރައްޤީކުރެވިގެންދާނެއެވެ. މި މަޝްރޫޢު މިހާރު ފެށުމުގެ މަރުހަލާގައިވާއިރު، ސަރުކާރުގެ އަމާޒަކީ ކުރިއަށްއޮތް 2 އަހަރު ތެރޭގައި ހަންކެޑެ އެއްކޮށް ތަރައްޤީކޮށް ނިންމާލުމެވެ.

ހަންކެޑެ މަޝްރޫޢުގެ ތެރެއިން އައްޑޫ ސިޓީގެ އެހެން ރަށްތަކަށް ޖުމްލަ 600 ޓޫރިސްޓް އެނދު އިތުރުވާނެއެވެ.
މިއީ ޖުމްލަ 2682 އެނދު އިތުރުވެގެންދާނެ މަޝްރޫޢެކެވެ. އަދި އައްޑޫ ސިޓީގައި މިހާރު ފަތުރުވެރިކަމަށް ޕްރޮޖެކްޓްކުރެވިފައިވާ ތަފާތު މަޝްރޫޢުތައް ނިމޭއިރު ޖުމްލަ 7000 ޓޫރިސްޓް އެނދު އައްޑޫ ސިޓީގައި އޮޕަރޭޓްވެގެންދާނެކަން ސަރުކާރުން ފާހަގަކުރައްވައެވެ.

އައްޑޫ ސިޓީ ބިންހިއްކުމުގެ މަޝްރޫޢާއެކު ފަތުރުވެރިކަމާއި އިޤްތިޞާދީ ބިޔަ ހަރަކާތްތަކަށް މުޅި އައްޑޫ ސިޓީ މިހާރަށްވުރެ ބޮޑަށް ހުޅުވާލެދެވޭނެ ކަމަށް ސަރުކާރުން ވިދާޅުވެއެވެ. ހަމައެހެންމެ މިއީ އެ ސިޓީގެ ރައްޔިތުންނަށް ދިމާވެފައިވާ ޒަމާންވީ ބޯހިޔާވަހިކަމުގެ މައްސަލައަށްވެސް ހެޔޮބަދަލުތަކެއް ގެނުވާނެ މަޝްރޫޢެއްގެ ގޮތުގައި ސަރުކާރުން ފާހަގަކުރައްވައެވެ.

މި މަޝްރޫޢުގެ ދަށުން 1.6 ބިލިއަނަށްވުރެ ގިނަ ރުފިޔާ ހޭދަކޮށްގެން 228 ހެކްޓަރުގެ ބިން އައްޑޫއަށް އިތުރުކުރެވޭނެއެވެ. މިއީ އައްޑޫގެ ތާރީޚުގައިވެސް ހިންގޭ ބިމުގެ އެންމެ ބިޔަ ބޮޑު މަޝްރޫޢެވެ.