ފްލެޓަށް ޝަރުތުހަމަވީ މީހުންގެ ގޭގެއަށް ގޮސް ޙާލަތު ބަލަން އަންނަ ހަފްތާގައި ފަށަނީ

ފްލެޓް ލިސްޓަށް ހޮވުނު މީހުންގެ ދިރިއުޅުމުގެ ޙާލަތު ބެލުމުގެ މަސައްކަތްތައް ކުރިއަށް އޮތް ހަފްތާގެ ތެރޭގައި ފަށްޓަވާނެ ކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވެއްޖެއެވެ. ފްލެޓް ލިބޭ ފަރާތްތަކާއި ނުލިބޭ ފަރާތްތައް ހިމެނޭ ވަގުތީ ލިސްޓް ނެރެފައިވަނީ އިއްޔެއެވެ.

ގެދޮރުވެރިޔާ ސްކީމުގެ ދަށުން ފްލެޓަށް ކުރިމަތިލުމުގެ ފުރުޞަތު، މާލޭގެ ރައްޔިތުންގެ އިތުރުން މާލެ ސަރަޙައްދުގައި ދިރިއުޅޭ އަތޮޅުތަކުގެ ރައްޔިތުންނަށްވެސް ހުޅުވާލިއެވެ. އެގޮތުން ފޯމު ހުށައެޅުމަށް ހުޅުވާލި ފުރުޞަތުގައި 20000 އަށްވުރެ ގިނަ ފޯމު ހުށައެޅިއެވެ.

ފޯމްތައް ރިވިއުކުރުމަށްފަހު، ނެރުނު ވަގުތީ ލިސްޓްގައިވާ ގޮތުން 13000 މީހުން ފްލެޓަށް ޝަރުތު ހަމަވެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްވަމުން ޕްލޭނިން މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ މުޙައްމަދު އާރިފް ވިދާޅުވީ، މިހާރު އާއްމުކުރައްވާފައިވާ ލިސްޓަކީ ފޯމާއެކު ހުށައެޅި މަޢުލޫމާތަށް ބަލާ ނެރެފައިވާ ލިސްޓެއްކަމަށެވެ.

އާރިފް ވިދާޅުވީ ފޯމުތަކުގެ މަޢުލޫމާތު ކަށަވަރުކުރުމުގައި އެންމެ ބޮޑު ދައްޗަކަށްވީ، މާލޭގައި ދިރިއުޅެފައިވާ މުއްދަތު ކަށަވަރުކުރުމުގައި ދިމާވި ދަތިތައްކަމަށެވެ. ލިސްޓް އާއްމުކޮށް ޝަކުވާ ހުށައެޅުމަށް 15 ދުވަހުގެ މުއްދަތެއްވަނީ ދީފައެވެ. އާރިފް ވިދާޅުވީ، ޝަރުތު ހަމަނުވާކަމަށް ކަނޑައަޅާފައިވާ މީހުންވެސް މިފަދަ މަޢުލޫމާތުތައް ކަށަވަރުކުރެވެން އޮތްނަމަ އެކަން ކުރުމުގެ ފުރުޞަރު އަދިވެސް އޮތްކަމަށެވެ.

"ބެލިދާނެ ދަރިފުޅު ސްކޫލްގައި އުޅެފައިވާ މުއްދަތު، ނޫނީ ކައިވެނިކޮށްގެން އުޅޭ މީހާ ވަޒީފާގައި އުޅޭކަމުގެ މުއްދަތު. އެގޮތަށްވެސް ކަށަވަރުކޮށްދެވޭނެ މާލޭގައި ދިރިއުޅެމުންދާ މުއްދަތު. އެހެންވީމަ ޝަކުވާ ހުށައެޅުމުގެ މި 15 ދުވަހުގެ މުއްދަތުގައި މިހެން ހުށައަޅާ ބަދަލުތައް، ރިވިއުކުރާނެ." އާރިފް ވިދާޅުވިއެވެ.

އާރިފް ވިދާޅުވީ ފްލެޓަށް ޝަރުތު ހަމަވާ މީހުން ބަލާފައިވަނީ، ފޯމުގައި ހިމަނާފައިވާ މަޢުލޫމާތަށް ބިނާކޮށްކަމަށެވެ. މީގެއިތުރުން ގޭގެއަށް ގޮސްގެންވެސް ދިރިއުޅުމުގެ ޙާލަތު ބެލުމަށް ހަމަޖެހިފައިވާ ކަމަށް އާރިފް ވިދާޅުވިއެވެ.

"އޮންލައިން ފޯމަށް ބަލައިގެން ޝަރުތު ހަމަވާ މީހުން ކަނޑައެޅީ. ނަމަވެސް މި ހަފްތާގެ ތެރޭގައި ގޭގެއަށް ގޮސް ހާލަތު ބެލުމުގެ މަސައްކަތް ފަށާނަން. އެއަށް ރިޢާޔަތްކޮށް މަރކްސް ތަރުތީބުކޮށް ލިސްޓް ނެރޭނީ." އާރިފް ވިދާޅުވިއެވެ.

ގެދޮރުވެރިޔާ ސްކީމްގެ ދަށުން ފްލެޓް ދިނުމަށް 32 ޓަވަރު ތަރައްޤީކުރުމުގެ މަސައްކަތް ސަރުކާރުން ހުޅުމާލެ ދެވަނަ ފިޔަވަހީގައި މިހާރު އަންނަނީ ކުރައްވަމުންނެވެ. މިއީ 4000 ހައުސިން ޔުނިޓެވެ.

މިތަންތަނުގައި ހުންނާނީ 2 ކޮޓަރިއާއި 3 ކޮޓަރީގެ އެޕާޓްމަންޓްތަކެވެ. އާރިފް ވިދާޅުވީ މި ފްލެޓްތައް ތަރައްޤީކުރެވިފައި ހުންނާނީ، ސެމީ-ލަގްޒަރީ ފެންވަރަށްކަމަށެވެ. މީގެތެރެއިން 3 ޓަވަރުގެ ސްޓްރަކްޗަރގެ ހުރިހާ މަސައްކަތެއް ވަނީ ނިމިފައެވެ. އަދި އިތުރު 3 ޓަވަރުގެ މަސައްކަތްވެސް ވަނީ ނިމުމާއި ގާތްވެފައެވެ. ސަރުކާރުން ވިދާޅުވެފައިވަނީ، ޓަވަރުތައް ނިމެމުންދާވަރަކަށް، ޙައްގުވެރިންނާ ހަވާލުކުރައްވަމުން ގެންދަވާނެކަމަށެވެ.

ފްލެޓް ލިސްޓުގައި ޝަރުތު ހަމަވި އެންމެނަށް ބޯހިޔާވަހިކަން ދިނުމަށް ސަރުކާރުން ވަނީ ނިންމަވާފައެވެ. 4000 ހައުސިން ޔުނިޓް މަޝްރޫޢުގެ އިތުރުން، ފްލެޓް ތަރައްޤީކުރުމުގެ އިތުރު މަޝްރޫޢުތަކެއްވެސް ސަރުކާރުން މިހާރު ވަނީ ހަވާލުކުރައްވާފައެވެ.